CCÜCAKECHI 6 - Kemethajüh (N) (Re-editing) Bible (BSI)

Mechantsithu

¹ Tsaseng wi hi Khaghanenizzawa na mechantsi tagü ja wi atuwa shachi kesa mu, nu ciwi hangben keten ghangsathu mejü wi kesü na ahhai misikhhali tutuwa kekhou hhai ti “Gholo” kekhi hi zaya.

² Hi ghangchi nan ciwi goru kemiki kesü mu. Tsü miwi kebenwa na alamugho kesü ben, nu kadiliwen pi ma cü theng. Ma khangkeyawa nu khangyale wa.

³ Tsaseng wi Khaghanenizzawa na mechantsi keniwa tsü shachi, nu hi hangben keten ghangsa keniwa na “Gholo” kekhi hi zaya.

⁴ Ciwi goru kenmie kesü na shhugho. Tsü miwi kebenwa na aghikesa sengho ayyi wi chi nu anyithu ya kepathili thsüle kesa kekhang pi cü theng. Njünnu keti kesü pi ma cü theng.

⁵ Tsaseng wi Khaghanenizzawa na mechantsi kechengwa tsü shachi; nu hangben keten ghangsa kechengwa na “Gholo” kekhi hi zaya. Hi ghangchi nan ciwi goru kenimegho kesü mu. Tsü miwi kebenwa na ma kwen wi kuwhuchan kesü ben.

⁶ Hangben keten ghangsathu mejü ja wi ahhai kesü hati khi keben hi zaya, “Awheng kuwhu kesü na ghanan kesü kutimen, nu achentha kuwhu kecheng na ghanan kesü kutimen. Isala oliv tonthu nu kemeshentsse lli tsü meyasa lalo!”

⁷ Tsaseng wi Khaghanenizzawa na mechantsi mejüwa tsü shachi; nu hangben keten ghangsa mejüwa na “Gholo” kekhi hi zaya.

⁸ Hi ghangchi nan ciwi goru phalagha kesa kesü ben. Tsü miwi kebenwa nyan na Keshü, nu Keshü yyi na ma seng wi den. Tsüthu yala aghikesa, azeng, kesakinaa, nu aghangsathu sen nu ayyi gishü mejü sa nu kesü pathi thsüale kekhang pi cü theng.

⁹ Tsaseng wi Khaghanenizzawa na mechantsi mangawa tsü shachi. Ciwi hi kekinyipen kekhu wi Anyiza jüh khi nu mathu sheikepi wi atsentsa kesa ghena pathi kesa ghamuthu mu.

¹⁰ Mathu ahhai misikhhali jisha, “Apvüwa kekhangkedi ntsawa, metha nu atsentsa le! No khathansha wi ayyi nyithu na ithu kepathi ghena mathu jühkaghaten nu meten cüten nu?”

¹¹ Agwomejuwa kaghazu kemiki pi mathu kesüsü cü theng, nu mathu yala mathu gweghe amaghathu sa keten nu mathu cünyuthu la mathu ti npi pathi cen keya chu ben lalo kiza.

¹² Tsaseng wi hi Khaghanenizzawa na mechantsi tughowa tsü sha kechi mu. Ciwi ameghükuju ntsa sa, aghani na athsü kenimegho ti sa, nu asha na ajjü ti nmieni sa.

¹³ Ameghü kekhang na khhaghabvüton mo kuli kechi wi ma bi kemejjü kekishu ti ghotsithu na ayyi wi qanca.

¹⁴ Atssan na kezhüllu ti llu sen nu bvüa, nu ayikha nu ayyi-mangkehi tsüdi apen ketsen shan.

¹⁵ Tsaseng wi ayyi wi kadimithu, kekhang kesenthu nu süpahi kedithu, keban nu kekhangthu, nu anyi kepathu tsüdi, nssümagha nu ahvuthu, tsüdi mathu ketanla wa ayikha wi ayyiku nu alon keti cakhu wi kuthi.

¹⁶ Mathu na ayikha nu alon ketithu ci nu khi, “Ithu miwi qanca dugho nu kadipen miwi donki kebenwa nyon kemu nu Khaghanenizzawa lebenketsu wi ithu pi kuthi cülo!

¹⁷ Manyi lebenkekha tsathang nkemehai tsüna ghodha, nu thowa na ciwi ngan benya mehai nu?”