DANIEL 2 - Kemethajüh (N) (Re-editing) Bible (BSI)

Nebukhadnezzar Man

¹ Nebukhadnezzar na kadimiwa sakeya amapi keniwa wi ma aman kesü mu. Tsü man pi ma pakivvü mtsü nu ma jen meya la,

² tsalina ma tusencüki kekhithu, kedemathu, avü kesenthu, nu atsanen kechüthu ya amanwa tsü khimetha pi ma kizalo cichi. Mathu na gho kadimiwa tuwi ngan keya wi

³ ma mathu wi khi, “Hi aman kesü man pi hi pakivvü yadha. Tsüna ma jjügi mangwa khe hi chüya mvuben.”

⁴ Mathu na Aramaik jüh wina kadimiwa lunengchi, “Njenkeben Kadimiwa ya anuphan kahangwa sa! Nman tsüpi ikhang kizalo, isathu ikhang na tsü khimetha pi no kiza na.”

⁵ Kadimiwa na mathu wi khi, “Hi nthu ya iman pi hi kiza nu tsüna mangwa khiben khe pi hi nkizathu yishü le kesa meshen yadha. Nthu na tsü khi meya lethu, hi nthu ccükwen zandhi-zanghe nu nthu jjenthu yasa pi abhon saacü den.

⁶ Isala nthu na iman nu ma jjügi la pi hi kiza lethu, aju nu kenyuwakü keti pi nthu kutimen sa cüden. Tsalina khili imanwa tsüna mangwa nu tsü jjügi mangwa khe pi hi kizalo.”

⁷ Mathu na kadimiwa luneng chi, “Njenkeben Kadimiwa na aman tsü pi ikhang kiza lethu, ikhang na tsü khimetha cüben.”

⁸ Ciwi kadimiwa na khi, “Hi meshen keben ti sadha! Nthu na matsü ssan pi siele saben, kepaghenanye nthu na hi ileben wi meshen kebenwa tsü mudha,

⁹ tsüna nthu na amanwa khe tsü jjügi pi hi nkiza lethu, hi kemeten makesü kesa pi nthu tsüdi cüden. Nthu na pala kemiliaben le kenondi ghena milikemesa khipi hi kizale kesa nthu jawi ajüh cenyadha. Iman tsüpi hi kizalo, isalethu nthu na ma jjügi la pi hi kizaben le kesa hi chüyaben.”

¹⁰ Sansichüthu na luneng, “Ayyi miwi meshu kesüla Njenkeben Kadimiwa na mangwa chüya mvuben khe pi kizaya nben. Kadimi kesüla, nu ayyi wi kedi ntsa nu kekhang ntsawa lela ma tusencüki kekhithu, kedemathu, nu atsanen kechüthu wi ma ghena hati npi khie.

¹¹ Njenkeben Kadimiwa na keü kebenwa tsüna dhu mtsü, acenpvüthu nkenye tsü thola tsü saya nben, isala mathu na anyi jawi hang nten.”

¹² Tsü tsüwi kadimiwa na aghepvü ntsa saya nu Babilon wi kadijjen wi sansichüthu tsüdila pathilo kesa ahza khuchia.

¹³ Tsalina mathu tsüdi pi Daniel nu ma pvüshangthu saghula pathilo ahza khuchia.

Anyiza na Aman Tsüwa Jjügi pi Daniel Keccüca

¹⁴ Tsaseng wi Daniel na kadimiwa ghikehiethu miwi kediwa Ariok, anyi kepathi ghena salo ahza pi cü kethengwa wi tsü wa. Kidenkishala ma jüh kessiya,

¹⁵ ma Ariok wi mangkesa na kadimiwa na ahza nkemehai tsüti kesa zhüshi chi nu kesa keü. Tsalina Ariok na mangwa khati sadha khe pi Daniel kiza.

¹⁶ Daniel na aman jjügiwa tsüpi kadimiwa kiza le kesa ghena wan wala kadimiwa wi matsü pahan khie nengya.

