BVÜKESHHU 32 - Kemethajüh (N) (Re-editing) Bible (BSI)

Suna pi Amesü zza Süpon kezhü

¹ Anyithu na Mosa na matsü kesie ayikha wina ndugho la ciwi ben wa kesa mukeya wi mathu na saghu Aaron vüya nu ma wi khi, “Ejipt wina ithu ssi keshhughowa Mosa ha khati sadha khe nchü ladha, tsalina acenpvü sa pi ithu ssinu wa thsülo.”

² Aaron na mathu kiza, “Nthu wubvü, nthu tsa, nu nthu ngathu wi suna thighe nu kwenzza keqhanthu saghu sengho hi cülo.”

³ Tsalina anyi tsüdila mathu suna thighe nu kwenzza keqhanthu khushi sengho Aaron cü.

⁴ Ma mathu kwen wi suna tsü khuya nu pi leghuya, nu suna tsüpi amesü zza süpon kesü zhüya. Anyithu na khi, “Israel nyithu, hawa ha Ejipt wina ithu ssi keshhughowa acenpvü tsüle!”

⁵ Tsaseng wi Aaron na kekinyipen kesü sapi suna pi amesü süpon tsizhü ketheng tuwi tsü chi nu jisha, “Dhitsü wi Apvüwa kekinyi kho kesü saden.”

⁶ Dhitsüwa wi mitu na anyi pahan asahang sengho mecang pi ahhansha sa nu kepathu na kecca ghena kekinyi tsse dsa. Anyithu na donki nu dsa nu jjü, nu qheza-inamu sa wa.

⁷ Apvüwa na Mosa kiza, “Wan cülo, no Ejipt wina ssi keshhugho n-nyithu na sami nu hi meya mvuladha.

⁸ Mathu na hi mathu alen nielo kekizawa tsü teshidha; mathu na suna leghu pi amesü zza zhüya nu tsü kinyi nu ahhansha sapi tsü cü wadha. Mathu na tsüwa tsüna Ejipt wina mathu ssi keshhugho cenpvüle khiben.

⁹ Anyi hathu ha khatila leben dhu khe hi chüben.

¹⁰ Tsalina khili hi nkhenla yilo, hi mathu miwi ileben minu nu mathu yasa tendha. Isanu hi no nu nshicüthu sapi mizzatenti keti kesü sa cüden.”

¹¹ Isala Mosa na Apvüwa ma Nyiza wi keshükenen nu khi, “Apvüwa, no mangsale no kekhang nu kezü wina Ejipt wi khushi sen shhugho nu n-nyithu miwi leben minu ben nu?

¹² Mangsale Ejipt nyithu ya no n-nyithu ssi wa ayikha wi mathu pathi nu mathu yasatha sale kesalina Ejipt wina mathu ssi shhughole khi thsü nu? Leben nminu lalo; no kemeshen kemiliya nu ketizenkesa ha sengho n-nyithu miwi nchila.

¹³ Nmaghathu Abraham, Isak, nu Jakob meshen chilo; no mathu wi kishen nu hati khitheng, ‘Hi nthu shicübvüghathu sapi tang wi ghotsithu ju sa cüben, nu hi khishi kechi ayyi ha tsüdi pi nthu shicübvüghathu cüten nu mathu tsü nka pi anuphanla mathu ji sayaden’ kekhi tsü meshen chilo.”

¹⁴ Tsalina Apvüwa na ma kemeshen kemili nu ma ketizenkesa senghole khiteqhe ketheng tsüpi ma nyithu miwi nchi la.

¹⁵ Mosa na ayikha wina alonpha keni miwi ayenkhukechithu pi ghapeli qho zhü ketheng tsü sen nu cü.

¹⁶ Anyiza na ma ketanla alonpha tsü sa nu ma miwi ayenkhukechithu pi zhü theng.

