DANIEL 4 - Kemethajüh (N) (Re-editing) Bible (BSI)

Nebukhadnezzar Man Keniwa

¹ Kadimi Nebukhadnezzar na ketsijüh ha kesun pi ayyi wi mizzatentithu, anyi nu ajühjja kepapa kesathu wi chi: “Shalom!

² Kemisintsa Anyiza na amankesa nu qhecüshaghe kesa pi hi keccüca cüki kezhü ha kina chilo.

³ “Anyiza na amankesa pi ithu ccüca kechithu tsüna khatila di nu! Ma qhecüshaghe kesa kekuli tsüna khatila khang nu! Anyiza na anuphan kadimiwa; ma matsü tsüdi wila kekhang senden.

⁴ “Hi kadijjen wi cca hang, mehai kayi kesa wi inonkwen keben.

⁵ Isala aman kesü na hi pateqhe nu hi jenkeben wi qhethiketen kemanthi mu.

⁶ Hi Babilon wi kadimi sansichüthu tsüdi ssinu hi wi gho nu mathu na iman tsü jjügi mangwa khe pi hi kiza thsüle kesa ahza khuchi.

⁷ Tsaseng wi atusencüki kekhithu, demathu, avü kesenthu, nu atsanen kechüthu ssinu gho, nu hi iman tsüpi mathu kiza, isala mathu na tsü khimetha pi hi kiza meyala.

⁸ Tsaseng wi Daniel na gho. (Ma pi icenpvüwa nyan Belteshazzar lela ciden.) Acenpvüthu kemetha ghamu na ma miwi ben, tsalina hi mankeya tsüpi ma kiza. Hi ma wi khi:

⁹ Belteshazzar, atusencüki kekhithu kediwa, acenpvüthu kemetha ghamu nmiwi ben, nu no kekuthithu tsüdila chüshiyaten kesa hi chüben. Hawa ha iman. Tsü ma jjügi na mangwa khe pi hi kizalo.

¹⁰ “Hi jenkeben wi kemanthi wina ayyi mnon wi achanton ketikesie kesü mu.

¹¹ Tsüna shigü wa atssan npi kecu chu tisiekayi nu ayyi wi anyi tsüdila tsü muya kemehai sa.

¹² Ma wathu na atsimehai ntsawa, nu ma bi na husha pila ayyi mabenla kedsa qo sa. aghangsathu na ma kekhwen wi mnan, awathu na ma cünathu wi aghacen sa, nu kahangli keben tsüdi ma bi tsü dsa.

¹³ “Hi kemanthi tsü cüki meshen keben wi tangwi nyilo kesü na meghe-metsa nu kekaketsü sa dugho keten mu.

¹⁴ Ma ahhai misi ntsa sa jisha chi, ‘Achanton tsü shüchi nu ma cünathu kitsenlo; ma wathu mahang nu ma bi pi vvüzighelo. Ma cakhu aghangsathu nu ma cünathu wi awathu tsü jügü pilo.

¹⁵ Isala ma chonhi tsü amighe nu lezza pi keji pi ayyi wi thenglo. Tsüpi ciwi aghangthu jawi teshilo. “ ‘Khili akejan ya anyi hawa miwi ca dugho thsü, nu ma ya aghangsathu gweghe aghangthu jawi hang wa thsülo.

¹⁶ Kepaghenanye ma amapi tagü anyi leben npvüla aghangsa leben pvü wa ben.

¹⁷ Hawa hana meghe-metsa nu kekaketsü kesa nyilowa na südhekechi. Isanu kahe wi anyi tsüdila Kekhang ntsawa Anyiza na anyi kadinyuthu miwi kekhang ben nu ma tsüthu khupi ma kessikeya anyithu jawi nyu ma chükhang nketenthu kesü le kesü lela cüya kemehai benle kesa chüya thsüle kesalina.’

¹⁸ Kadimi Nebukhadnezzar na khi, “Hawa ha iman le. Tsalina Belteshazzar, tsü ma jjügi mangwa khe pi hi kizalo. Kadimi sansichüthu kesüla pi hi kiza meya ladha, isala no tsü khiya mehai, kepaghenanye acenpvüthu kemetha ghamu na nmiwi ben.”

Daniel na Amanwa tsü khimetha Kechi

¹⁹ Ha tsüwi Daniel pi Belteshazzar lela ciketenwa na messi pi mangla khi meya. Kadimiwa na ma wi khi, “Belteshazzar, aman nu tsü ketsijüh ya no patemessi thsü nsala.” Belteshazzar na luneng, “Njenkeben Kadimiwa, nman nu ma jjügi tsüna nghinyithu ghena sa thsüthu khe nghena nsa thsü lalo kheshülan.

²⁰ Achanton tsüna sie ntsawa gila atssan cu nu ayyi wi anyi tsüdila tsü muya mehai.