¹⁷ Tsaseng wi Daniel na ajjen wi wha nu ma pvüshang Hananiya, Mishael, nu Azariya wi mangwa sadha khe pi mathu kiza.

¹⁸ Ma mathu wi mathu pi Babilon wi kadimi sansichü kepathu gweghe npathi thsüle kesa ghena tangwi kebenwa Anyiza wi nanketizen nu kekuthi jjügi khimetha pi mathu kizalo kesa khielo pi mathu kiza.

¹⁹ Tsü ghaja kekuthi jjügi tsüpi kemanthi wina pi Daniel ccüca, nu ma tangwi kebenwa Anyiza seng:

²⁰ “Anyiza na metsa nu khang ntsawa le! Anuphan nu anuphanla ma seng.

²¹ Ma matsü nu kese keyeng tsü ghan sen benden; ma kadimithu pi sa thsü nu nsa thsü laden; ma kemetsa nu chüshikeya khuchi ketenwa.

²² Ma ajjügi kedhu nu kekuthi pi ccücaden; ma kejang wi kuthi ketheng tsü chüben, nu kewegü na ma vüshakhiben.

²³ Hi no seng nu no kinyikü benle, ibamyithu Nyiza. No kemetsa nu kezü pi hi cüdha; no hi kekhie yacü nu mangwa pi kadimiwa kizaten khe pi ikhang ccücadha.”

Daniel na Aman Jjügi pi Kadimiwa Kekiza

²⁴ Tsalina Daniel na kadimiwa na kadi sansichüthu pi pathilo ahza pi cü kethengwa Ariok wi wa. Daniel na ma wi khi, “Mathu pi nshü thsü lalo. Hi ssisen kadimiwa wi walo, isathu hi ma man jjügi tsüna mangwa khe khipi ma kizaden.”

²⁵ Ariok na shishi Daniel ssinu Kadimiwa Nebukhadnezzar tuwi wa nu kadimiwa kiza, “Hi Judah kushinyi kesü, Njenkeben Kadimiwa man jjügi khipi no kizaya kemehai muyadha.”

²⁶ Kadimiwa na Daniel (Belteshazzar lela khi ketenwa) wi khi, “No hi mangwa man nu tsü jjügi na mangwa khe pi hi kizaya mehai la?”

²⁷ Daniel na luneng, “Njenkeben Kadimiwa, kedema, tusencüki kechü, nyelela atsanen kechü kesüla tsüpi no kiza keya nmi.

²⁸ Isala tangwi kekuthi pi ccüca keten Anyiza kesü na benle. Ma ghaketen wi mangwa saben khe pi Njenkeben Kadimiwa kizadha. Hi khili no jenkeben wi kemanthi kemu amanwa tsü khipi no kizaden.

²⁹ “Njenkeben Kadimiwa na jenkeben wi no ghaketen wi cüki manya; nu Anyiza, kekuthi jjügi pi ccüca ketenwa tsüna mangwa saaten khe pi no ccücadha.

³⁰ Kekuthi hawa pi hi keccüca ha hi anyi kepa miwi metsaki kesa ghena nye, isala Njenkeben Kadimiwa na nman jjügi tsü chü nu no wi kegho kemeshenwa tsü chüshiya thsüle kesalina.”

³¹ Njenkeben Kadimiwa, no kemanthi witsü atsiketon küca kesü, kizali nu wegü keben, nu ghang pi qhethiketen kesa ntuwi ngan keben muya.

³² Ma li na suna kemehai ntsa; ma deshi nu ma hacüthu na rükatssü; ma geshi nu ma qanku na lezza;

³³ ma ccü na amighe nu ma ccümpha na pahan amighe nu pahan apfüyyi pi satheng.

³⁴ No tsü ghang keben wi alonshi shoni wi alon keti kesü na thola tsü npa lela qanca dugho atsiketonwa ccü amighe nu apfüyyi tsü kecen nu tsüthu pacha zighea.

