BVÜKESHHU 9 - Kemethajüh (N) (Re-editing) Bible (BSI)

Asahangthu Keshü

¹ Apvüwa na Mosa wi kiza, “Kadimiwa wi wa nu Ibri nyithu Nyiza Apvüwa na khiben le ma kizalo, ‘Inyithu ya bvü thsülo, isanu mathu ya hi kinyi thsülo.

² Keujüla no kheneng mathu ya nbvü thsü mvula hhaghe lethu

³ hi adhagha nkemehai kesun pi nsahangthu miwi chi nu no metenmesha ben — no goru, gada, sunsiesa, amesüsi, khaghaneni, nu anenithu.

⁴ Hi Israel nyithu sahang nu Ejipt nyithu sahangthu sa pi kepapa sa cüden, nu Israel nyithu sahang kesüla shü nben.

⁵ Hi Apvüwa, dhitsü wi ha sale kesa matsü ssandha.’ ”

⁶ Dhitsüwa wi Apvüwa na ma khi ketheng ti sa, nu Ejipt nyithu sahang tsüdila shü, isala Israel nyithu sahang tsü kesüla nshü.

⁷ Kadimiwa na khati mangwa sadhanu keü, nu Israel nyithu sahang tsü kesüla nshü le kesa nyu na ma kiza. Isala ma leben dhu wa nu anyithu ya nbvü thsüla.

Avünenkesa

⁸ Tsaseng wi Apvüwa na Mosa nu Aaron manyi wi kiza, “Annibhon wi ajuwen akwen pongti whayalo; Mosa na tsü sen wa kadimiwa tuwi atssan wi cügi thsülo.

⁹ Tsüthu na Ejipt yyi tsüdi wi ayyinikhu ti bvü zigheaben, nu tsüthu na apen tsüdi wi anyi nu asahangthu miwi avünen sa nu khuma shhughoaben.”

¹⁰ Tsalina manyi na ajuwen pahan khuya nu wa kadimiwa tuwi nganya; Mosa na tsüthu pi atssan wi cügi chi, nu tsüthu na anyi nu asahangthu miwi avünen sa nu khuma shhugho.

¹¹ Demathu na Mosa tuwi gho meyala, kepaghenanye mathu la Ejipt nyithu ti avünen pvüya kesalina.

¹² Isala Apvüwa na kadimiwa sapi ma leben dhu wa thsü, nu Apvüwa na khi ketheng ti kadimiwa na Mosa nu Aaron manyi jüh nkinala.

Aghayikeca

¹³ Apvüwa na tsaseng wi Mosa kiza, “Ghanen wi mitu na wa kadimiwa metu nu Ibri nyithu Nyiza Apvüwa na khiben le ma kizalo, ‘Inyithu ya bvü thsülo, isanu mathu ya wa hi kinyi thsülo.

¹⁴ Hi khilitsü nkekhu wi kedithu nu n-nyithu ketan nyela no la metenmesha den, isanu no yala ayyi tsüdi wi hi ti kesa thola nmile kesa chüya thsüden.

¹⁵ Keujüla hi ikwen zanki nu adhagha pi no nu n-nyithu miwi chi cü lethu nthu yasatha sa kesa dhale.

¹⁶ Isala hi kekhang pi no ccücale kesalina no ya hang thsüben, isanu inyan kemechan ya ayyi tsüdi wila wa thsüden.

¹⁷ No khilila kinankele nu inyithu ya nbvü thsüla hhagheben.

¹⁸ Dhitsü wi hi hathansha wi Ejipt wi kheni na gho nansü kecu npi kechü aghayica ntsa gho thsüden.

¹⁹ Tsalina nsahangthu nu nlli wi no keben tsüdila pi ajjen non wi chiyalo ahza khuchi, kepaghenanye aghayica pi anyi nu asahangthu miwi chi lethu akhemi wi kebenthu tsüdila shüaben.’”

²⁰ Kadimi kekhu wi kedithu pahan na Apvüwa kekhi tsü ghena mathu messiya, nu mathu nssümaghathu nu asahangthu ssi wa ajjen non wi chiya.

²¹ Isala kepathu Apvüwa na kitsan kechi jüh tsü nkinala nu mathu nssümaghathu nu asahangthu pi akhemi wi teshi chia.

²² Tsaseng wi Apvüwa na Mosa wi kiza, “Nkwen zanki pi atssan wi chilo, isathu Ejipt yyi maben wi aghayica pi anyithu, asahangthu, nu alli wi aghanglani tsüdi miwi chiden.”

²³ Tsalina Mosa na ma khhatssü zanki pi atssan wi chi, nu Apvüwa na atsankeshigü, aghayi, nu atsanphagha kesun pi ayyi wi chi. Apvüwa na

²⁴ aghayica ntsa nu atsancwe kesun chi. Ejipt yyi tsüdi wi caghamo nkemehai ha kheni na hati kesa npi chü.

²⁵ Aghayica pi Ejipt yyi tsüdi wi pala akhemi wi keben anyithu nu asahangthu tsüdi wwala kecenthia. Aghayi na aghang nu achan tsüdi kecensa pia.

²⁶ Israel nyithu na hang keben Goshen yegu wi ketan aghayi na nkeca sa.

²⁷ Kadimiwa na Mosa nu Aaron manyi ci sengho kiza, “Matsü hawa wi hi samidha; Apvüwa na kemeshon wi ben, isala hi nu inyithu na sazzidha.

²⁸ Apvüwa wi kekhie salo! Atsanshigü nu aghayica ntsa sadha! Hi nthu ya bvü thsüaben le kesa ijühkhuchi ben, nthu na hewi nbenla mehaidha.”

²⁹ Mosa na ma kiza, “Hi anyunuti ha teshi meyi ikwen zanki nu Apvüwa wi kekhie saben. Ciwi atsan-nshigüla nu aghayi la ncalaben, isanu no ayyi hana Apvüwa jile kesa chüyaben.

³⁰ Isala no nu nkekhu wi kedithu na Apvüwa Anyiza npi messiya kesa hi chüben.”

³¹ Akhhakhi nu achenthathu yasa pia, kepaghenanye tsü tsüwi achentha na nyün, nu akhhakhi na pvühben.

³² Isala awhengsu tsü n-yasa, kepaghenanye tsüna npi nyün.

³³ Mosa na kadimiwa teshi nu anyunuti na ameiwa shhu nu ma kwen zanki nu Apvüwa wi kekhie sa. Atsankeshigü, aghayi, nu atsankegho la ngan.

³⁴ Kadimiwa na mangwa sadha khe mukeya seng wi lela ma kheneng sami wa. Ma nu ma kekhu wi kedithu na kheni ti leben dhu wa,

³⁵ nu kadimiwa na Israel nyithu ya bvü thsü nben kesa Apvüwa na Mosa wina khi ketheng ti sa.