CCÜCAKECHI 21 - Kemethajüh (N) (Re-editing) Bible (BSI)

Atssan nu Ayyi Ketheü

¹ Tsaseng wi hi atssan nu ayyi ketheü kesü mu. Atssan nu ayyi kaghawenwa tsüna bvüdha, nu atssükedone la nmiladha.

² Nu hi Kemetha Nyunutiwa, Jerusalem ketheüwa tsüna tang wi Anyiza wina dugho keten mu, tsüna shanyili kesü na ma thsümeni kiden-kesha pvü nu ma wubawa metu le keben ti kesa.

³ Hi kadipen wi ahhai misikhhali kesü hati khi keben zaya, “Khili Anyiza jjen na anyithu ja wi ben le! Ma mathu ssinu hangden, nu mathu na ma nyithu saden. Anyiza na ma ketanla mathu ssi benden, nu ma mathu Nyiza saden.

⁴ Anyiza na mathu nyontssü tsüdi nyen cüben. Ciwi keshü, ahathakina, kiqai, nyelela kinaa nmidha. Pala kaghawenthu tsü nmiladha.”

⁵ Tsaseng wi kadipen wi donki kebenwa na khi, “Hi khili pala tsüdila sa pi ketheü sadha!” Ma hi wi hati la khi, “Ha zhüyalo, kepaghenanye ajüh hathu ha atsentsa nu nondi qo le!”

⁶ Nu ma khi, “Tsü sacendha le! Hi Alfa nu Omega, atuwa nu asengwa, adechhüwa nu asakhenwa. Kesü le kesü lela dighe kebenwa hi kekila wina kahang tssü pi jjüya thsüden.

⁷ Anyi kesü le kesü lela khangkeyawa hi wi ha muyaben: Hi ma Nyiza saben, nu ma itsa saben.

⁸ Isala ashukukenengthu, nyu kematsathu, nyu yasa ketenthu, nyu kepathithu, keqhezathu, dema ketenthu, atsikezhü kinyi ketenthu, nu milikemesathu tsüdi — mathu pen tsüna anni lon mecang keben annighajü tsü, tsüna keshü keniwa.”

Jerusalem ketheüwa

⁹ Tangnyilothu tagü ja wi kesü ahikhu tagü wi adhagha sakhenthu tagü pi chisen ketenwa na hi wi gho nu khi, “Ghalo, hi shanyiliwa, Khaghanenizzawa wubvü tsü pi no ccüca na.”

¹⁰ Aghamu na dugho imiwi benya, tangnyilowa na hi ssinu ayikha kemisi ntsa kesü miwi ki. Ma Jerusalem, Kemetha Nyunutiwa, tsü tang wi Anyiza wina dugho keten

¹¹ nu Anyiza nyankethang wegü keben pi hi ccüca. Anyunutiwa tsüna alon menkedhu ti wegü, jasper nu akhwetssü kemina ti kesa.

¹² Tsüna akhweti keti nu misi ntsa, ajenka taghakeni ben, nu tangnyilo taghakeni na ajenkathu tsü hieben. Ajenkathu miwi tsü Israel nyithu mizza taghakeni nyan pi zhüki theng.

¹³ Ciwi ajenka kecheng na apen kesüsü wi ben: kecheng na nishuwa, kecheng na acülawa, kecheng na aghawa, nu kecheng na niduwa.

¹⁴ Anyunutiwa khweti tsüna alon donbvü taghakeni miwi sa theng, tsüthu miwi Khaghanenizzawa apostelthu taghakeni nyan pi zhüki theng.

¹⁵ Tangnyilo hi ccüneng kebenwa kwen wi suna khhatssü kekitegüji kesü sen nu anyunuti, ajenkathu, nu ma khweti kitegü le saben.

¹⁶ Anyunutiwa tsüna ma ketikesie meceqe. Tangnyilowa na ma khhatssü pi anyunutiwa tsü kitegü: tsüna ma keti nu kesie na 2,400 kilometer sabenla.

¹⁷ Tangnyilowa na akhweti tsü la kitegü, tsüna ma kemisi meter achentugho tsüna ma sen keten kekitegüji tsü kenie wina i.

¹⁸ Akhweti tsüna jasper pi sa theng, nu anyunutiwa tsüna suna kemetha pi sa pi ayena ti methasi ben.

¹⁹ Anyunuti khweti lon donbvüthu tsüna alon menkedhu kepapa kesa pi ma tsisa theng. Alon donbvü atuwa tsüna jasper, keniwa na safir, kechengwa na agat, mejüwa na emerald,

²⁰ mangawa na onix, tughowa na karnelian, tagüwa na quartz kehichu, tazenwa na beril, tuguwa na topaz, taghawa na khalkedoni, taghakhenwa na turquois, taghakeniwa na amethist.

²¹ Ajenkathu taghakeni tsüna mejüti taghakeni; ajenka kesüsü wi mejüti ben kesü pi sa theng. Anyunutiwa lentonti tsüna suna kemetha ntsa pi sa pi ayena ti saben.

²² Hi ciwi kekinyijjen kesüla nmu, kepaghenanye kekinyijjenwa tsüna Kemisintsawa Apvüwa Anyiza nu Khaghaneni zzawa tsü.

²³ Anyunutiwa tsüna aghani nu asha kewegü nsenla mehai, kepaghenanye Anyiza nyankethang na ciwi wegü, nu Khaghanenizzawa na ahula saben.

²⁴ Ayyi wi anyithu na tsü kewegü wi kugoe, nu ayyi wi kadimithu na mathu keben-keyeng sen nu ciwi ghoben.

²⁵ Anyunutiwa jenkathu tsüna ghanan thangthangla sha pi theng, khiela tsüthu khen nben, kepaghenanye ciwi aghaja nmila ben.

²⁶ Mizzatentithu keti nu keben-keyeng tsü sen nu anyunutiwa wi tsü ghoben.

²⁷ Isala nkemetha mangla, nyelela nkemejüghe kekulithu, nyelela milikemesa kekhithu kesüla anyunutiwa wi tsü duya nben. Khaghanenizzawa kahang lesüshen wi ma nyan zhü kethengthu ketan na anyunutiwa wi tsü duyaben.