³⁵ Isanu kutitan na amighe, apfüyyi, lezza, rükatssü, suna tsüna pacha zighe nu mazu wi aniegi kesü wi asugwen ti sa. Ameghü na mangla pi nthengla mo pi bvüa. Isala alonwa tsüna dikayi pi ayikha sa nu ayyi maben whengbhon.

³⁶ “Hawa ha amanwa tsü. Nu hi khili tsüna ma jjügi mangwa khe khipi Njenkeben Kadimiwa kiza den.

³⁷ Njenkeben Kadimiwa, no kadimi tsüdi miwi kedi ntsawa. Tangwi kebenwa Anyiza na no sapi kadimiwa sa thsü, nu kekhang, kezü nu kenyuwakü pi no cüdha.

³⁸ Ma no sapi ayyi miwi hangkeben anyi, aghangsa, nu awathu tsüdi miwi kekhang kesenwa sa thsü. No atsiketon li wi suna pi sa kethen tsüle.

³⁹ Nseng wi kadimiwa kepa wi kesü no kedi cu nkesa na benden, nu tsaseng wi kechengwa, lezza ti kesa kadimi kesü ben nu ayyi maben wila kekhang senben.

⁴⁰ Nu tsaseng wi kadimi mejüwa, amighe kekhang ti kesa kesü ben nu pala tsüdi pakhhi nu pachazigheaden. Nu amighe pi pala tsüdi pacha keten ti tsüna ntuwi kadimithu tsüdi pakhhi nu pachazigheaben.

⁴¹ No accümpha nu ma zanzzathu pahan na amighe nu pahan na apfüyyi tsüti kesa la mu. Tsü ma jjügi na kadinyu gishüzighe kesa. Tsüna amighe kezü ti kesa pahan benden, kepaghenanye ciwi amighe nu apfüyyi pi saghutheng.

⁴² Accü zanzzathu pahan na amighe nu pahan na apfüyyi, tsüna ma jjügi kadinyu pahanwa na zü nu tsü pahan na zü nten.

⁴³ No amighe pi apfüyyi saghu ketheng la mu. Tsü ma jjügi kadinyu tsüwa wi kekhang kesenthu na keyali kesa wina mathu theghithu saghule kidenden, isala mathu na amighe pi apfüyyi kuwenghu nkeya tsü miwi mangla saya nben.

⁴⁴ Kekhang kesen tsüthu tsüwi tangwi kebenwa Anyiza na kadinyu asakhen sa nketen kesü sayaben. Tsüwa tsüna nyu khiela nkaya nben, isala kadinyu kepathu tsüdila yasatha sa nu tsüwa tsüna anuphanla benden.

⁴⁵ No alon kesü anyi thola tsü npa lela alonshi wina qanca dugho khati amighe, lezza, apfüyyi, rükatssü nu suna pi kesa atsiketonwa tsü kecencha khe tsü mu. Kekhang ntsawa Anyiza na haseng wi mangwa saaben khe pi Njenkeben Kadimiwa kizaben. Hi no mangwa manya khe tsü khiti pi no kiza, nu tsü ma jjügi pi no cüdha.”

Kadimiwa na Akutimen pi Daniel Kecü

⁴⁶ Isanan Kadimiwa Nebukhadnezzar na ayyi wi nkhwendu nu ahhansha nu kekinyithu sapi Daniel cülo ahza khuchia.

⁴⁷ Kadimiwa na khi, “N-Nyiza hana acenpvü tsüdi miwi kedi ntsawa, kadimithu miwi Apvüwa, nu kekuthithu pi ccüca ketenwa tsü le. Hi ha chüben, kepaghenanye no kekuthi jjügi ha khimetha chi cüdha.”

⁴⁸ Tsaseng wi ma kenyuwakü pen kesü pi Daniel cüa, aju kemehai kejon pi ma cü, ma pi Babilon yyi kehiewa sa, nu ma pi kadimi sansichü tsüdi miwi aliwa sa thsüa.

⁴⁹ Daniel kekhie ghena kadimiwa na Shadrak, Meshak, nu Abednego hathu pi Babilon kadinyu kenoncca wi kedithu sa thsüa; isala Daniel tsü kadijjen wi ben wa.