EFESANYI 2 - Kemethajüh (N) (Re-editing) Bible (BSI)

Keshü wina Kahang wi Keshhu

¹ Kheni tsüwi nthu na nthu kesami nu ajüh nkeya ghena aghamulen wi keshü sagho.

² Tsü tsüwi nthu na ayyi wi nkemehai len tsü nie, nthu na atssan wi kekhang kedi jüh tsü kina, aghamu tsüwa tsüna khili anyi Anyiza jüh nkekinathu jawi kuliben.

³ Ithu tsüdila kutijü wi mathu ti ithu sajjü kenen wi hang nu ithu gwo nu aleben wi kesamvu tsü kuli. Ithu kahang yen kenie wina ithu la nyu kepathu ti Anyiza leben kekha kekhu wi ketizen kesa-u sa.

⁴ Isala Anyiza nanketizen na ji ntsa, nu ma ithu ketizen na di ntsa,

⁵ nu ithu na ajüh nkekina ghena aghamulen wi shü keben wi ma ithu ssigho Khrista wi hangya thsüdha. Anyiza nanketizen wina nthu hangsha yadha.

⁶ Ma Jisu Khrista wina ithu sa pi hang cü nu ithu ma gweghe tang wi kadisa thsüden.

⁷ Ma ha sa kechi na gho keten matsü tsüdi wi ma nanketizen kedegü nkeya tsü Jisu Khrista wina ketizen tsü pi ithu ccücachi.

⁸ Kepaghenanye kenondi ghena Anyiza nanketizen wi nthu hangsha yadha. Hawa ha nthu ketanla sa keya nye, isala Anyiza na aju khukechi.

⁹ Ha kekuli ghena nye, tsalina thola tsü ghena kapvüya nben.

¹⁰ Anyiza na ithu hati kesa ha sachi, nu ma Jisu Khrista wina ithu kahang wi kekuli kemehaithu sa thsüle sachi, tsüna ma ithu ya sa thsüle npi wina kiden pi thengdha.

Khrista wi Kesütan

¹¹ Nthu Judah nyi nkenyethu, Judah nyithu na mathu ketanla mathu pi ahyu kahanthu le (tsüna anyi akwen pi mathu sajjü miwi kekuli) khi nu nthu pi “ahyu nkahanthu” le ciden, kheni nthu kahang cüki tsü meshenchilo.

¹² Tsü tsüwi nthu na Khrista wiwa nye. Nthu na asang sa nu Anyiza na kessikeya nyi nsa. Anyiza na pi ma nyithu cüle kesa ghena khishi ketheng cenkethenjüh wi tsü nthu ji nmi, nu nthu na ayyi ha wi kaghang nmi nu Anyiza nchüla hang.

¹³ Isala khili tsü, Jisu Khrista wina nthu kuti kelensie wi keten wi Khrista ahhansha sa keshü ghena ssinu tetsaki ghoyadha.

¹⁴ Kepaghenanye Khrista na Judah nyi nu Judah nyi nkenyethu sa pi kesütan sa kecü wina gweghe kemehai sengho ithu cüdha. Ma gwo pi mathu jüwi nankemeghü keshondhiwa tsü yasa pidha.

¹⁵ Ma ketanla ma wina amizza keni tsü pi kesütan sale kesalina ma Judah nyi Yenwa wi yenkhukechi nu ahzathu tsü yasa, tsüti nu gweghe kemehai tsü sachi.

¹⁶ Khrista na kross miwi keshü ghena mathu nankemeghüli tsü yasa; kross ghena ma amizza keni tsü saghu pi kesütan sa nu ssinu Anyiza wi gho nengdha.

¹⁷ Tsalina Khrista na gho Jühtheü Kemehaiwa tsü pi nthu Anyiza temeja wi keben Judah nyi nkenyethu, nu ma tetsaki keben Judah nyithu tsüdila sansi.

¹⁸ Khrista wina ithu Judah nyithu nu Judah nyi nkenyethu tsüdila Aghamu kesütan wina Abawa tu wi ghoya mehaidha.

¹⁹ Tsalina nthu Judah nyi nkenyethu na asang nu ajjenlli nmila ketenthu nyedha; nthu na khili Anyiza nyithu nu Anyiza theghithu gweghe kemetha nyithu sayadha.

²⁰ Nthu la apostelthu nu atusenjüh-kechüthu na alon donbvüwa Jisu Khrista miwi kedegü ketheng wi tsü sayadha.

²¹ Ma ajjen tsüdi zanghu nu tsü yala shigü wa kemetha kekinyijjen kesü sala sametha pi Apvüwa wi chiden.

²² Ma wina nthu la nyu kepa wi gweghe Anyiza na Aghamu wina hang keten pen kesü saya bendha.