²¹ Ma wathu na atsimehai ntsawa, nu ma bi na ayyi mabenla kedsa qo na ben. Aghangsathu na ma cakhu wi mnan, nu awathu ma cünathu wi mathu ghacen sa.

²² “Njenkeben Kadimiwa, no achanton kesie nu kezüwa tsü le. No di ntsa wala atssan la cu, nu no kekhang na wala ayyi mabenla cuben.

²³ Njenkeben Kadimiwa na ghang keben wi tangwi nyilo kesü na dugho nu khi, ‘Achanton tsü shüchi nu tsü yasalo, isala ma chonhiwa tsü teshi pi ayyi wi chilo. amighe nu lezza pi tsü kejiya, nu tsüpi ciwi aghangthu jawi teshilo. Akejan ya anyi hawa miwi ca dugho thsülo, nu ma ya aghangsathu gweghe amapi tagü hang wa thsülo.’

²⁴ “Njenkeben Kadimiwa, hawa ha ma jjügi tsüle, nu hawa ha Kemisintsa Anyiza na nmiwi kuliten le khishikechiwa tsü.

²⁵ Anyithu zilashü wina no jügüshi pi wala aghangsathu gweghe hangwa thsüaben. No amesü süpon kesü ti amapi tagü aghang maha dsa nu agheja wi jen nu ciwi akejan na nmiwi cakiden. Tsaseng wi no Kekhang ntsawa Anyiza na anyi kadinyuthu miwi kekhang sen, nu ma tsüthu pi ma thowa kessiya khe cüya mehai le kesa chüya den.

²⁶ Nyilowa na ma chonhi tsüpi ayyi wi teshilo ahza khuchi. Ha jjügi no Anyiza na ayyi tsüdi wi kekhang sen tenle kesa chükeya wi no kadimiwa sa neng yaben.

²⁷ Tsalina Njenkeben Kadimiwa, hi kekhi ha nieyalo. Kesami nsalayi, mangwa meshon khe tsü saya, nu ketha-uthu nantizenya. Isathu no mehaikayi neng yaden.”

²⁸ Hathu ha tsüdila Kadimi Nebukhadnezzar miwi sa.

²⁹ Asha tagha keni ketan sa keben wi ma Babilon wi ma kadijjen miwi kegoe keten wi

³⁰ ma khi, “Babilon na khacula di khe ghangchilo! Hi tsü sapi hi ghazen nyunutiwa sa nu hi kekhang nu kezü, inyankethang nu iyenkeben pi ccücale kesa ghena sale.”

³¹ Ajühthu na ma pang wina npi shhughola, tang wina ahhai kesü na khi, “Kadimi Nebukhadnezzar, hi khi kebenwa ha kinalo! Khili no wina no kadi kekhangwa tsü sen bvüdha.

³² Anyithu zilashü wina no jügüshiaben, aghangsathu gweghe hang, nu amapi tagü amesü süpon kesü ti aghangthu maha dsa ben. Tsaseng wi no Kemisintsa Anyiza na anyi kadinyuthu miwi kekhang senben, nu ma tsüthu pi ma thowa kessiya khe cüya kemehai benle kesa chüyaben.”

³³ Ajühthu tsüna wan sacen ghoa. Anyithu zilashü wina Nebukhadnezzar jügüshi pi amesü süpon kesü ti aghang maha dsa wa thsüa. Akejan na ma gwo miwi caki nu ma ssen na shigü pi amumuthu kenye ti sie nu ma mezzen na awa mezzen ti sa.

Nebukhadnezzar na Anyiza Keseng

³⁴ Kadimiwa na khi, “Amapi tagü na wa kesa seng wi hi tang wi yaki ghangchi nan, hi pala jjügi chüshiya. Hi Kemisintsa Anyiza seng nu kekinyikü nu anyankethang pi anuphan hang ketenwa cü. ‘Ma anuphan kekhang senden, nu ma kadinyu na matsü tsüdila benden.

³⁵ Ma ayyi wi anyithu ha ghang pi mangla nkenye ti sa, tang wi nyilothu nu ayyi wi anyithu na ma kekhang kekhu wi ben. Thola ma kenenwa tsü matang nyelela ma mangwa saten khe keüya nben.

³⁶ “Hi pala jjügi chüshi keya seng wi hi kenyuwakü, ijenkebenwa, nu hi kadinyu nyankethangwa tsüpi hi cü neng. Ikekhu wi kedithu nu anyi kemechanthu na anonkeghe sala hi ssiya, nu hi kadi kekhang hatu miwi la kenyuwakü pi hi cü neng .

³⁷ “Nu khilitsü, hi Nebukhadnezzar na tang wi Kadimiwa seng, kinyikü, nu ma nyanthang benle. Ma kuliketen tsüdila tsatan nu meshon, nu ma anyi thowa na kapvüshüsha kuliten khe zansha cüya mehai.”