BVÜKESHHU 30 - Kemethajüh (N) (Re-editing) Bible (BSI)

Hankedemvu Mecang pi Kekinyipen

¹ “Akakia chan pi hankedemvu mecang pi kekinyipen kesü saya.

² Tsüna ketikesie meceqe kesie sentimeter 45, kemeza sentimeter 45 salo. Ccügwen mejü wi ma ghacüthu zhüghu pi kesütan saya.

³ Suna kemetha pi ma ccügwen mejü, ma ghacüthu, nu ma shoni tsüdila mejuya, nu suna pi ma katen la vüya.

⁴ Suna pi ma kepie qei keni saya nu pi ma cakhu wi ma katen ghapeli chiya nu ma kepiechan pi chi nu pie thsüle sayalo.

⁵ Akakia chan pi kepiechan sa nu suna pi tsüthu mejuya.

⁶ Kekinyipen hapi Cenkethenjüh Khitson tuwi keshonthsü na ameiwa wi chi. Apen ciwi hi nthu metu ben.

⁷ Ghanen kaghapenla Aaron na ahula tsü noncca kegho wi ma ahankedemvu pi ciwi mecang chiben.

⁸ Ma shitawa wi ahula tsü kecanki wi la tsü makesü saben. Hankedemvu mecang pi kekinyi ha matsü ghaketen tsüdi wi la nhandhila saben.

⁹ Kekinyipen ha miwi khen keten asahang nyelela asu pi kekinyi, nu kisengtssü pi keshusha kechi kekinyi mangla nsala.

¹⁰ Amapi kesü wi Aaron na asahang pi kesami hhansha kesa jjüwa tsüpi kekinyipen ghacüthu miwi chi nu ha sakemetha keccüna saaben. Ghaketen matsü tsüdi wi amapi kaghapen hawa ha saaben. Kekinyipen hawa ha metha, nu satemetha pi hi Apvüwa wi chidha.”

Apvüwa Ketenpen Nithsüjjen Ghena Khajana

¹¹ Apvüwa na Mosa kiza,

¹² “No khathansha wi Israel nyithu nyanzhüghu khe anyi kesüsü ma kahang men pi hi cüben, isanu nyanzhüghu keben jüwi ketizenkesa na ma miwi ngho thsüle kesalina.

¹³ Anyi ma nyanzhüghuya kesathu tsüdila tsü tsüwi apisa men kenie wina nkhuchithu yishü. Anyi tsüdila hapi ma kekinyi sala pi hi ncüthu yishü.

¹⁴ Anyi ma nyanzhüghuya kesathu ma kahang mapi ngwe nu tsüna ameiwa tsüdila apisa haju tsüpi hi cüben.

¹⁵ Mathu kahang ghena apisa khukechi wi kebenwa ji nyelela ketha-uwa zeng isa nben.

¹⁶ Israel nyithu wi apisa ha saghuya nu pi hi ketenpen Nithsüjjen ghena nonccalo. Khajana hawa ha mathu kahang ghena nu hi mathu khwetenle meshen yaden.”

Lezza Pi Kwenkemetsikhukesa

¹⁷ Apvüwa na Mosa kiza,

¹⁸ “Lezza pi kwenkemetsikhu nu ma kedonpen kesü saya. Tsüpi Nithsüjjen nu kekinyipen manyi jüwi chi nu atssü pi ciwi chiya.

¹⁹ Aaron nu ma tsathu na atssü tsüpi mathu kwen metsi nu mathu ccü bhu ben,

²⁰ tsüna mathu na Nithsüjjen wi du nyelela kekinyipen wi wa atsse pi npi kekinyi tuwi. Isalethu mathu pathia nben.

²¹ Mathu nshüle kesalina mathu kwen metsi nu mathu ccü bhu nsathu yishü. Ayen hawa ha mathu nu mathu shicüthu na anuphanla nieben.”

Kenyenji Deli

²² Apvüwa na Mosa kiza,

²³ “Cüdemvu mehai ntsa — mirr tssü kilogram tugho, Sinnamon hankedemvu kilogram kecheng, kane hankedemvu kilogram kecheng,

²⁴ kassia kilogram tugho khuya (tsüdila tsü tsüwi apisa men kenie wina). Oliv deli liter mejü pi tsü wwaya,

²⁵ nu tsü saghupi hankedemvu ti kenyenji deli kemetha saya.

²⁶ Tsüpi hi ketenpen Nithsüjjen wi Cenkethenjüh kenyen wi senlo,

²⁷ miz nu ciwi tsanqai tsüdi, ahula kedonpen nu ciwi kebenthu, hankedemvu mecang pi kekinyipen,

²⁸ mecang pi kekinyipen nu ciwi keben tsanqai tsüdi, nu kwenkemetsikhu pi ma kedonpen saghula.

²⁹ Hatinu hathu ha satemetha chilo, nu tsüthu tsüdila methatha saben, nu anyile atsanqai lela tsü kekidhenwa ma kemetha kekhang ghena ketizen saben.

³⁰ Tsaseng wi adeli pi Aaron nu ma tsathu nyen pi mathu yala hi kekuli wi keqhaikedithu sa thsülo.

³¹ Israel nyithu wi khilo, ‘Ghaketen matsü tsüdi wila hi kekuli ghena kenyenji deli kemethawa ha senben.

³² Tsüpi anyi jümu ghameme miwi chi nben, nu nthu na katsüha kesaghu wila ha yen makesü sa yishü. Tsüna metha, tsalina nthu tsüpi methale nsathu yishü.

³³ Anyi thowa na katsüha wi lela hati saghu nyelela keqhaikedi nkenye miwi ha sen la khe ma pi inyile nsadha.’ ”

Hankedemvu

³⁴ Apvüwa na Mosa kiza, “Cüdemvu hathu ha meceqe khuyalo — stakte, onikha, galbanum, nu hankedemvu tsentsa.

³⁵ Tsüthu saghupi hankedemvu saya, amcü pi tsü saghu pi matsen nu metha ben thsü.

³⁶ Tsü pahan pi awheng donya, nu sen wa hi ketenpen Nithsüjjen non wi Cenkethenjüh Khitson tuwi tsü keghü chilo. Hankedemvu hawa ha methatha sadhale salo.

³⁷ Nthu kesen ghena hankedemvu katsüha kesaghu wi hati nsa lalo. Hapi ituwi pala kemetha kesü sala satemetha chidhale salo.

³⁸ Keujüla anyi kesüle kesü lela kesenji hankedemvu ghena kesaghu wi hati sa lethu ma pi inyile nsadha.”