¹⁷ Joshua na anyithu magha keben hhai zaya nu Mosa wi khi, “Hi kemnanpen wi aghikesa hhai zabenle!”

¹⁸ Mosa na khi, “Tsüna khangkeya hhai nye nu nyu nchala kesa kiqai hhai la nyele; tsüna akhwi kesa hhaile!”

¹⁹ Mosa na kemnanpen tetsaki whanan amesü zza süpon mu nu anyithu na kenashü kemu wi ma aghepvü ntsa sa. Ma alonpha khusen keten tsüpi ayikha ccü wi cüchi nu kecencha.

²⁰ Ma mathu na amesü zza süpon zhü ketheng tsü khuya nu pi llezighe thsüa, kechenca pi awheng saya, nu atssü pi saghu; nu ma Israel nyithu ya tsü jjü thsü.

²¹ Ma Aaron kiza, “Anyi hathu na ntuwi mangwa sa nu no mathu sapi kesami kemessi ha sa thsü nu?”

²² Aaron na luneng, “Imiwi aghepvü nsa lalo, anyi hathu ha khatila nmehai khe no chüben.

²³ Mathu na hi wi khi, ‘Ejipt wina ithu ssi keshhughowa Mosa ha khati sadha khe ikhang na nchü ladha, tsalina acenpvü kesü sapi ithu ssinu wa thsülo.’

²⁴ Hi mathu suna tsanqaithu sengho hi cülo kiza, nu tsüthu pvü ketenthu khushi sengho hi cüa. Hi tsüthu pi anni wi cüchi nan amesü zza süpon ha shhughole!”

²⁵ Mosa na Aaron na anyithu sapi ajühmeya nu mathu ghinyithu tuwi kejüphonthu sa thsü kesa muya.

²⁶ Tsalina ma kemnanpen jenka wi ngan nu jisha, “Anyi kesü le kesü lela Apvüwa wiwa sa keten nyi hewi gholo!” Levi nyi tsüdila gho ma vüya,

²⁷ nu ma mathu wi khi, “Apvüwa Israel Nyiza na nthu tsüdila njünnu khuya nu kemnanpen jenka hawa wina katsüwa wi wa nu ncünyuthu, npvüshangthu, nu njjenphanthu, pathilo kesa ahza khuchiben.”

²⁸ Levi nyithu na ajüh kina nu tsü ghanan anyi hazar kecheng-u pathia.

²⁹ Mosa na Levi nyithu wi kiza, “Nansü nthu na nthu tsathu nu cünyuthu kepathi wina nthu ketanla nthu satemetha pi Apvüwa kekuli wi keqhaikedithu sadha, tsalina Apvüwa na ma kesawegü pi nthu cüdha.”

³⁰ Dhitsüwa wi Mosa na anyithu wi kiza, “Nthu na kesami kemessi ntsa sadha. Isala hi khili kheneng ayikha wi ki Apvüwa ccünengden; hi nthu ghena kesami teshi kecü tsü muya nashe.”

³¹ Mosa na kheneng Apvüwa wi gho nu khi, “Anyi hathu na kesami kemessi ntsa sadha. Mathu na suna pi acenpvü kesü zhü nu tsü kinyidha.

³² Nchala mathu kesami teshi pi cülo; nyelethu n-nyithu nyan zhü ketheng lesüshen witsü inyan tsü nyen pilo.”

³³ Apvüwa na luneng, “Ituwi sami ketenthu hi lesüshen wi mathu nyan nyen piaben.

³⁴ Khili wa anyithu ssinu hi no kekiza pen witsü walo. Chüyalo, hi nyilo na nlentsütson ben, isala anyi hathu kesami ghena hi matsü wina mathu metenmesha cüden.”

³⁵ Tsalina Apvüwa na khuma-khujü kesun pi anyithu miwi chi, kepaghenanye mathu na Aaron kechü pi suna pi amesü zza süpon sa thsü kesalina.