CCÜCAKECHI 20 - Kemethajüh (N) (Re-editing) Bible (BSI)

Amapi Hazar Kesü

¹ Tsaseng wi hi tangnyilo kesü na ayyiku kedhuwa shakhen tsü nu amighe ssüli keti kesü sen nu tang wina dugho keten mu.

² Ma kemanthisa, alamyi maghang— Atsaghang nyelela Satan— tsü ghan pi amapi hazar kesü ghena bhen pi theng.

³ Tangnyilowa na ma ghan pi ayyiku kedhu wi khalachia, shakhen pi khen, nu jenbhon pia, isanu ma yala amapi hazar kesü tsü npi kecen chu mizzatentithu tsü nmechu neng thsüle kesalina. Tsaseng wi matsü keujü ghena ketan ma lisha chiben.

⁴ Tsaseng wi kadipenthu, nu tsüthu miwi donki kebenthu ya nyu jühkaghaten ya kemehai kekhang pi cü ketheng mu. Nu hi Jisu pi ccücakechi nu Anyiza jühtsentsawa tsü pi kekhi ghena nyu mathu pathi kesa ghamuthu la mu. Mathu na aghangsawa tsü nu ma tsikezhü la nkinyi, nyelela mathu na tsü zensu tsü pi mathu tie nyelela mathu kwen wi lela njen pvü. Mathu na kahang wi gho Khrista gweghe amapi hazar kesü kadimi sala kadi sa.

⁵ (Amapi hazar kesü tsü npi kecen chu keshü kepathu na hangneng nshagha.) Hawa ha keshü wina hang keshagha atuwa.

⁶ Keshü wi hang keshagha atuwa ha wi kebenthu na anonkeghe nu kemihhi ntsathu. Keshü keniwa na mathu miwi kekhang nmidha; mathu na Anyiza nu Khrista keqhaikedithu saben, nu mathu na ma gweghe amapi hazar kesü kadi saben.

Satan Chakeya

⁷ Amapi hazar kesü tsü kecen seng wi atssüzü kesa wina Satan tsü lishü chiaben,

⁸ nu ma wala ayyi maben wi bvüzighe keben mizzatentithu mechuben, tsüna Gog nu Megog. Satan na mathu tsüdi saghu sengho ji pi atssükedone ghüsa wi ahachan yyi ti ssigho aghi saden.

⁹ Mathu na ayyi miwi bvüzighe wa Anyiza nyithu kemnanpen nu ma kaghali nyunutiwa tsü vüya. Isala tang wina anni na dugho mathu mecang.

¹⁰ Tsaseng wi Atsaghang, mathu mechu ketenwa tsü pi aghangsawa nu milikemesa tusenjüh-kechüwa pi khalachi ketheng anni lon mecang keben annighajü wi tsü khalachia; mathu ciwi ghaja ghanan anuphan nu anuphanla ketizen sa benden.

Ajühkaghaten Sakhenwa

¹¹ Tsaseng wi hi kadipen kemiki kesü nu meshu kesü tsü miwi donki keben mu. Atssan nu ayyi na ma tu wi na bvüa nu nmula.

¹² Nu hi keshü nyi kizza le keti lela tsüdi kadipen tu wi ngan keben mu. Lesüshenthu shi pi theng, nu lesüshen kepawa la tsüna kahang lesüshen shi pi ketheng mu. Lesüshenthu wi zhü ketheng ti keshü nyithu tsü kekuli kenie wina mathu jühkaghaten.

¹³ Atssükedone na keshü teshichia. Keshü nu keshü yyi la keshüthu ciwi keben tsü teshichia. Nu mathu tsüdi pi mathu kekuli kenie wina mathu jühkaghaten.

¹⁴ Tsaseng wi keshü nu keshü yyi tsü pi annighajü wi khalachia. (annighajü hawa ha keshü keniwa.)

¹⁵ Anyi kesü le kesü lela kahang lesüshen wi ma nyan zhü ketheng nkemuwa pi annighajü wi khalachia.