EFESANYI 6 - Kemethajüh (N) (Re-editing) Bible (BSI)

Atsanga nu Abajjathu

¹ Ghanyithu, Apvüwa wina nthu bajjathu jühkina yalo, kepaghenanye nthu na hati kesa-u.

² “Nthu ba nu nthu jja nyuwakü” ha ayenkhukechi atuwa nu khishi kechi pi saghu ben.

³ “Isathu pala tsüdila nthu ghena mehaitsü nu nthu ayyi ha wi kesie hangya thsüle kesalina.”

⁴ Abajjathu, nthu tsangathu leben sameshü pi aghepvü thsü nsala. Isala Khristanyi yencüki nu Apvüwa kecükegwe pi mathu nonccaya.

Nssümaghathu nu Apvüthu

⁵ Nssümaghathu, nthu na Khrista kekuli sa keben ti nthu leben tsentsa sen nu messi nu kinyikü nu ayyi wi nthu pvüthu jühkinalo.

⁶ Nthu na mathu kenen pvüyale kesa ghena mathu ghang keben wi ketan ha nsala; isala Khrista nssümagha ti nthu leben tsüdi sen nu Anyiza kenenwa tsü salo.

⁷ Nssümaghathu ti anonghethi nthu kekuli salo, anyi kekuli ketan nyela Apvüwa kekuli saben le salo.

⁸ Nssümagha le ahvu sa lela ma kemehai kekuli ghena Apvüwa na akutimen pi tsüdi cüben kesa meshen yalo.

⁹ Apvüthu, nthu nssümaghathu wi tsü makesü sa nu mathu npateqhela yilo. Nankepapa nsala tsüdi jühkaghaten ketenwa tang wi nthu nu nthu nssümaghathu Pvüwa kesü na benle kesa meshen yalo.

Anyiza wi Aghighe Maben

¹⁰ Asakhenwa, Apvüwa kezü nu ma kekhang wina zükeqhe ngan benlo.

¹¹ Anyiza na aghighe pi nthu kecü tsüdi pvü yalo, isanu nthu na atsaghang nkemehai cho tsü ssi kaghashen yale kesalina.

¹² Kepaghenanye ithu na anyithu ssi kaghashen nben, isala atssan wi nkemehai ghamu kekhangthu, kekhang kesenthu, kedithu, nu ayyi kejang ha wi kekhangthu ssi kesali ben.

¹³ Tsalina khili Anyiza ghighe pvü yalo! Isathu nkemehai tsathang kegho wi nthu na aghinyi tsü ssi kaghashenya mehai nu ghikesa cen seng wi lela nthu na ngan benya mehai.

¹⁴ Tsalina atsentsawa pi ageshi keqhan ti nthu geshi qhanya nu ketsatan pi adeshi keqhan ti nthu deshi qhanya,

¹⁵ nu nthu ccüguwen kepvü ti kecca Jühtheü Kemehaiwa pi khi wale kesa ghena kiden benyalo.

¹⁶ Matsü tsüdi wi kenondi pi nthu tsonhi ti sa pvüya; kepaghenanye nthu na tsü pvü nu nkemehaiwa lamughocü nnikeqhe tsüdila patenenya mehai.

¹⁷ Hangshakeya pi aliwen ti nu Aghamu na pi nthu kecü Anyiza jüh njünnu ti kesa tsü khuya.

¹⁸ Kekhie wina ha tsüdila sa, nu Anyiza wi kekiqa khielo. Matsü tsüdila Aghamu lenketsütson wina kekhie salo. Ha jjügi ghena keshüthangla meghe-metsa nu nteshila Anyiza nyithu ghena kekhie salo.

¹⁹ Hi ajühkhi le keben wi Anyiza yala ketsijüh pi hi cü thsüle kesalina ighena la kekhie salo; isanu hi kempvüza sa khi nu ajühkemehaiwa kekuthi tsü pi chüya thsüle kesalina.

²⁰ Kepaghenanye ajühkemehaiwa ha ghena hi khili atssüzü saben lela hi mithonyi kesü. Hi kekhi-u tsüti hi kempvüza sala ajühkemehaiwa cüki khiya thsüle kesa ghena kekhie salo.

Shalom Sakhen

²¹ Ithu cünyuwa nu Apvüwa kekuli wi atsentsa maghawa Tukhika na icüki tsüdi pi nthu kizaben, isanu nthu na hi khati saben khe chüyaben.

²² Tsalina hi ma kesun pi nthu wi chiben, isanu ikhang tsüdila khati saben khe pi nthu kiza nu nthu kechü-kenong thsüle kesalina.

²³ Abawa Anyiza nu Apvüwa Jisu Khrista ya kecca nu kenondi wi ketizen pi Khristanyi cünyuthu tsüdila kecüwa salo.

²⁴ Anyiza nanketizen yala tizenki kesa sen nu ithu Pvüwa Jisu Khrista tizen ketenthu tsüdi ssiben ketenwa salo.