DANIEL 8 - Kemethajüh (N) (Re-editing) Bible (BSI)

Daniel na Kemanthi wi Aneni nu Khaghaneni Süpon Kemu

¹ Belshazzar na kadimiwa sakeya kecheng mapi wi hi kemanthi keniwa tsü mu.

² Kemanthi tsüwa wi tsü zulila hi ketanla hi Elam yyi wi Susa nyunutiwa khweti kezhü non wi keben mu. Hi Ulai Ghaku ghüsa wi ngan keben,

³ nu ciwi aghaku kete wi khaghaneni süpon kesü ma aghacü kesiesie keni pvü nu kesü na kepawa miwi sie nu theü kesa mu.

⁴ Hi khaghaneni süponwa tsüna ma ghacü pi niduwa, aghawa, nu acülawa nyeggü keben tsü ghangben. Aghangsa kesüla ma khen meya, nyelela ma kekhang tubvü meya. Ma ma kemeshen sa nu awisa pfüpfü wa.

⁵ Hi hana ma jjügi mangwa nu sa imansa keben wi niduwa na aneni kesü na mbhi ntsa nu ma ccü pi ayyi la nkidhenla bvügho. Ma ma nyon keni jüwi ma ghacü kemechan kesü pvüden.

⁶ Ma khaghaneni süpon kesü na aghaku ghüsa wi ngan keben hi kemuwa kepeghe wiwa tsü gho, nu ma kezü tsüdi sennu tsüwa wi bvü wa.

⁷ Hi ma khaghaneni süponwa tsü kaghaccenli kesa tsü ghangben. Ma lebentsu ntsa sa nu khaghaneni süponwa shon nu ma ghacü keni pashüa. Khaghaneni süponwa na kaghanineng kesa kezü nmila. Ma shon pi ayyi wi khala chi nu cüten, ciwi thola ma hangshaya kemehai nmila.

⁸ Aneni tsüwa na awisa pfüpfü shagha, isala ma khang ntsa keben wi ma ghacüwa tsü pashüa. Tsü pen wi aghacü kemechan mejü na shhugho, nu kesüsü tsüdila alen kepapa wi jatanben.

⁹ Aghacü mejü hathu jawi aghacü kizza kesü shhugho, tsü kekhang na ketssen sennu acülawa nu nishuwa nu Khishi ketheng Yyi wiwa peghe wa.

¹⁰ Tsüwa tsüna zü pfüpfü pi tang süpahizi, ghotsithu, ssisaya kemehai sa, nu tsüthu pahan pi ayyi wi khala chi, nu tsüthu cüten.

¹¹ Tsüna tang süpahizi benchüwa lela nkhichi, atsathangla ahhanshathu sapi ma cü keten tsü khen, nu Kekinyijjenwa tsü yasa.

¹² Anyithu na atsathangla ahhansha mehaitsü sapi kecü mithon wi kesami sa, nu keccüna tsentsawa tsüpi ayyi wi khala chia. aghacüwa tsüna ma kekuli tsüdi wi mehai kayiya.

¹³ Tsaseng wi hi tangnyilo kesü na kepawa wi keü keben zaya, “Kemanthi wi kemu tsüthu tsüna matsü khathu waben nu? Kesami pongcawa tsüna khathu atsathangla hhansha kesathu tsü mithon saaben nu? Matsü khathu tang süpahizi nu Kekinyijjenwa tsü cüten benten nu?”

¹⁴ Tangnyilo kepawa na keluneng hi zaya, “Tsüna 2,300 shitawa nu aghanen kecu saaben, nu tsü tsüwi ahhanshathu la sa nben. Tsaseng wi Kekinyijjenwa tsü saneng yaben.”

Tangnyilo Gabriel na Kemanthiwa Tsü Khikemetha

¹⁵ Hi kemanthiwa tsü ma jjügi mangwa khe chüshiya le sa keben wi anyi kesü zulila gho ituwi nganya.

¹⁶ Hi ahhai kesü na Ulai Ghaku ghüsa keni jüwi khi keben zaya, “Gabriel, ma kemu jjügiwa tsü khimetha pi ma kizalo.”

¹⁷ Gabriel na gho ikete wi nganya, nu hi qhethiketen pi ayyi wi qanca dua. Ma hi wi khi, “Keshü nyiwa, ma jjügi chüshi yalo. Kemanthiwa hana ayyi sakhen wi saa keten tsü le.”

¹⁸ Ma ajühkhitu keben wi hi mangla nchüla ayyi wi qanca dua. Isala ma hi ghantenya nu hi pieki pi ngan thsüa,

¹⁹ nu khi, “Anyiza lebenketsu kekuli na khati saben khe hi pi no ccücaben. Kemanthiwa tsüna asakhen wi cüki khiben.

²⁰ “No kemu khaghaneni süponwa ma ghacü keni kepvü tsüna pi Media nu Persia kadinyuthu ghape kechi.

²¹ Aneniwa tsüna pi Gris kadinyu kaghape, nu ma nyon keni jüwi ma ghacü kemechanwa tsüna kadimi atuwa.

²² Ma ghacü atuwa kepashü seng wi aghacü mejü keshhughothu tsüna mizzatenti tsüwa na gishü pi kadinyu mejü sa nu kadinyu atuwa kekhang ti sa meyala keben ghape kechi.

²³ “Kadinyuthu sakhen na tetsaki lethu mathu na gheshighena nmehai ntsa sa shagha nu mathu meten ncüthu yishü kegho wi leben kedhu, yencüki nkemehai, nu milikemesa kadimi kesü shhughoben.

²⁴ Ma khang shagha ben, isala tsüna ma ketanla ma kekhang wina nye. Ma pala yasa pi kemessi sa nu ma kekuli tsüdi wi mehai kayi yaden. Ma keyasa sengho anyi kekhang ntsa nu Anyiza nyithu miwi chiden.

²⁵ Ma khapeghe- khaja kesalina ma milikemesa len wi mehai kayi yaden. Ma ketanla ma ghena kapvü nu kitsan nchila anyi kejon yasa ben. Ma tsüdi jawi Kadimiwa lela thenben, isala anyi kekhang nsenla ma yasa cüden.

²⁶ Aghanen nu minulen wi hhansha kesa kemanthi cüki khimetha pi no kekiza tsüna gho metsiben. Isala khili tsüpi kuthi thengla, kepaghenanye matsü kesie seng wi ccüna tsü sacen metsiben.”

²⁷ Hi shüca wa nu ghanan keujü naa wa. Tsaseng wi hi shagha nu kadimiwa na kekuli pi hi nondi kechiwa tsü sa wa, isala hi kemanthiwa tsü chükivvü nu tsü chüshi meya.