CCÜCAKECHI 1 - Kemethajüh (N) (Re-editing) Bible (BSI)

¹ Lesüshen hana Jisu Khrista pi ccücakechi cüki zhü theng. Pala hathu ha wan sacen keten Anyiza na pi ma maghathu ccücalo pi ma cü; Khrista na tangnyilo kesun pi ma maghawa Johan wi chi nu tsü chüya thsü,

² Johan na ma kemu tsüdi pi kizachidha. Hana Anyiza wina kegho ketsijüh nu Jisu Khrista na pi ccücakechi atsentsawa cüki ma khi kechi.

³ Atusenjüh-kekhi jühthu ha misikhhali sishi ketenwa kemihhi ntsa, nu ha wi zhü kethengthu tsü kina nu nie ketenthu na kemihhi ntsa, kepaghenanye pala hathu tsüdi sacen gho keten matsü na tetsakidha.

Kemehu Tagü wi Shalom Sa kechi

⁴ Johan na zhü pi Asia yyi wi Kemehuthu Tagü kecü: Khili kebenwa, kheni na ketenwa, nu ha seng wi gho ketenwa, nu aghamu tagü ma kadipen tu wi ben ketenthu,

⁵ nu Jisu Khrista, atsentsa chüzawa, keshü ja wi atuwa pvügha keyawa, nu ayyi wi kadimithu tsüdi miwi kekhang sen ketenwa wina nanketizen nu kecca ya nthu ssiben keyawa salo. Ithu nantizen nu ahhansha sa keshü ghena ma jjü pi ithu kesami wina ithu hangsha keyawa,

⁶ nu ithu pi keqhaikedithu kadiyyi sa thsü, nu ma Nyiza Abawa kekuli sa thsü kesawa ya anuphan anyankethang nu kekhang sen keyawa salo, Amen.

⁷ Ghangchilo! Ma akulukeshü miwi na ghoden. Anyi kesüsü tsüdi nu apie pi ma kekicunthu la ma mu shanden. Ayyi wi keben amizza tsüdila ma ghena qaiben. Ntsakhiwa tsüti saben. Amen.

⁸ Apvüwa Anyiza, khili kebenwa, kheni na ketenwa, nu ha seng wi gho ketenwa, Kekhangkedi ntsawa na khiben, “Hi Alfa nu Omega.”

Kemanthi wi Khrista Kemu

⁹ Hi, nthu cünyuwa Johan, Jisu wina nthu gweghe kemeten-kemesha nu kadiyyi wi ben nu kethankehila kekheneng benden. Anyiza jüh nu Jisu cüki pi kekhi ghena hi ghan pi Patmos ayyi-mangkehi wi chia.

¹⁰ Apvüwa tsathang wi hi aghamu wi keben wi iseng wi tutuwa kekhou hhai ti kesa misikhhali kesü zaya

¹¹ tsüna khi, “No kemuthu tsü pi lesüshen kesü wi zhüya nu pi kemehu tagü hathu cülo: Efesa, Smirna, Pergamum, Thiatira, Sardi, Filadelfia, nu Laodikea.”

¹² Hi iseng wi hi ccüneng kebenwa tsü ghangchi le khapeghe wa nan, hi ciwi suna pi kesa ahula-kedonpenthu tagü muya,

¹³ nu tsü ja wi Anyi Tsawa ti kesa kesü na agwomejuwa kaghazu pvü nu suna deshikeqhan la pvü keten hi muya.

¹⁴ Ma lissen na asa ssen nyelela aghola kemiki ti, ma nyon na anni keqhe ti,

¹⁵ ma ccü kewegü, na lezza pi anni wi mecang nu matsisa ketheng ti, nu ma hhai na atssüketi hhai ti kesa.

¹⁶ Ma kwen ajewa wi ghotsithu tagü khusen, nu ma pang wi njünnu ghapeli ma yiyha keben na shhugho, nu ma mmi na aghanan wi aghani wegü keben ti kesa.

¹⁷ Hi ma mukeya wi ma ccü wi keshü ti qancadu. Isala ma ma kwen ajewa chang pi imiwi chi nu khi, “Nmessi lalo! Hi atuwa nu asakhenwa.

¹⁸ Hi hangben ketenwa tsü le! Hi shü, isala ghangchilo, hi anuphan nu anuphanla hangben. Hi keshü nu keshü yyi miwi kekhangben.

¹⁹ No khili pala mu keyathu tsü, khili kebenthu, nu ha seng wi sa ketenthu lela zhüyalo.

²⁰ No ikwen ajewa ghotsithu tagü keben, nu suna pi kesa ahula kedonpenthu tagü kemu tsü ma jjügi na ha: ghotsithu tagü tsüna kemehu tagü nyilothu, nu ahula kedonpenthu tagü tsüna kemehuthu tagü.