CCÜCAKECHI 19 - Kemethajüh (N) (Re-editing) Bible (BSI)

¹ Hi ha seng wi tang wi anyitenti keti hhai hati kekhi zaya, “Halleluya! Hangshakeya, anyankethang, kekhang na ithu Nyiza ji le!

² Ma jühkekaghaten na atsentsa nu ketsatan! Ma nza keqheza menkedsawa na ma keqheza nkemehai pi ayyi pasa ketenwa tsü meshensadha. Anyiza na ma meten-mesha cüdha, kepaghenanye nzawa na ma maghathu pathi le!”

³ Mathu na kheneng jisha, “Halleluya! Anyunuti ketiwa kemecang nikhu na anuphan nu anuphanla khuben!”

⁴ Keshenpfüthu ngwe nu mejü nu hangben keten aghangsathu mejü na kukedu Anyiza ma kadipen wi donki kebenwa tsü kinyi. Mathu na khi, “Amen! Halleluya!”

Khaghanenizzawa Keshanyi Kemishu

⁵ Tsaseng wi kadipen wi ahhai kesü na hati khi, “Ithu Nyiza senglo, ma maghathu nu anyithu tsüdi, kedi le kizza lela ma kinyikü ketenthu!”

⁶ Tsaseng wi hi anyitenti keti, atssüketi, nu atsankeshigü hhai ti kesa zaya. Tsüthu na hati khiben, “Halleluya! Kepaghenanye Apvüwa, ithu Nyiza Kemisintsawa tsüna Kadimiwa le!

⁷ Ithu anonghe nu nong nalo; ithu ma kediwa tsü seng nalo! Khaghanenizzawa ghena keshanyi tsüna ghodha, nu ma shanyiliwa na kiden pvüyadha.

⁸ Linen kewegü, kemetha pi ma mphi thsütheng.” (Linen tsüna Anyiza nyithu kekuli kemehai).

⁹ Tsaseng wi tangnyilowa na hi kiza, “Ha zhüyalo: Khaghanenizzawa keshanyi wi qhechi kethengthu na kemihhi ntsa.” Tangnyilowa na khineng, “Hathu hana Anyiza jühtsentsa.”

¹⁰ Hi ma ccü wi qancadu ma kinyile sa, isala ma hi wi khi, “Tsüti nsa lalo, hi la no nu ncünyuthu, Jisu pi ccücakechi atsentsawa tsü ghansen ketenthu tsüdi ti kesa amagha kesü le. Anyiza kinyilo!” Kepaghenanye Jisu pi ccücakechi atsentsawa tsüna atusenjüh-kechüthu kechüchiden.

Goru Kemiki miwi Donkikebenwa

¹¹ Tsaseng wi atssan shachi nu hi goru kemiki kesü ciwi keben mu. Tsü miwi kebenwa tsüna Jühtsentsawa nu Atsentsawa le khiden; ma ketsatan sen nu ajühkaghaten nu aghisaden.

¹² Ma nyon na anni keqhe ti kesa, nu ma li wi kadiliwen kejon pvüden. Ma anyan ma ketan khe thola ma jjügi nkechü kesü pi ma miwi zhüki pvüden.

¹³ Ma agwomejuwa kaghazu pvü keten tsüna ajjü pi pong pvüden. Ma nyan na “Anyiza jüh.”

¹⁴ Tang wi süpahizi na linen thsümeni kemetha kemiki pvü nu goru kemikithu miwi donki nu ma nieden.

¹⁵ Ma pang wi njünnu kedighe kesü shhugho, nu ma tsü sen nu mizzatentithu chayaden. Ma amighe khhatssü kesü sen nu mathu miwi kekhang sen, nu ma Kemisintsawa Anyiza leben ketsu kisengtssü kimisügüpen wi kisengtssü tsü cücha cüben.

¹⁶ Ma gwomejuwa kaghazu nu ma phede miwi anyan pi zhüki pvü keten na: “kadimithu miwi Kadimiwa nu apvüwathu miwi Apvüwa.”

¹⁷ Tsaseng wi hi tangnyilo kesü na aghani miwi ngan keben mu. Ma ahhai misikhhali jisha pi atssan wi pighe keten awathu tsüdi wi kiza, “Tsüdila ghola Anyiza kemishu keti wi tsü saghu yalo!

¹⁸ Ghola kadimithu, süpahi kedithu nu süpahithu, goruthu nu tsü miwi kebenthu, anyithu tsüdi, nssümagha nu ahvu, kedi nu kizza sa tsü dsalo!”

¹⁹ Tsaseng wi hi ayyi wi aghangsawa tsü nu kadimithu, nu mathu süpahizithu na saghu nu goru miwi donki kebenwa nu ma süpahizi tsü sisale keben mu.

²⁰ Aghangsawa tsü nu ma tu wi amankesathu kuli kesa milikemesa tusenjüh-kechüwa tsü manyi gweghe pi atssüzü sa thsüa. (Ma amankesa tsüthu pi aghangsawa zensu pvü nu ma tsikezhü kinyi ketenthu tsü mechua.) Aghangsa tsü nu milikemesa tusenjüh- kechüwa manyi qho kahang ghan pi anni ghajü anni lon pi mecang keben wi tsü khalachia.

²¹ Goru miwi donki kebenwa pang wina njünnu keshhugho tsü pi mathu süpahithu süthia; nu awathu tsüdila mathu sa tsü dsaya kemehai chu dsa.