DANIEL 12 - Kemethajüh (N) (Re-editing) Bible (BSI)

Asakhen Tsüwa

¹ Tangnyilo linenthsü mphi ketenwa na khi, “Tsü tsüwi nyilo kediwa Mikhael, n-nyithu ghihie ketenwa na shhughoden. Tsaseng wi matsü nkemehai ntsa, mizzatentithu na ben keshagha seng wi npi kegho kesü na ghoden. Tsü tsüwa na ghothu, mizzatentiwa wi anyan pi Anyiza lesüshen wi zhü kethengthu tsüdila hangsha yaden.

² Shükea nyi kejonla hangneng-shagha den; pahan na anuphan kahang wi anonghe den, nu pahan na anuphan kejüghekeya wi ketizen sa waben.

³ Ccülikesa kemetsathu na tang wi kewegü tsüti sa nu wegü benden. Nu anyi kejon sansi pi kemeshonwa sa keyathu na anuphan ghotsithu ti wegü benden.”

⁴ Ma hi wi khi, “Nu Daniel, no lesüshenwa ha llubhon nu kemechan jen pi ayyi sakhen kecu thenglo. Tsü tsüwi anyi kejonla matsü kejon dedi nu mangwa saben khe chüshiyale kidenben.”

⁵ Tsaseng wi hi meshu keni na aghaku katen ghapeli wi kesüsü ngan keben mu.

⁶ Manyi kesü na tsü kewha wi akuza meiwa ngan kebenwa tsü keüchi, “Amankesa tsü hawa hana khathu bennu asakhen sa ben nu?”

⁷ Nyilowa na ma kwen keni zanki pi atssan wi chi nu anuphanla benketen Anyiza nyan wina kekishen keti kesü sa. Ma hati khi keben hi zaya, “Tsüna amapi kecheng nu pahan saaden. Anyiza nyithu kemeten-kemesha tsüwa na centhu, pala hathu tsüdi sacen ben.”

⁸ Hi ma kekhi zaya, isala hi tsü chüshi meya. Tsalina hi keü, “Isala kediwa, ha tsüdi khatinu asakhen saaten nu?”

⁹ Ma lunengchi, “Daniel, no khili bvü yilo, kepaghenanye asakhenwa npi kegho chu ajüh hathu ha kuthi pi tsanqai theng na.

¹⁰ Anyi kejon sametha yaden. Gheshighenathu na chüshiya nben, isala gheshighena kekuli tsü saben den; metsa ketenthu ketan na chüshi yaben.”

¹¹ “Atsathangla hhanshakesa khenkea tsü wina gho Mankesa Qhethiketen tsü kecu aghanan 1290 sacen shaben.

¹² Aghanan 1335 kecu ajühtsentsa saben keyathu na kemihhi ntsa!

¹³ “Nu Daniel, no leben tsentsa sa sen wa asakhen cuyalo. Tsaseng wi no shüaben, isala no asakhen wi hangshaya nu nkutimen muyaben.”