BVÜKESHHU 7 - Kemethajüh (N) (Re-editing) Bible (BSI)

¹ Apvüwa na khi, “Hi no sapi kadimiwa Nyiza ti nu Aaron pi nghena atusenjüh-kechü ti nu ma wi ajühkhi thsüden.

² Hi no kekiza tsüdila khipi Aaron kizalo, nu ma kadimiwa wi Israel nyithu ya ma diyyiwa wina shhu thsülo kizaben.

³ Isala hi kadimiwa leben sapi dhu thsüaben, nu hi Ejipt wi amankesa kejon kuliben lela ma nshinyi jühkina nben.

⁴ Tsaseng wi hi kemeten kedhu sengho Ejipt wi chi nu ayyi ciwi na inyi Israel nyithu ssishhu aben.

⁵ Hi ikwen zanki pi Ejipt nyithu shun nu mathu diyyiwa wina Israel nyithu ssishhu lethu ciwi ccüna Ejipt nyithu na hi Apvüwa le kesa chüyaben.”

⁶ Mosa nu Aaron manyi na Apvüwa na mangwa salo khi khe tsü kuli.

⁷ Manyi ajüh pi kadimiwa wi kekhi tsü wi tsü Mosa na amapi achentazen nu Aaron na amapi achentazen nu kecheng saben.

Aaron Khhatssü

⁸ Apvüwa na Mosa nu Aaron manyi wi khi,

⁹ “Keujüla kadimiwa na nshinyi na chütha benle kesa amankesa kesü kuli chilothu Aaron na ma khhatssü pi kadimiwa tuwi cüchilo kizalo, isathu tsüna amaghang kesü ceng shaben.”

¹⁰ Tsalina Mosa nu Aaron manyi na kadimiwa tuwi wa nu Apvüwa na manyi kekiza ti sa. Aaron na ma khhatssü pi kadimiwa nu ma kekhu wi kedithu tuwi cüchi nu tsüna amaghang kesü ceng shagha.

¹¹ Tsaseng wi kadimiwa na ma nyi kemetsathu nu demathu cighu chi, nu Ejipt nyi demathu na tsü makesü sachi.

¹² Mathu na mathu khhatssü pi cüchi nu tsüthu na amaghangthu ceng shagha. Isala Aaron khhatssü na mathu ji mejia.

¹³ Apvüwa na khi ketheng ti cela kadimiwa na ma lebendhu ben wa, nu ma Mosa nu Aaron manyi jüh nkina.

Ejipt wi Adhaghathu na Kegho Ajjü

¹⁴ Tsaseng wi Apvüwa na Mosa wi kiza, “Kadimiwa na ma leben dhu ntsa nu anyithu yala nbvü thsüle hhaghe ben.

¹⁵ Tsalina aghanen ma Nil Ghaku wi wa lethu wa ciwi ma metulo. Nkhhatssü amaghang ceng kesawa tsü khuya nu wa aghüsa wi ma hieben lalo.

¹⁶ Kadimiwa wi kizalo, ‘Apvüwa, Ibri nyi Nyizawa na hi kesun pi no kiza thsüben, ma nyithu ya bvü thsülo nu mathu wa ayyikeshü wi ma kinyiya thsüle kesalina. Isala no khili kecu tsü nkina.

¹⁷ Njenkebenwa, Apvüwa na khiben ma mangwa sa chile ben khe no ciwi na ma thowa khe chüyaben. Ghangchilo, hi ikhhatssü pi aghaku tssü kihhechiten nu tsüna ajjü ceng wa shaben.

¹⁸ Anga na shü nu bighe pi Nil Ghaku na hansa ntsawa sapi Ejipt nyithu na ciwi atssü jjü meyala shaben.’ ”

¹⁹ Apvüwa na Mosa wi kiza, “Aaron ya ma khhatssü sen wa Ejipt wi aghaku, atssü lenkehhi, nu acüceng tsüdi miwi chilo kizalo. Atssü na ajjü ceng, nu ayyi tsüdi wi achankhu nu ayyikhu wi lela ajjü saaben.”

²⁰ Tsaseng wi Mosa nu Aaron manyi na Apvüwa kekhi ti sa. Kadimiwa nu ma kekhu wi kedithu tuwi na Aaron na ma khhatssü zanki pi Nil Ghaku kihhechi, nu atssü mabenla ajjü ceng wa.

²¹ Aghaku wi angathu na shü, nu tsüna bighe pi hansa kesalina Ejipt nyithu na ciwi atssü jjü meyala. Ejipt yyi tsüdi wi ajjü ketan sa.

²² Kadimi nyi demathu la gho mathu kedema wina tsü makesü sachi. Kadimiwa na khili kecu wila ma leben dhu ben, nu Apvüwa na kekhi ti ma Mosa nu Aaron manyi jühkekhi tsü hhaghe.

²³ Kadimiwa na ha lela n-ghangchila kheneng ma kadipen wi wha.

²⁴ Ejipt nyithu tsüdila Nil Ghaku ghüsa wi atssükhang chhü, kepaghenanye mathu na aghaku tssü tsü jjü meyala kesalina.

²⁵ Apvüwa na Nil Ghaku tssü kihhekechi ghanan tagü wadha.