CCÜCAKECHI 22 - Kemethajüh (N) (Re-editing) Bible (BSI)

¹ Tangnyilowa na kahangtssü ghaku na Anyiza nu Khaghanenizzawa kadipen wina akhwetssü ti lle shhugho

² nu llesen anyunutiwa lentonti non wi du keben la pi hi ccüca. Aghaku tsü katen ghapeli wi kahang chanton na ben, tsüna amapi kesü wi taghakeni tughu, asha kesü wi kuti ma bi bünden; nu ma wathu tsü pi mizzatentithu kesakinaa sa pi mehai cüden.

³ Anyunutiwa wi mangla sanu Anyiza kishen-keshi muya nben. Anyiza nu Khaghanenizzawa kadipen na anyunutiwa wi ben, nu ciwi ma maghathu na ma kinyiben.

⁴ Mathu na ma mmi muyaben, nu ma nyan pi mathu tie wi zhüki pvüben.

⁵ Ciwi aghaja nmila ben, nu mathu na ahula nyelela aghani kewegü nsenla mehai, kepaghenanye Apvüwa Anyiza na mathu kewegüwa saden, nu mathu na anuphan nu anuphanla kadimithu sala kekhang senben.

⁶ Tsaseng wi tangnyilowa na hi kiza, “Ajüh hathu ha atsentsa nu nondi qo le! Apvüwa Anyiza, ma Ghamu pi atusenjüh-kechüthu kecüwa na ma nyilo kesunchi pi pala wan sacen keten tsü pi ma maghathu ccüca thsüben.”

⁷ Jisu khiben, “kinalo! Hi wan gho tendha! Lesüshen ha wi atusenjüh- kekhithu tsü nie ketenthu na kemihhi ntsa le!”

⁸ Hi, Johan pala hathu tsüdi zaya nu muyadha. Nu hi khathansha wi tsüthu zaya nu mu cenya khe, hi nyilo pala hathu pi hi keccücawa ccü wi khulidua, nu hi ma kinyi le sa wa.

⁹ Isala ma hi wi kiza, “Tsüti nsa lalo! Hi la no nu ncünyu atusenjüh-kechüthu nu lesüshen ha wi ajühthu nie ketenthu tsüdi ti kesa amagha kesü. Anyiza kinyilo!”

¹⁰ Isanu ma hi wi khi, “Lesüshen ha wi atusenjüh-kekhithu tsü pi nkuthi lalo, kepaghenanye hathu ha tsüdi sale kesa matsü na tetsakidha.

¹¹ Anyi thowa na nmehai khe ma ya nkemehai saben thsü, nu thowa na ntsatan khe ma ya nketsatan saben thsülo. Isala anyi thowa na mehaiben khe ma ya kemehaiwa saben thsü, nu thowa na methaben khe ma ya metha benya thsülo.”

¹² Jisu khiben, “kinalo! Hi wan gho tendha! Hi ikutimen sen nu hi gweghe ghoden, pi anyi kesüsü ma kekuli kenie wina cüden.

¹³ Hi Alfa nu Omega, atuwa nu asengwa, adechhüwa nu asakhen ntsawa.”

¹⁴ Anyi mathu thsümeni satemethaya kesathu na kemihhi ntsa, kepaghenanye mathu na anyunutiwa jenkathu wi dushhuya nu kahang chan bi tsü dsaya kemehai ben.

¹⁵ Isala anyunuti na ameiwa kebenthu na khapeghe-khajathu, kedemathu, keqhezathu, nyu kepathithu, atsikezhü kekinyithu, nu ajüh wi le kekuli wi lela milikemesathu.

¹⁶ “Hi, Jisu, hi nyilo kesunchi pi kemehuthu wina pala hathu pi nthu kiza thsü. Hi David shicü wina gho. Hi aghanen ghotsi kewegüwa.”

¹⁷ Aghamu nu shanyiliwa na khiben, “Gholo!” Ha za keyathu tsüdila khiben, “Gholo!” Kesü le kesü lela dighe kebenwa, Gholo; kesü le kesü lela tsü yamvu kebenwa kekila wi kahang tssü tsü yayalo.

Ajühsakhen

¹⁸ Hi, Johan, lesüshen ha wi atusenjüh-kekhi jühthu tsü za keyathu tsüdi kitsan chiben: keujüla anyi kesüla pala pi tsüthu wwa lethu, lesüshen ha wi adhaghathu zhü ketheng ti Anyiza na pi ma kemeten-kemesha wi wwa cüben.

¹⁹ Nu keujüla anyi kesüla lesüshen ha wi atusenjüh-kekhi jühthu sen bvü lethu, lesüshen ha wi zhü ketheng Kemetha Nyunutiwa nu kahang chan bi wi tsü Anyiza na ma sheiwa tsü khusen bvüaben.

²⁰ Hathu ha tsüdi wi ma sheikepi jühkhukechiwa na khiben, “Ntsakhiwa le! Hi wan gho tendha!” Tsüti sa thsülo. Apvüwa Jisu, Gholo!

²¹ Apvüwa Jisu nanketizen ya anyi tsüdi ssiben ketenwa salo.