DANIEL 5 - Kemethajüh (N) (Re-editing) Bible (BSI)

Belshazzar Kemishu

¹ Ghaja kesü Kadimi Belshazzar na kemishu keti kesü sa nu anyi kedithu hazar kesü cichi, nu mathu gweghe kisengtssü jjüpi adina.

² Mathu na jjü keben wi Belshazzar na ma ba Nebukhadnezzar na Jerusalem wi Kekinyijjen wina pvü kegho suna nu rükatssü hyithu nu akhuzzathu tsü sengholo ahza khuchi. Kadimiwa na tsüthu sengholo kesun chi, ma nu ma kedithu, ma wubvüthu, nu ma wubvü meshibvüthu na tsüthu pi chi jjüle kesalina.

³ Wan suna hyi nu akhuzzathu tsü senghoa, nu mathu tsüdila tsüthu wina kisengtssü jjü

⁴ nu suna, rükatssü, lezza, amighe, achan, nu alon pi kezhü acenpvüthu tsü seng.

⁵ Zulila anyi kwen kesü na shhugho nu kadijjen keshon miwi ahulathu kewegü na kiza ntsa sa keben witsü pala zhü shagha. Nu Kadimiwa na akwen tsüna pala zhükeben mu.

⁶ Ma qhethiketen nu phalagha sa nu ma khhu keni la kedheggü wa.

⁷ Ma magha nu anyi pahan ya demathu, avü kesenthu, atsanen kechüthu ssigholo khi. Mathu na kegho wi kadimiwa na mathu wi khi, “Anyi thowa na kezhü ha siya nu ma jjügi khipi hi kizaya khe ma kadimi gwomejuwa kaghazu nmiepheü kesa tsü pvü, kenyuwakü suna tsanzüli tsü meyan, nu kadinyu wi kekhang kesen kechengwa saaden.”

⁸ Kadimi sansichüthu na shhugho, isala mathu thola kezhü tsüwa si nyelela ma jjügi mangwa khe khipi kadimiwa kiza meyala.

⁹ Kadimi Belshazzar na ma ccükwenshü kesalina phalagha sapfü, nu ma kekhu wi kedithu na mangwa kesa-u khe acho nmila.

¹⁰ Kadijja na kadimiwa nu ma kekhu wi kedithu na magha keben tsü zaya nu mishu kebenpen wi du. Nzawa na khi, “Njenkeben Kadimiwa ya kesie kahangwa salo! Nlikedhamang sa no phalagha nben lalo.

¹¹ No kadinyu wi anyi kesü acenpvüthu kemetha ghamu na ma miwi keben nyi ben. Nba na kadimi sa keben wi anyi hawa hana chüshiya kemehai, kemeghe-kemetsa, nu acenpvüthu kemetsa ti kesa kemetsa pi ccüca chile. Nu nba Kadimi Nebukhadnezzar na anyi tsüwa pi atusencüki kekhithu, demathu, atsanen kechüthu, nu avü kesenthu, miwi kediwa sa thsü theng.

¹² Ma saya kemehai ma kepatha nu metsa nu aman jjügi mechan-metsa kekhichü, chükivvü kesa khiya, nu ajjügi kedhu khimetha keya nyi kesü; tsalina anyi Daniel, kadimiwa na ma nyan pi Belteshazzar keciwa ha ssigholo kesun chilo, isalethu ma hathu jjügi tsüdi pi no kiza ben.”

Daniel na Kezhü Jjügi Khimethakechi

¹³ Daniel ssinu wan kadimiwa tuwi ghoa, nu kadimiwa na ma wi khi, “No Daniel, Judah kushinyiwa, iba kadimiwa na Judah wina ssinu hewi keghowa tsü kwe?

¹⁴ Acenpvüthu kemetha ghamu na nmiwi ben nu no sapichü ntsa nu kemeghe-kemetsa nu kemetsa benle kesa hi zaya.

¹⁵ Sansichüthu nu demathu ssigho zhüketheng ha si nu ma jjügi mangwa khe khipi hi kizalo sa, isala mathu na ma jjügi chüshi meyala.

