CCÜCAKECHI 12 - Kemethajüh (N) (Re-editing) Bible (BSI)

Nzawa nu Kemanthisa

¹ Tsaseng wi atssan wi amankesa kesü shhugho. Ciwi nza kesü na aghani khu mphi, asha pi ma ccü cakhu wi sa, nu kadiliwen wi ghotsithu tagha keni keben pi ma li wen pvüden.

² Ma atsa-npvü keten tsü wan pvügha le ben, ma pvügha le ketizen kesa nu kinaa ghena magha shagha.

³ Amankesa kepa wi la kesü atssan wi shhugho. Ciwi kemanthisa keti kenmie kesü na ma li tagü ma aghacü tagha, nu ma li tagü tsüdi wi kadiliwen pvü den.

⁴ Ma ma ghanu pi atssan wi ghotsithu gishü kecheng sa nu kesü zansha pi ayyi wi chia. Ma nzawa na atsa pvüghachi meyi tsü meyiale kesalina nzawa tu wi ngan.

⁵ Nzawa na npvüza kesü pvüghaya, nu ma amighe khhatssü sen nu mizzatenti tsüdi miwi kekhang senden. Isala atsawa tsü ssinu Anyiza nu ma kadipen wi kia.

⁶ Nzawa na bvü sen nu Anyiza na ma ghena apen kesü kiden ketheng ayyikeshü wi tsü wa, ciwi ghanan 1260 nyu ma noncca yaben.

⁷ Tsaseng wi tang wi aghisa shagha. Mikhael nu ma nyilothu na kemanthisa ssinu kesali, nu kemanthisawa la ma nyilothu ssinu tsü ssikaghashen.

⁸ Isala kemanthisa na khang meyala, tsalina ma nu ma nyilothu la tang wi nben thsüla.

⁹ Kemanthisa ketiwa tsü jügüshi pia — tsüna alamyi maghang pi Atsaghang, nyelela Satan le ci, ayyi maben mechu kesawa tsü. Ma pi ma nyilothu gweghe jügüsha pi ayyi wi chia.

¹⁰ Tsaseng wi tang wi ahhai misikhhali kesü khi keben zaya, “Khili Anyiza wi hangshakeya ghodha! Anyiza na khili ma Kadimi kekhang pi ccüca chidha! Khili ma Khrista kekhang pi ccüca chidha! Kepaghenanye Anyiza tu wi ngan nu tsathang tsajang ithu cünyuthu metsimeni ketenwa tsü tang wina jügüshidha.

¹¹ Ithu cünyuthu na Khaghanenizzawa jjü nu mathu atsentsawa sheikepi ghena ma miwi khang yadha; nu mathu na mathu kahang khuchi nu shü mvu kesalina.

¹² Tsalina nthu atssan nu ciwi hang kebenthu anonghe yalo! Isala ayyi nu atssükedone ghena tsü khatila qhethiketen saden nu! Kepaghenanye Atsaghang na nthu wi dughodha, nu ma leben minu ben, kepaghenanye ma ma ghena matsü keu ketan ben kesa chüben.”

¹³ Kemanthisa na ma jügüsha pi ayyi wi chidha kesa chü keya wi ma atsa kesü pvügha kecü nzawa tsü meten-mesha le sa shagha.

¹⁴ Nzawa na ma pen ayyikeshü wi tsü pighe wa thsüale kesalina amumu keti gisha keni pi ma cü theng, ma ciwi kemanthisa tu wi yazishu amapi kecheng nu gishüpahan nyu ma noncca yaben.

¹⁵ Tsaseng wi nzawa tsü llepie bvü thsüale kesalina kemanthisa na ma pang wi atssüketi ya lle shhugho thsü.

¹⁶ Isala ayyiwa na nzawa kiqa nu ma pang ka pi kemanthisa pang wi atssü lle keshhugho tsü tsenya.

¹⁷ Tsaseng wi kemanthisa na nzawa miwi lebentsu nu ma shicü kepathu, Anyiza yenkhukechi kina ketenthu nu Jisu na pi ccüca kechi wi jühtsentsa sa ketenthu tsüdi ssikaghashenle bvüa.

¹⁸ Nu kemanthisa na atssükedone ghüsa wi ngan.