CCÜCAKECHI 4 - Kemethajüh (N) (Re-editing) Bible (BSI)

Tang wi Kekinyikesa

¹ Hi ha tsü wi kemanthi kepa wi kesü wina tang wi ajenka kesü sha ketheng muya. Hi hatu wi zakeya tutuwa kekhou hhai ti kesa tsüna hi wi khi, “He wi kugholo, hi ha seng wi kuli keten pi no ccücaden.”

² Aghamu na wan imiwi benya. Tang wi kadipen kesü miwi anyi kesü na donkiben.

³ Ma mmi na alon menkedhu jasper nu karnelian ti wegüben; nu ccünikho kesü emerald tsi ti kesa na kadipen tsü vüben.

⁴ Kadipenwa tsü vü keben kepa wi kadipenthu ngwe nu mejü na ben; tsüthu miwi keshenpfüthu ngwe nu mejü na athsü kemiki mphi nu suna kadiliwen pvü nu donkiben.

⁵ Kadipenwa wina atsancwe, atsankeshigü nu atsanphagha na shhugho. Kadipenwa tu wi anni kecanki tagü na qheben, tsüthu tsüna Anyiza ghamuthu tagü.

⁶ Kadipenwa tu wi atssükedone ayena, akhwetssü methasi kesa ti la ben. Kadipen tsü kevü wi hangben keten aghangsa anyon pi atu nu aseng wi pong pvü keten mejü na vüben.

⁷ Aghangsa atuwa na ssensitemi ti, keniwa na amesü süpon ti, kechengwa mmi na anyi mmi ti, nu mejüwa amumu pighe keten ti kesa.

⁸ Hangben keten ghangsathu mejü, kesüsü wi agisha tugho na ben, nu anyon pi tsüthu pong pvüden. Tsüthu na tsathang tsajang khiela n-nganla hati khiden: “Kemetha, kemetha, kemetha, tsüna Apvüwa Anyiza kekhangkedi ntsawa, ma khili kebenwa, kheni na ketenwa, nu ha seng wi gho ketenwa.

⁹ Hangben keten ghangsathu mejü na keseng, nyankethang nu kinyikü khwi sa pi kadipen miwi donki keben anuphan nu anuphanla hangben ketenwa tsü cüben. Tsüthu na tsüti sa gweghe tsü,

¹⁰ keshenpfüthu ngwe nu mejü na kadipen wi donki kebenwa tu wi kukedu, nu anuphan nu anuphanla hangben ketenwa tsü kinyiden. Mathu mathu kadiliwen pi kadipen tu wi cüchi nu khi,

¹¹ “Ithu Pvüwa nu Anyiza! No anyankethang, kinyikü, nu kekhang muya qo le! Kepaghenanye no pala tsüdila sahangchi, nu no kemeshen kenen wina mathu ya hang nu kahang khuchi thsüden.”