EFESANYI 1 - Kemethajüh (N) (Re-editing) Bible (BSI)

¹ Hi Paul, Anyiza kemeshen wina Jisu Khrista apostel kesü sa keyawa na pi Efesa wi kemethathu, Jisu Khrista wi mathu kahang wi jühtsentsa sa ketenthu kecü.

² Anyiza ithu Bawa nu Apvüwa Jisu Khrista ya nanketizen nu kecca pi nthu kecüwa sayalo.

Khrista wina Aghamulen wi Kesawegüthu

³ Ithu keseng pi Anyiza nu ithu Pvüwa Jisu Khrista Ba cü nalo! Kepaghenanye ithu Khrista wi benkeya ghena ma tang wi aghamulen wi kesawegü pi ithu cüdha.

⁴ Ayyi npi kesachi tu wi na Anyiza na Khrista wina ithu pi ma ji sale kessi yadha, isanu ithu ya ma tu wi metha nu nsazzi thsüle kesalina. Ma ketizen ghena

⁵ Anyiza na Jisu Khrista wina ithu pi ma tsangathu sale südhe yadha —hawa ha ma kenen nu kemeshen wina.

⁶ Ithu Anyiza nyankethang nanketizen ghena, ma kaghali ma Tsawa wina aju kekila pi ithu kecü ghena ma seng nalo!

⁷ Kepaghenanye Khrista na ahhansha sa keshü ghena ithu lisha chicü, tsüna ithu kesami teshi cüdha. Anyiza nanketizen na khacula di nu,

⁸ tsüna ma ji ntsawa pi ithu cüdha le! Ma kemetsa nu kechü tsüdi wina

⁹ Anyiza na sale keben, nu ma Khrista wina sacen yale südhe ketheng kekuthi kemeshenwa tsü pi ithu chüya thsüdha.

¹⁰ Matsü centhakeya wi Anyiza na kekiden ha sacenle kesa wi atssan nu ayyi wi pala sahangkechi tsüdi saghuya nu Khrista pi aliwa saben.

¹¹ Pala tsüdila Anyiza kemeshen nu kenen wina sacenya, nu Anyiza na ma kemeshen ghena aghatsan wina khi ketheng ti Khrista wina ithu kessi pi ma nyithu saya thsüdha.

¹² Isathu, ithu Khrista wi kaghang keben atuwa sa keyathu Anyiza nyankethangwa tsü seng nalo!

¹³ Nthu la ketsijüh tsentsa, Jühtheü Kemehaiwa nthu hangshakeya sengho kecü tsü za keya wi Anyiza nyithu sayadha. Nthu na Khrista nondi, nu Anyiza na khishi ketheng ti nthu na ma ji sa keya mechantsi pi jen nu Kemetha Ghamu pi nthu nkhenshadha.

¹⁴ Aghamu hana Anyiza na ma nyithu wi khishi ketheng tsü ithu na muyaben, nu ha Anyiza na kekhenkeghe mangla nkemi pi ma ji ithu cüben kesa chüti kebenwa tsü. Ithu ma nyankethang tsü seng nalo!

Paul Kekhie sa

¹⁵ Ha jjügi ghena, hi nthu na Apvüwa Jisu kenondi nu nthu na Anyiza nyithu tsüdila ketizen cüki za keya nten na,

¹⁶ hi nthu ghena keseng pi Anyiza kecü npi handhi. Hi kekhie kesa wi nthu meshen benden,

¹⁷ nu ithu Pvüwa Jisu Khrista Nyiza, anyankethang Bawa wi Aghamu pi nthu cü, ma nthu sa pi metsaya nu Anyiza pi nthu ccüca, isanu nthu na ma chüya thsüle kesalina kekhie saben.

¹⁸ Hi nthu leben shachi pi ma kewegüwa tsü muyalo khieben, isanu ma kaghang mangwa wina nthu ciya, nu ma ma nyithu wi khishi kethengthu tsüna amankesa kemihhi khatila ben khe chüya thsüle kesalina,

¹⁹ nu ithu nondi ketenthu miwi kuli keben ma kekhang tsüna khatila di nu! Kekhang ithu miwi kuli kebenwa hana

²⁰ ma keshü wina Khrista sa pi hangya thsüa nu pi tang wi ma kwen ajewa benya thsü kesa kekhang tsü makesü.

²¹ Khrista na ciwi tang wi kekhang kesenthu, kedithu, kekhangthu, nu apvüthu miwi kadi saben; nu ma nyan na ayyi hawi ketan nyela gha ketenwa wi lela kekhangthu nyan tsüdi miwi diki ben.

²² Anyiza na pala tsüdi pi Khrista ccü kekhu wi chi nu ma pi kemehu ghena pala tsüdi miwi Apvüwa sa thsüdha.

²³ Kemehu tsüna Khrista gwo, ma kesacen tsüna ma ketanla apen tsüdi wi pala tsüdila sacenden.