EZRA 3 - Kemethajüh (N) (Re-editing) Bible (BSI)

Kekinyi Saneng keshhu

¹ Asha tagüwa witsü Israel nyithu na tsüdila mathu nyutithu wi benyadha. Isanu mathu tsüdila gho Jerusalem wi saghuya,

² nu Jehozadak tsa Joshua, ma pvüshang keqhaikedithu, nu Shoaltiel tsa Zerubbabel pi ma shilithu gweghe nu Israel Nyizawa kekinyipen tsü saneng, isanu Anyiza nyiwa, Mosa Yenwa wi zhü ketheng kecükegwethu tsü kenie wina mathu ahhansha sapi tsü miwi mecang yale kesalina.

³ Kushiyyi wina kheneng keghothu na anyi ayyi ciwi hang kebenthu messi lela mathu na kheni gi wi kekinyipenwa tsü saya. Isanu mathu na pala tsü miwi aghanen nu minulen kaghapenla ahhanshathu mecang shhua.

⁴ Mathu na ayenthu tsü kenie wina Kelishu Kho kemini tsü sa; mathu na ghanan kaghapenla tsü ghanan ghena nsenthu keyishü ahhanshathu sapi kinyi;

⁵ tsümiwi mathu keshüthangla ahhanshathu maben pi kemecang tsü sa nu Asha Ketheü Kho tsü sa nu keshüthangla saghunu Apvüwa kinyi, papa kenen wina pi Apvüwa kecü kekinyithu tsüdila sa.

⁶ Anyithu na Kekinyijjenwa tsü npi saneng shhu lela mathu na asha tsüwa ghanan atuwa wi ahhanshathu mecang pi Apvüwa kecü tsü sashhu.

Kekinyijjenwa tsü Saneng Keshhu

⁷ Anyithu na apisa pi alon kahathu nu achan kecühthu ghena kedsakejjü nu akutimen sa, nu oliv deli pi Tur nu Sidon nyunutithu wi Lebanon wi mukeya sedar chanthu ketonli ghena kesunchi, tsüthu tsü pvü nu atssükedone wina sen nu Joppa wi gho. Hathu ha tsüdila Persia kadimiwa Sira jühkhukechi kenie wina sa.

⁸ Tsalina mathu na Jerusalem wi Kekinyijjen pen witsü kegho amapi tsüwa asha keniwa sengwi kekuli tsü sashhu. Zerubbabel, Joshua, nu mathu diyyi nyi kepathu, keqhaikedithu nu Levi nyithu, nu kushinyi sa kewa Jerusalem wi keghonengthu tsüdila gweghe nu kekuliwa tsü sa. Levi nyi kahang mapi ngwe nu tsü miwi keqhaiki tsüdi pi Kekinyijjenwa kesaneng kekuli wi kaghangthu sa thsü.

⁹ Levi nyiwa Jeshua nu ma tsathu nu ma shilithu, nu Kadmiel nu ma tsathu (Hodaviya geiwa) mathu gweghe nu Kekinyijjen kesaneng wi kaghangthu sa. (Henadad gei wi Levi nyithu na mathu kiqa.)

¹⁰ Khathansha wi anyithu na Kekinyijjenwa gi ketegü shagha khe keqhaikedithu na mathu gwomejuwa kaghazuthu pvüya nu mathu kwen wi tutuwathu khuya nu mathu pen saya, nu Asaf gei wi Levi nyithu na simbalthu sen nu ciwi nganya. Mathu na Kadimi David tsü wina sa kegho kecükegwethu kenie wina Apvüwa seng.

¹¹ Mathu na Apvüwa keseng ha saneng la saneng: “Apvüwa na mehai, nu ma Israel nanketizen tsüna anuphan benden.” Anyi tsüdila apiketsü sa magha pi Apvüwa seng, kepaghenanye Kekinyijjen giwa tsü zhü shagha kekuli sa wa.

¹² Keqhaikedithu, Levi nyithu, nu agei wi accülikesathu na kheni Kekinyijjenwa tsü mudha, mathu na Kekinyijjen gizhü keben tsü ghang nu magha pi qai. Isala kepathu na anonkeghe ghena jisha.

¹³ Anyi thola anonkeghe ghena kejisha nu kiqai hhai chü kepapa sa meyala, kepaghenanye mathu hhaiwa tsüna misi ntsawa pi alen kesie wila zaya.