DANIEL 6 - Kemethajüh (N) (Re-editing) Bible (BSI)

Daniel na Ssensitemi Ku wi Keben

¹ Dariya na ma kadinyu tsüdi wi kekhang sen thsüle kesalina ahngthu meza nu nkwe kessiyale kesa südheya.

² Tsümiwi, ma Daniel nu kepa wi meshu keni kessi pi ahngthu kekuli lentsütson nu kadimiwa kenen tsü ghang thsü.

³ Daniel na kepa wi kekuli kaghangthu nyelela ahngthu miwi wan ma kekuli kemehai pi ccüca chia. Ma kemehai makepa kesalina kadimiwa na ma pi kadiyyi maben miwi kenonccawa sa thsüle kesa cenya.

⁴ Tsaseng wi kepa wi kekuli kaghangthu nu ahngthu na Daniel na kadiyyi wi ayenkesen wi ma kesazzi bha, isala mathu na mu meya, kepaghenanye Daniel nondi qo nu ma mangla kesazzi nu atsentsa nkenye kekuli nsa.

⁵ Mathu na khokho wi khi, “Ithu na ma keccüna len wi nkenye tsü mangla sa nu Daniel kimenni keya len muya ntendha.”

⁶ Tsalina mathu na wa kadimiwa metu nu khi, “Kadimi Dariya, Njenkeben Kadimiwa ya kesie kahangwa salo!

⁷ Ithu no kadiyyi wi ayensen keten kaghangthu, ahngthu, ahng kizzathu, nu kedi kepathu tsüdila cenkeya lethu, Njenkeben Kadimiwa na ahza kesü khushichi nu tsü satezü chilo saben. Ghanan changha jüwi anyi kesüla Njenkeben Kadimiwa wi nkenye tsü acenpvü kepa wi nyelela anyi kesü wi lela mangla khieya nbenle kesa ahza khuchilo. Anyi kesü le kesü lela ahza ha bheghe kesawa pi ssensitemithu na pong keben ku wi khala chiaben.

⁸ Tsalina Njenkeben Kadimiwa na ahza ha khuchi nu n-nyan zhüchi, isalethu tsüpi Mede nu Persia nyithu ayen kesü sala satezü nu kemili nkeya saaden.”

⁹ Tsalina Kadimi Dariya na ahza tsü miwi ma nyan zhükia.

¹⁰ Khathansha wi Daniel na ahza tsü miwi kadimiwa nyan zhükidha le kesa zaya khe ma ajjen wi wha. Ma jjensha tangwa keshondhi kesü wi jjenkubhi na Jerusalem wiwa jatan ben. Ciwi ma keshüthangla sa keten ti jjenkubhi tsü sha nu akhhutsüla ghanan kesü wi kecheng tughu Anyiza wi kekhie sa.

¹¹ Daniel ghinyithu na ma Anyiza wi khie keben kemu wi

¹² mathu tsüdila Daniel kimenni cüle kadimiwa wi wa. Mathu na khi, “Njenkeben Kadimiwa, no ghanan changha jüwi ha anyi kesü le kesü lela no wi nkenye tsü acenpvü kepa wi nyelela anyi kesü wila kekhie sa kebenwa pi ssensitemithu na pong keben ku wi khalachiaben kesa ahza kesü wi tsü n-nyan zhütheng.” Kadimiwa na luneng, “Anle, tsüna Mede nu Persia nyithu yen kekhang kesü nu kemili nkeya kesü saben.”

¹³ Tsaseng wi mathu na kadimiwa wi khi, “Daniel, Judah wina kushinyi sa keghowa tsüna Njenkeben Kadimiwa nyuwakü nyelela no ahza khukechiwa tsü n-nieladha. Ma ghanan kesü wi kecheng tughu kekhie saki benten le.”

¹⁴ Khathansha wi kadimiwa na ha zaya khe ma leben güccü nu ma piketsü sala Daniel kekasha kecü len pahan bha. Ma aghani npi kedu chu tsü kiden.

¹⁵ Tsaseng wi anyithu na kadimiwa wi kheneng gho nu ma wi khi, “Njenkeben Kadimiwa na chüben, Mede nu Persia nyithu yen kenie wina kadimiwa na khushikea ahza kesütanla kemiliya nben.”

¹⁶ Tsalina Daniel ghan pi ssensitemithu na pong keben ayyiku kesü witsü chilo kesa ahza khushia. Ma Daniel wi khi, “No nleben tsentsa sennu ma kekuli sa ketenwa n-Nyiza ya no kekasha kecüwa salo.”

¹⁷ Anyi thola Daniel kekasha meya thsüle kesalina alon kesü pi ayyiku pang wi khen nu kadimiwa nu ma kekhu wi kedithu ji kemechan pi ma miwi jen.

¹⁸ Tsaseng wi kadimiwa na kadijjen wi kheneng gho nu kedsakejjü nyelela katsüha mangla nsenla ghaja thangthang jenshü meyala sa.

¹⁹ Tsantheghi keben wina kadimiwa na shagha nu ayyiku wi wa.

²⁰ Ma wala cukeya wi ma leben güccü ntsa nu jishala, “Daniel, hangkeben Nyiza maghawa! No nleben tsentsa sennu ma kekuli sa ketenwa Anyiza tsüna ssensitemithu pang wina no hangsha cü ma?”

²¹ Daniel na luneng, “Njenkeben Kadimiwa ya anuphan kahangwa salo!

²² Mathu na hi patena nsa thsüle kesalina Anyiza na ma nyilo kesunchi pi ssensitemithu pang khen cü le. Ma tsüti sale, kepaghenanye hi kesami nmi nu ntuwi nsazzi le kesa ma chüben, Njenkeben Kadimiwa.”

²³ Kadimiwa na ma nonghe ntsa saya nu ayyiku wina Daniel zanshi yalo kesa ahza khuchi. Tsalina mathu na ma zanshiya, nu ma miwi yisüyigha mangla nmi, kepaghenanye ma Anyiza nondiden.

²⁴ Tsaseng wi kadimiwa na Daniel kekimennithu tsüdila ghanyalo ahza khuchi, nu ma mathu pi mathu wubvüthu nu mathu tsangathu gweghe pi ssensitemithu na pon keben ayyiku witsü khalachi thsüa. Mathu na dula ayyi npi kecu wina ssensitemithu na benkegho mathu cen nu mathu gü tsüdila pacha.

²⁵ Tsaseng wi Kadimi Dariya na lesü zhü pi ayyi wi mizzatentithu, anyithu nu ajühjja kepapa nyithu tsüdi wi cüchi: “Shalom!

²⁶ Hi kadiyyi kekhu wi kebenthu tsüdila Daniel Nyizawa ha messi nu nkinyiküthu yishü kesa ahza khuchiben.” “Ma hangkebenwa Anyiza kesü, nu ma anuphanla kekhang senben. Ma kadinyu na khiela yasaya nben, nu ma kekhang na khiela asakhen sa nben.

²⁷ Ma nyu hangsha nu kekasha yaden; ma tang wi nu ayyi wila amankesa nu qhecüshaghe kesa kuliden. Ma ssensitemithu na Daniel n-ghan thsüla ma hangshaya.”

²⁸ Daniel na Dariya kadikesa nu Persia nyi Sira kadikesa tsü wi mehai kayi ntsa sa.