BVÜKESHHU 31 - Kemethajüh (N) (Re-editing) Bible (BSI)

Apvüwa Ketenpen Nithsüjjen Ghena Sapichüthu

¹ Apvüwa na Mosa kiza,

² “Hi Judah mizza wi Hur tsawa Uri tsa Bezalel kessiyadha,

³ nu hi kekhang pi ma pong cüdha. Hi chüshikeya, sapichü, nu kekuli tsikemehai tsüdila saya kemehai kekhang pi ma cüdha,

⁴ sapichü ntsa sa ma tsisa, nu suna, rükatssü, nu lezza sen nu kuliya kemehai ghena;

⁵ alon menkedhu ha, achan kuho ghena, nu kekuli tsikemehai tsüdila saya kemehai ghena.

⁶ Hi Dan mizza wi Ahisamak tsa Oholiab ya ma gweghe kuli thsüle kessiyadha. Hi sapichü nu kekuli tsikemehai sakeya kekhang pi kepa sapichüthu la tsüdi cüdha, isanu mathu gweghe hi khi kechi tsüdila sa thsüle kesalina;

⁷ hi ketenpen Nithsüjjen, Cenkethenjüh Khitson nu ma keshan, Nithsüjjen non wi keben tsanqai tsüdi,

⁸ miz nu ciwi keben tsanqaithu, suna tsentsa pi ahula kedonpen sa ketheng nu ciwi keben tsanqaithu, hankedemvu pi kemecang ghena kekinyipen,

⁹ mecang pi kekinyipen nu ciwi keben tsüdi, kwenkemetsikhu nu ma kedonpen,

¹⁰ Aaron nu ma tsathu na keqhaikedi kekuli kesa wi sen keten thsümeni kemetha,

¹¹ kenyenji deli nu Kemetha Penwa ghena hankedemvu. Hathu ha tsüdi kesa wi hi no kekiza tsü nieti nu salo.”

Sabbath, Kemnan Tsathang

¹² Apvüwa na ahza pi Mosa cü,

¹³ nu Israel nyithu kiza thsü, “Sabbath, hi kemnan tsathang tsü nieyalo, kepaghenanye hawa ha hi Apvüwa na nthu satemetha pi inyi sayadha kesa abvüye ghaketen tsüdi wila chüya thsüle kesalina hi nu nthu jüwi azensu kesü sadha.

¹⁴ Nthu na kemnan tsathang yenwa ha n-niethu yishü, kepaghenanye hawa ha metha. Anyi thowa na tsü n-niela tsü ghanan wi kekuli sa la khe ma pi shü thsülo.

¹⁵ Nthu na ghanan tugho jüwi nthu kekuli saya, isala tagü ghanan tsüna kemnan tsathang sametha pi hi wi chidha. Anyi thowa na tsü ghanan wi kekuli sa khe ma pi shü thsülo.

¹⁶ Israel nyithu na atsathang hapi cenkethenjüh zensu sa nu nieden.

¹⁷ Hawa ha anuphanla hi nu Israel nyithu jüwi azensu kesü saden, kepaghenanye hi Apvüwa, ghanan tugho jüwi atssan nu ayyi sacen nu tagü ghanan wi nkulila mnanwa.”

¹⁸ Anyiza na Sinai Yikha wi ajühkhi pi Mosa kiza cen kesa wi Anyiza na alonpha keni miwi ayenkhukechithu zhü ketheng tsüpi ma cü.