CCÜCAKECHI 17 - Kemethajüh (N) (Re-editing) Bible (BSI)

Keqheza menkedsa Nyankemechanwa

¹ Tsaseng wi tangnyilo tagü ja wi kesü ma kwen wi ahikhu tagü sen ketenwa hi wi gho nu khi, “Ghalo, hi aghaku kejon kete wi anyunuti sa ketheng, nza keqheza menkedsawa tsü khati meten cüten khe pi no ccücaden.

² Ayyi wi kadimithu na ma ssinu keqheza nkemehai sa, nu ayyi wi anyithu na ma keqheza nkemehai kisengtssü tsü jjü pi adinadha.”

³ Aghamu na imiwi dugho, nu tangnyilowa na hi pienu ayyikeshü kesü wi wa. Ciwi hi aghangsa kenmie kesü ma miwi Anyiza kethen nyan zhüki pvü nu nza kesü na ma miwi donki keben mu; aghangsawa tsüna ma li tagü nu ma ghacü tagha ben.

⁴ Nzawa tsüna athsü nmiepheü mphi, nu suna alon menkedhu, mejüti hathu pi ma ghe sa pvü den, Ma kwen wi suna hyi kesü wi ma keqheza nkemehai ghena nankiqanan nu nkemetha pi pongti senden.

⁵ Ma tie wi anyan jjügi kekuthi kesü pi zhüki pvüden: “Babilon ketiwa, ayyi wi keqheza menkedsa nu nankiqanan tsüdi jjawa.”

⁶ Nu hi nzawa tsüna Anyiza nyithu jjü nu Jisu jühkeya ghena nyu mathu pathi kesathu jjü tsü jjü pvü nu ma dina keben mu. Hi ma mukeya wi imansa ntsa sa.

⁷ Tangnyilowa na hi wi keü, “Mangkesa na nmansa ben nu? Hi nzawa nu aghangsa ma li tagü nu ma ghacü tagha keben nu ma pvü ketenwa jjügi kekuthi tsü pi no kizaden.

⁸ Aghangsawa tsüna kheni kuti hang le, isani khili tsü nmiladha; tsüna ayyiku kedhu wina shhugho le bendha nu yasa le kesa ghena bvüaben. Anyi ayyi wi hang kebenthu ayyi npi sahangkechi wina mathu nyan pi kahang lesüshen wi zhü nkeyathu na aghangsawa tsü ghang pi amansa ben. Tsüna kheni hang nu khili tsü nmiladha; isala tsüna shhugho neng ben.

⁹ “Hawa ha kemetsa nu chüshikeya ciben. Nzawa na ma miwi donki keben alithu tagü tsüna yyishiphon tagü. Tsüthu na kadimithu tagü la;

¹⁰ manga na qancadha, kesü khili kekhang senben, nu kepawa kesü tsüna npi gho; ma gho lethu, ma matsü keu ketan kekhang senben.

¹¹ Nu aghangsa kheni hang, isala khili nmila kesawa tsüna kadimi tazenwa, isani tagü ja wi kesü nu yasa le kesa ghena bvüaben.”

¹² “No aghacüthu tagha kemu tsüna kadimithu tagha, mathu na kekhang npi sen shhu, isala kekhang pi mathu cü nu mathu na kadimithu sala aghangsa tsü gweghe amighe kekihhe kesü jü ghena kekhang senben.

¹³ Kadimithu tagha tsüdila mathu kemeshen kesütan, mathu kekhang nu kekhang keben tsü pi aghangsa tsü cü.

¹⁴ Mathu na Khaghanenizzawa ssinu kaghashen ben, isala Khaghanenizzawa na ma ci keyathu, kessi keyathu, nu jühtsentsa sa ma nie ketenthu ssinu mathu chaya ben, kepaghenanye ma apvüwathu miwi Apvüwa nu kadimithu miwi Kadimiwa.”

¹⁵ Tangnyilowa la hi wi kiza, “No atssü miwi donki keben keqheza menkedsa nzawa kemu tsüna mizzatentithu, anyithu, ashicüthu, nu ajühjjathu.

¹⁶ No aghacüthu tagha kemu, nu aghangsa tsüna keqheza menkedsawa nanmeghü ben; mathu na ma keben tsüdi senbvü nu ma kimissü sa thsüaben; mathu na ma sa dsa nu anni pi ma yasa ben.

¹⁷ Kepaghenanye Anyiza na ma kemeshenwa tsü sa thsüle kesa ghena mathu gweghe kuli nu mathu kekhang pi aghangsa tsü cü nu Anyiza jüh tsü npi kesacen chu kekhang sen thsüle sa theng.”

¹⁸ “No kemu nzawa tsüna anyunuti ketiwa ayyi wi kadimithu miwi kekhang sen kebenwa tsü.”