¹⁶ Khili hi no kekuthi jjügi bhashiya nu ajjügi kedhu khimethaya mehaile kesa zayadha. Keujüla no kezhü hawa ha siya, nu tsüna mangwale khiben khe pi hi kizaya mehai lethu, no kadimi gwomejuwa kaghazu nmiepheü kesa tsüpi no pvü thsü, kenyuwakü suna tsanzüli pi no meyan thsü, nu no pi kadinyu wi kekhang kesen kechengwa sa thsüaben.”

¹⁷ Daniel na luneng, “Njuthu tsüpi nghena thengya nyelela pi anyi pahan cülo. Hi Njenkeben Kadimiwa ghena mangwa zhütheng khe sichi nu ma jjügi mangwa khe pi no kizaden.

¹⁸ “Kemisintsawa Anyiza na nba Nebukhadnezzar sapi kadimiwa kesü sa nu kediqo nu ajenkeben pi ma cü.

¹⁹ Ma di ntsa kesalina mizzatentithu, anyithu nu ajühjja kepapathu wi anyithu tsüdila ma messi nu kedheggü. Keujüla ma anyi pahan pathi mvu lethu, ma tsüti sa; nu ma anyi pahan pi hang thsü mvu lethu, ma tsüti sa. Ma anyi thowa nyuwakü cü nyelela kimenni cü mvu khe tsü sa.

²⁰ Isala ma kapvü, leben-dhu, nu daggü shagha kesalina ma kadipen wina ma khupi nu ma kenyuwakü benwa tsü bhatagha.

²¹ Anyithu zilashü wina ma jügüshia, nu ma leben na aghangsa kesü ti sa. Ma aghang gadathu ssinu hang, nu amesü süpon kesü ti aghang maha dsa, nu mangla pi akekhwen nsala agheja wi akejan cakila jen. Asakhen wi ma Kemisintsawa Anyiza na anyi kadinyuthu tsüdi miwi kekhang senten nu ma tsüthu pi ma thowa kessiya khe cüya mehaile kesa chüya.

²² “Isala no ma tsa, no ha tsüdila chüben lela no ketanla no satemeni meya.

²³ No tangwi kebenwa Apvüwa nu ma Kekinyijjen wi ahyithu nu akhuzzathu khusengho ma kematang kulidha. No, nkekhu wi kedithu, nwubvüthu, nwubvü meshibvüthu na tsüthu pi kisengtssü chi jjü nu suna, rükatssü, lezza, achan. nu alon pi kesa cenpvüthu mangla muya, zaya, nu chüya, nketenthu tsü seng wa. Isala no hangya nyelela shüya kemehai nu no kekuli tsüdila ghan sen ketenwa Anyiza tsü kinyikü nsala.

²⁴ Tsüwa tsü ghena Anyiza na akwenwa tsü kesun pi ajüh hathu ha zhü thsü.

²⁵ “Zhüketheng tsüna hawa ha: ‘Siya, siya, whu, gishüzighe.’

²⁶ Nu hawa ha ma jjügi: Anyiza na no kadinyu tsathangwa tsü siya nu sengho asakhenwa sadha;

²⁷ whu, no pi kuwhuchan wi whu nan nu mbhi mtsü muyadha;

²⁸ gishüzighe, no kadinyuwa tsü gishüzighe pi Mede nu Persia nyithu cüdha.”

²⁹ Belshazzar na kaghajila ma maghathu wi kadi gwomejuwa kaghazu nmiepheü kesa tsüpi Daniel pvü thsü, nu kenyuwakü suna tsanzüli tsüpi ma meyan thsülo kesa ahza khuchia. Nu ma Daniel pi kadinyu wi kekhang kesen kechengwa sa thsüa.

³⁰ Tsü ghaja na Babilon Kadimiwa Belshazzar pathia;

³¹ nu Mede nyi Dariya na tsü tsüwi amapi achentugho nu keni sa keben wi kadi kekhangwa tsü pegheya.