BVÜKESHHU 40 - Kemethajüh (N) (Re-editing) Bible (BSI)

Apvüwa Ketenpen Nithsüjjen Kesha

¹ Apvüwa na Mosa kiza,

² “Asha atuwa atsathang atuwa wi Apvüwa ketenpen Nithsüjjenwa tsü salo.

³ Ayenkhukechithu Tagha ma non wi keben Cenkethenjüh Khitson tsüpi ajjen non wi chi, nu keshonthsü pi ma tuwi chiya.

⁴ Miz pie gho nu ma tsanqai pi ma miwi chi. Ahula kedonpen la pie gho ahula pi ma miwi don.

⁵ Cenkethenjüh Khitson tuwi hankedemvu pi mecangle kesalina suna pi kesa kekinyipen tsüpi chi nu Nithsüjjen wi kedulen keshonthsü tsüpi hagilo.

⁶ Mecang pi kinyile kesa ghena kekinyipen tsüpi Nithsüjjen tuwi chi.

⁷ Kwenkemetsikhu wi atssü pi chi nu pi Nithsüjjen nu kekinyipen manyi jüwi donya.

⁸ Ma kevü wi shonkevüli saya nu kedulen wi keshonthsü pi chiyalo.

⁹ “Tsaseng wi kemetha deli pi Nithsüjjen nu ma tsanqaithu tsüdi nyenya nu tsü satemetha chithu tsüna metha ben.

¹⁰ Tsaseng wi adeli pi kekinyipen nu ma tsanqaithu tsüdi nyenya nu tsü satemethatha chithu tsüna metha ben.

¹¹ Tsü makesü kwenkemetsikhu nu ma donbvüthu la satemetha chilo.

¹² “Aaron nu ma tsathu ssigho Nithsüjjen kedulen wi keccüna tssükizü thsülo.

¹³ Keqhaikedi thsümeni pi Aaron pvü thsü, adeli pi ma nyen, hati nu ma satemetha chilo, isanu ma yala keqhaikedi sala hi kekuli sa thsü.

¹⁴ Ma tsathu ssigho agwomejuwa pi mathu pvü thsülo.

¹⁵ Pi mathu ba kenyen ti adeli pi mathu la nyen cülo, isanu mathu yala keqhaikedithu saya thsülo. Adeli pi kenyenwa ha matsü ghaketen tsüdi wi mathu sapi keqhaikedithu sa thsüden.”

¹⁶ Apvüwa na kekhi ti Mosa na tsüdi saya.

¹⁷ Tsalina mathu na Ejipt keteshi mapi keniwa asha atuwa wi atsathang atuwa wi Apvüwa ketenpen Nithsüjjenwa tsü saya.

¹⁸ Mosa na ma donbvüthu pi sheng, ma chan-güthu zanki, ma kenthsü chanthu pi chi, nu ma zenza pi shengya.

¹⁹ Apvüwa na kekhi ti ma kemeju pi Nithsüjjen miwi shizigheya nu ma kemeju ameiwa pi tsü miwi chiya.

²⁰ Tsaseng wi ma alonpha keni tsü khuya nu pi Cenkethenjüh Khitson non wi chiya. Ma kepiejithu pi Khitson qeithu wi chiya nu ma keshan pi shanya.

²¹ Tsaseng wi ma Khitson tsüpi Nithsüjjen non wi chi nu keshonthsü pi hagiya. Apvüwa kekhi ti ma hati nu athsü pi Cenkethenjüh Khitson tsü shanya.

²² Ma miz pi Nithsüjjen non wi keshonthsü na ameiwa aghawa wi tsü chi,

²³ nu Apvüwa na kekhi ti amesa pi Apvüwa kecü tsüpi ma miwi chi.

²⁴ Ma ahula kedonpen pi Nithsüjjen non wi miz kejentan acülawa wi tsü chi,

²⁵ nu Apvüwa na kekhi ti ma ciwi Apvüwa tuwi na ahula tsü canki.

²⁶ Ma suna pi kesa kekinyipen tsüpi Nithsüjjen non wi keshonthsü tuwi chi,

²⁷ nu Apvüwa na kekhi ti hankedemvu pi mecang.

²⁸ Ma keshonthsü pi Nithsüjjen kedulen wi tsü hagi,

²⁹ nu ma mecang pi kekinyi ghena kekinyipen tsüpi keshonthsü tuwi chi. Apvüwa na kekhi ti ma tsü miwi mecang pi kekinyi nu asu pi kekinyi hhansha sachi.

³⁰ Ma kwenkemetsikhu wi atssü pi chi nu pi Nithsüjjen nu kekinyipen manyi jüwi donya.

³¹ Mosa, Aaron nu ma tsathu na ciwi mathu kwenmetsi nu mathu ccü bhu,

³² Apvüwa na kekhi ti khathansha wi mathu na Nithsüjjen nu kekinyipen wi du khe.

³³ Mosa na shon kevüli sapi Nithsüjjen nu kekinyipen vüya nu keshonthsü pi shon kevüli kedulen wi hagi. Tsüti ma kekuli tsüdila sacenya.

Apvüwa Ketenpen Nithsüjjen Miwi Akulukeshü

³⁴ Tsaseng wi akulukeshü na gho Nithsüjjen tsü kejiya nu Apvüwa keten kewegü na tsü pongya.

³⁵ Ha ghena Mosa na Nithsüjjen wi du meyala.

³⁶ Khathansha wi akulukeshü na Nithsüjjen teshi khe Israel nyithu na mathu kemnanpen ketsen sen nu apen kepa wi wa.

³⁷ Akulukeshü na ciwi keben chu mathu na kemnanpen nketsen.

³⁸ Mathu na kegoedeja keten chuli aghanan lethu Apvüwa na keten kulukeshü nu aghaja lethu anni keqhe na Nithsüjjen miwi keben mu.