BVÜKESHHU 4 - Kemethajüh (N) (Re-editing) Bible (BSI)

Anyiza na Amankesa Kekhang pi Mosa kecü

¹ Tsaseng wi Mosa na Apvüwa luneng, “Isala keujüla Israel nyithu na hi n-nondi nu hi mangwa khi khe nkina, nu no ituwi nghole khithu hi khati sa nu?”

² Tsalina Apvüwa na ma keü, “Nkwen wi tsü mangwa senten nu?” Ma luneng, “Akhhatssü le.”

³ Apvüwa na khi, “Tsüpi ayyi wi cüchilo.” Mosa na tsüpi ayyi wi cüchi nan tsüna amaghang kesü ceng wa, nu ma tsü tuwi na bvüa.

⁴ Apvüwa na Mosa wi khi, “Nkwen chang pi ma ghanu sonki yalo.” Tsalina Mosa na ma kwen chang pi tsü sonkiya nan tsüna kheneng akhhatssü kesü cengya.

⁵ Apvüwa na khi, “Israel nyithu na hi Apvüwa, mathu baqhaithu Nyiza, Abraham, Isak, nu Jakob Nyizawa na ntuwi ghole kesa chüshiya thsüle kesalina no hati ha salo.”

⁶ Apvüwa na kheneng Mosa wi khi, “Nkwen pi ngwomejuwa non wi chiyalo.” Mosa na tsü kina nu tsüti sa; nu ma kwen tsü khushi neng nan tsüna khuma pi aghola ti mikidhi sabenla.

⁷ Tsaseng wi Apvüwa na khi, “Kheneng nkwen pi ngwomejuwa non wi chiyalo.” Ma tsüti saya; nu ma kwen khushi nan khilitsü tsüna mehaitsü nu ma gwo kepa wi ti sabenla.

⁸ Apvüwa na khi, “Keujüla mathu no n-nondi nyelela amankesa atuwa ha nkina lethu mathu asakhenwa tsü nondi ben.

⁹ Keujüla mathu amankesa keni ha wi lela no n-nondi, nu no mangwa khi khe nkinala lethu wa Nil Ghaku wi atssü pahan ssuya nu pi ayyi wi keshu chilo. Atssü tsüna ajjü ceng shaben.”

¹⁰ Isala Mosa na khi, “Nyele, Apvüwa hi nkesun chi lalo. Hi ajüh khi kemehai nyi nye, nu no ccüneng keshagha wi lela hi tsüti npi saya. Hi imili dsaden nu ajüh ashina khi keten nyile.”

¹¹ Apvüwa na ma wi khi, “Thowa na anyi pang sachi nu? Thowa na ma sapi akhuna decu, ajühkhi meya, anyon nmu, nyelela muya thsü nu? Tsüna hi Apvüwa na nye kwe?

¹² Khili walo! Hi no kiqa pi khiya thsü, nu no mangwa nkhithu yishü khe kizaben.”

¹³ Isala Mosa na luneng, “Nyele, Apvüwa, anyi kepa wi kesun chilo.”

¹⁴ Apvüwa na Mosa miwi aghepvüya nu khi, “Ncünyuwa Levi nyi Aaron tsüna khati nu? Ma ajühkhi mehai kesa hi chüben. Ma no metule ghoden nu ma no mukeya wi ma nonghe ben.

¹⁵ No mangwa khiten khe tsü pi ma kizaya mehai. Hi nshinyi qho kiqa pi khiya thsü nu nshinyi mangwa saten khe kizaben.

¹⁶ Ma nkuti sala khipi anyithu kizaben. No Anyiza ti nu mangwa khilo khe pi ma kizaben.

¹⁷ Nkhhatssü ha khuyalo, kepaghenanye no tsü sen nu amankesa kuliben.”

Mosa na Ejipt wi Keghoneng

¹⁸ Tsaseng wi Mosa na kheneng ma myiwa Jethro wi wha nu khi, “Hi ya Ejipt wi ishilithu wi wha neng nu mathu hang benla nye khe ghangchi thsülo.” Jethro na anlo khinu Mosa wi “Kemehaiwa sa whalo” khi.

¹⁹ Mosa na Midia wi keben wi Apvüwa na ma wi kiza, “Ejipt wi wha nenglo, kepaghenanye no pathile kesathu tsüdila shüdha.”

²⁰ Tsalina Mosa na ma wubvü nu ma tsathu pi gada miwi chiya nu ssisen Ejipt wi wha, Anyiza na ma kekiza ti akhhatssü tsü la khuya.

²¹ Kheneng Apvüwa na Mosa wi kiza, “No khili Ejipt wi wha neng tendha, hi saya kemehai kekhang pi no cü ketheng tsüti kadimiwa tuwi amankesa tsüdi kuli chilo. Isala hi kadimiwa leben sapi dhu thsüaben nu ma anyithu ya bvü thsü nben.

²² No hapi ma nkizathu yishü: Hi, Apvüwa na khiben, ‘Israel ha itsa tssütsewa.

²³ Hi no kizaben, itsa ya bvü thsülo isanu ma hi kinyi thsüle kesalina, isala no tsü hhaghe. Hi khili ntsa tssütsewa pathia tendha.’”

²⁴ Ejipt wi kewalen kemnanpen kesü wi Apvüwa na Mosa metu nu ma pathiale sa.

^25-26 Isanan ma wubvü Zippora na alon ketsu kesü khuya nu pi ma tsa hyuhan, nu tsü pi Mosa ccükidhen. Ahyukahan keccüna ghena ma Mosa wi khi, “No itu wi ajjü wuba kesü le.” Tsalina Apvüwa na Mosa kahangli hangsha cüa.

²⁷ Apvüwa na Aaron wi kiza, “Ayyikeshü wi tsü wa Mosa metulo.” Tsalina ma kemetha yikha wi Mosa metule wa, nu ma Mosa metu keya wi ma kimang.

²⁸ Ciwi Mosa na Apvüwa na ma Ejipt wi wa nenglo kekiza jüh tsüdi khi pi Aaron kiza; Apvüwa na amankesa kulilo ahza pi ma cü ketheng cüki la khipi Aaron kiza.

²⁹ Tsalina Mosa nu Aaron manyi Ejipt wi wa nu Israel nyi ccülikesathu tsüdi saghuya.

³⁰ Aaron na Apvüwa na pi Mosa kekiza tsüdi khipi mathu kiza, nu Mosa na anyithu tuwi amankesa tsüdi kuli chi.

³¹ Mathu na nondiya, nu Apvüwa na mathu wi gho nu mathu gükeccü muyadha le kesa zakeya wi mathu na kukedu nu kinyi.