BVÜKESHHU 35 - Kemethajüh (N) (Re-editing) Bible (BSI)

Sabbath ghena Ayenthu

¹ Mosa na Israel nyi azitenti maben cighu chinu mathu kiza, “Nthu na ha salo kesa Apvüwa na ahza khuchitheng.

² Nthu na ghanan tugho jüwi nthu kekuli saya, isala tagü ghananwa tsü samethaya, tsüna kemnan tsathang satemetha pi hi Apvüwa wi chidha. Anyi thowa na tsü ghanan wi kekuli sa khe ma pi shü thsülo.

³ Sabbath tsathang wi nthu jjen wi anni la nsala.”

Kemetha Nithsüjjen ghena Kekinyi kesa

⁴ Mosa na Israel nyithu tsüdila kiza, “Anyiza na ahza ha khuchitheng:

⁵ Kekinyi kesü sapi Apvüwa cülo. Anyi kesü le kesü lela tsüti samvu kebenwa hathu sengho kekinyi saben: suna, rükatssü, nyelela lezza;

⁶ linen kemehai; atsena, nmiepheü, aneni ssenthsü kede;

⁷ aneni süpon hyu ghang pi nmieni sa ketheng; asahyu kemehai; akakia chan;

⁸ ahula ghena deli; kenyenji deli nu hankedemvu ghena cüdemvuthu;

⁹ keqhaikedi ntsawa deshi keqhan nu depfü kewhengthsü wi kechi ghena karnelian nu alon men kedhu kepathu.

Apvüwa Ketenpen Nithsüjjen wi Atsanqaithu

¹⁰ “Nthu jawi sapichü nyi tsüdi gho nu Apvüwa na salo ahza khukechi tsüdila salo:

¹¹ Anithsüjjen, ma kemeju nu ma kemeju ameiwa, ma dhasü nu ma chanthu, ma kenthsü, ma zenza nu ma donbvüthu,

¹² Cenkethenjüh Khitson, ma chan nu ma keshan, nu ma keshonthsü;

¹³ miz, ma chan nu ma tsanqai tsüdi; amesa pi Anyiza cü kesawa;

¹⁴ kewegü ghena ahula kedonpen nu ma tsanqai; ahula nu ma deli;

¹⁵ hankedemvu kemecang ghena kekinyipen nu ma chan; kenyenji deli; hankedemvu; Nithsüjjen jenka keshonthsü;

¹⁶ ma miwi mecang pi kinyi keten penwa, lezza pi anyagha kesa, ma chan, nu ma tsanqai tsüdi; akwenkemetsikhu nu ma kedonpen;

¹⁷ keshondhi keshonthsü, ma zenza nu ma donbvüthu; shonkevüli jenka keshonthsü;

¹⁸ Nithsüjjen kejetenji nu ma thsü nu ma shonkevüli;

¹⁹ nu keqhaikedithu na Kemetha Pen wi kekuli kesa wi kepvü thsümenithu —Aaron nu ma tsathu ghena thsümenithu kemetha.”

Anyithu na Mathu Kekinyithu Senkegho

²⁰ Israel nyithu tsüdila Mosa tuwi na bvüa,

²¹ nu tsüti samvu kebenthu tsüdila Apvüwa ketenpen Nithsüjjen sale kesa ghena kekinyi sapi Apvüwa cü. Mathu na kekinyi ghena nu keqhaikedi thsümeni kesa ghena nsenthu keyishü tsüdila sengho.

²² Tsüti samvu kebenthu npvüzale nza lela tsüdila akhwesa, akhuna thighi, kwenzza keqhan, ayanthu, suna nu alon menkedhu tsanqai tsüdi sengho satemetha pi Apvüwa wi chi.

²³ Linen kemehai; atsena, nmiepheü, nyelela ssenthsü kenmie, aneni ssenthsü kede, aneni süpon hyu ghang pi kenmie, nyelela asahyu kemehai, anyi hathu ha kebenthu tsüdila sengho.

²⁴ Anyi rükatssü nyelela lezza khuchi ya kemehaithu tsüdi mathu kekinyi sengho Apvüwa wi chi, nu akakia chan pi kekuli katsüha kesa wi senya kemehai kebenthu na tsü sengho.

²⁵ Nza ajikujuthu tsüdila mathu sa ketheng linen kemehai nan nu atsena, nmiepheü, nu ssenthsü kenmie nan sengho.

²⁶ Mathu na aneni ssen pi anan la sa.

²⁷ Accülikesathu na pi depfü kewhengthsü nu deshi keqhan miwi chile kesalina karnelian nu alon menkedhu kepathu la sengho,

²⁸ nu cüdemvuthu nu ahula ghena deli, kenyenji deli, nu hankedemvu ghena.

²⁹ Israel nyithu na tsüdila Apvüwa na Mosa wi salo kekiza kekuli tsü samvu kesalina mathu kekinyi sen nu Apvüwa wi gho.

Apvüwa Ketenpen Nithsüjjen ghena Sapichüthu

³⁰ Mosa na Israel nyithu kiza, “Apvüwa na Judah mizza wi Hur tsawa Uri tsa Bezalel kessiyadha.

³¹ Anyiza na kekhang pi ma pong cü nu sapichü, saya kemehai, nu kekuli tsikemehai tsüdila chüshikeya kekhang pi ma cüdha.

³² Sapichü ntsa nu ma tsisa, nu suna, rükatssü, nu lezza sen nu kuliya kemehai ghena;

³³ alon menkedhu ha, achan kuho ghena; nu kekuli tsikemehai tsüdila saya kemehai ghena.

³⁴ Apvüwa na sapichü cho pi nyu kepa wi sansiya kemehai pi ma nu Dan mizza wi Ahisamakh tsa Oholiab manyi cüdha.

³⁵ Ma anyonsu kepvüthu, ayakekhuchüthu, nu kedechüthu na linen kemehai; atsena, nmiepheü, ssenthsü kenmie, nu athsü kepathu deya kemehai cho tsüdi pi manyi cüdha. Manyi na kekuli tsüdi wi lela sapichü ntsa nu ayakekhuchü nyi.”