EFESANYI 4 - Kemethajüh (N) (Re-editing) Bible (BSI)

Agwo wi Jühkemece

¹ Hi Apvüwa kekuli ghena atssüzü nyi kesü nthu wi kizaben: Anyiza na nthu ci keya wi kahang yen sa ketheng wi tsü hanglo.

² Keshüthangla satemeni, ccatssü, nu lebensielo. Kesü kesü tu wi kekheneng keya wi nthu ketizenli pi ccücalo.

³ Aghamu na khukechi kecca nthu bhenghu keben ajühkemece wi tsü benyale kesa apiketsü salo.

⁴ Anyiza na nthu ci pi kaghang kesü wi chikeya tsüti ciwi agwo kesü nu Aghamu kesü na ben.

⁵ Ciwi Apvüwa kesü, kenondi kesü, nu baptism kesütan;

⁶ ciwi anyi tsüdi Ba Anyiza kesütan ben, ma tsüdi Pvüwa, pala maben wi kuli nu tsüdi wi ben.

⁷ Khrista ju khukechi qei wina ithu kesüsü nanketizen tsü muyaden.

⁸ Ntsawajüh na khiben, “Ma atssan wi keki wi atssüzüthu kejon ssinu ma gweghe wa; ma juthu pi anyithu cüa.”

⁹ “Ma atssan wi ki” kesa tsü jjügi mangwa nu? Tsü jjügi ma atuwa ayyi kedhu wi dugho.

¹⁰ Tsalina anyi dugho kesawa tsüna atssan maben kemisi miwi ki kesawa tsü, isanu ma atssan ayyi maben pongyale kesalina.

¹¹ Ma “kesawegü juthu pi anyithu cü”; ma anyi pahan pi apostelthu, kepathu pi atusenjüh-kechüthu, kepathu pi jühketsinyithu, kepathu pi pastorthu nu kesansithu sa thsü theng.

¹² Ma Anyiza nyithu yala Khristanyi kekuli sa, nu Khrista gwowa tsü sa pi mehaiya thsüle kesalina ma ha sachi.

¹³ Isanu ithu tsüdila ithu kenondi nu ithu Anyiza Tsawa cüki kechü kesü kesa wi gweghe ghoya thsüle kesalina; ithu na anyi kezügü saya, nu wa Khrista yencüki kemisi tsü cu yaden.

¹⁴ Tsaseng wi ithu na ghanyithu, anyi nyu kemechuthu na mathu cho wina saya nu nyu mechu sen wa kesazzi wi chiketen kesansijüh ghena atssüketi na lle pi, nu ameghü na mo pi bvü keten ti nsadha.

¹⁵ Tsüti kesawa nye, nanketizen wi ajühtsentsa khi, nu ithu na Khrista aliwa wina alentagha wila shigü nwathu yishü.

¹⁶ Ma kekhang wina agwo wi alen kepapa kesa tsüdila zanghu theng, nu agwo tsü mabenla ahatha tsüdi tsü zanghu pvüben. Tsalina khathansha wi alen kesüsü tsü mehaitsü kuli khe agwo mabenla shigü shagha nu nanketizen wi satezü waden.

Khrista wi Kahang Ketheü

¹⁷ Hi Apvüwa nyan wina nthu kitsan chiben: anyi Anyiza nkechüthu tsüti hang nbenla yilo, mathu kemeshen tsüna ma men nmi,

¹⁸ nu mathu leben na kejang wi ben. Anyiza na khukechi kahang wi tsü mathu shei nmi, kepaghenanye mathu na nchütha nu leben-dhu kesalina.

¹⁹ Mathu na kejüghe nmitha, mathu ketanla mathu pi nketsatan wi chi nu kekheneng mangla nmila nkemetha tsüdi saden.

²⁰ Nthu na Khrista cüki chü keyawa tsüna tsüti nye le!

²¹ Nthu na ma cüki zaya nu ma senkeniethu sa keya ghena atsentsawa Jisu wi keben tsü pi nthu sansi cübenla metsidha.

²² Tsalina nthu kahang kaghawenwa wi kahang yen nthu sa pi tsüti hang thsü ketenwa tsü teshi yilo — kahang kaghawenwa tsüna kemechu kesa mvu pi yasaben.

²³ Nthu leben nu kemeshenthu tsüdila ketheütha nsathu yishü,

²⁴ nu kahang yen ketheüwa tsü pvü meyathu yishü, tsüna Anyiza tsi ti sakechi nu atsentsa kahang wi tsüna kemeshon nu kemetha wi pi ccüca chiben.

²⁵ Tsalina mili-nmesa layi! Anyi tsüdila ajenshüjenphon wi ajühtsentsa nkhithu yishü, kepaghenanye ithu tsüdila gweghe Khrista wi agwo kesü saben.

²⁶ Keujüla nthu na alebentsu lela nsamila, nu nlebentsu sen wa aghani ya du thsü nsala.

²⁷ Atsaghang ya kuliya kemehai matsü pi ncüla.

²⁸ Anyi ghanfü ketenwa n-ghanfüla nu ma ketanla ma nmen milledsa nu ketha-u kiqayale kesalina kuliwa nsathu yishü.

²⁹ Nthu pang pi ajüh nkemehai nyela nyu kiqaya kesa ajüh kemehai nsenthu keyishü nyu sa pi mehaiya kesathu khilo, isanu nthu kekhi tsü za keyathu ghena kemehaiwa saya thsüle kesalina.

³⁰ Nu Anyiza Kemetha Ghamu tsü sa pi ahathana thsü nsala; kepaghenanye Aghamu tsüna nthu Anyiza jile kesa nkhenshadha, atsathang gho ketenwa wi Anyiza na nthu hangshaya ben kesa chütiben.

³¹ Nthu ajüh kikhakisa, kishen-keshi, leben ketsu kekhi tsüdi teshilo. Ketegüli nu kimennili nsa layi, nankemeghüli nsa layi.

³² Tsüti kesawa nye, khokho tu wi ccatssü, leben kesüsa, nu Anyiza na Khrista wina nthu kesami teshi kecü tsüti nthu khokho kesami keteshili tenlo.