BVÜKESHHU 28 - Kemethajüh (N) (Re-editing) Bible (BSI)

Keqhaikedithu Thsümeni

¹ “Ncünyuwa Aaron nu ma tsathu Nadab, Abihu, Eleazar, nu Ithamar cichilo. Mathu pi keqhaikedithu sala hi kekuli sa thsüle kesalina Israel nyithu jawi na mathu khuthi kepa sayalo.

² Ncünyuwa Aaron ghena keqhaikedi thsümeni saya, nu pi ma pvü thsü nu ajenben nu atsimehai thsülo.

³ Hi saya kemehai pi cü ketheng sapichüthu tsüdi cichi, nu mathu na Aaron thsümeni salo kiza, isanu ma pi keqhaikedi kesü sa nu hi kekuli kesa ghena satemetha chile kesalina.

⁴ Mathu kiza nu adeshi-keqhan, adepfü-kewheng, agwomejuwa kaghazu, ayakekhu gwomejuwa, alikeji, nu ageshi-keqhan kesüsü saya. Mathu na ncünyuwa Aaron nu ma tsathu ghena keqhaikedi thsümenithu ha sacen, isanu mathu keqhaikedithu sala hi kekuli sa thsüle kesalina.

⁵ Sapichüthu na atsena, nmiepheü, nu ssenthsü kenmie, sunali nu linen kemehai ntsathu senben.

⁶ “Mathu na atsena, nmiepheü, nu ssenthsü kenmie, sunali, nu linen kemehai ntsa, ayakhu pi matsikesa pi adepfü-kewhengthsü kesü saben.

⁷ Adepfü keni wheng pongca cü nu pi ageshi wi misüki.

⁸ Tsü makesü pi ageshi-keqhan mehaitsü degü pi adepfü-kewhengthsü wi degüki pi kesütan sa thsü.

⁹ Alon menkedhu karnelian keni khuya nu tsü miwi Jakob tsathu taghakeni nyan,

¹⁰ mathu ghanyi keqhai sala tugho nyan pi alon kesü miwi nu tugho nyan pi kepawa miwi zhüya.

¹¹ Alon miwi kezhüchü nyi kesü ssiya nu Jakob tsathu taghakeni nyan pi alon keni miwi tsü zhüya nu suna pi alon tsüthu vüya.

¹² Tsüthu pi adepfü-kewhengthsü miwi chi pi Israel mizza taghakeni mithon saya. Tsüti nu Aaron na ma depfü miwi mathu nyan kezhü tsü pvü ben; isanu hi Apvüwa, hi keshüthangla inyithu meshen benle kesalina.

¹³ Suna pi kevü keni saya,

¹⁴ nu suna kemetha pi assüli keni sapi kitaghanliya, nu tsüpi vü ketheng wi tsü misükiya.

Adeshi- keqhan

¹⁵ “Keqhaikedi ntsawa na sen nu Anyiza kemeshen chükeya wi senle kesalina adeshi-keqhan kesü saya. Tsüna adepfü-kewhengthsü kesa wi kesen tsanqai makesü senben nu ayakekhu tsüti saben.

¹⁶ Tsüna ketikesie meceqe nu shen pi keni saben, kesie sentimeter 22, nu kemeza sentimeter 22.

¹⁷ Alon menkedhu pi tsü miwi alen mejü vüya; atuwa len na rubi, topaz, nu garnet;

¹⁸ keniwa len na emerald, safir, nu diamond;

¹⁹ kechengwa len na turquois, agat, nu amethist;

²⁰ nu mejüwa len na beril, karnelian, nu jasper pi vüya. Tsüthu pi suna pi vü ketheng non wi chiya.

²¹ Alon taghakeni ha kesüsü miwi Jakob tsa kesüsü nyan zhüki pi Israel mizzathu mithon saya.

²² Kepaghenanye adeshi-keqhan tsüna suna kemetha pi assüli sapi kemejüli ben.

²³ Suna pi aqae keni sapi adeshi-keqhan ccügwen meiwa chiya,

²⁴ nu sunali keni tsüpi ma qei witsü misükiya.

²⁵ Sunali keni shi pahanwa tsüpi vü ketheng wi tsü misüki, hati nu tsüthu pi adepfü-kewhengthsü tuwa tsü chiben.

²⁶ Tsaseng wi suna qei keni sapi adeshi-keqhan ccügwen ssanwa adepfü-kewhengthsü katen nonwa wi tsü chiya.

²⁷ Kheneng suna keni sapi adepfü-kewhengthsü keni tuwa ageshi-keqhan pi mehaitsü degüghu ketheng kete miwi tsü chiya.

²⁸ Atsenali pi ageshi-keqhan qei nu adepfü-kewhengthsü qei tsü mesüghuya nu adeshi-keqhan tsü yala ageshi-keqhan miwi ben nu nkeqo thsüle kesalina.

²⁹ “Khathansha wi Aaron na Kemetha Pen wi du khe ma Israel mizzathu nyan zhü pi chi ketheng deshi-keqhan ha pvüden; isanu hi Apvüwa na keshüthangla inyithu meshen benle kesalina.

³⁰ Urim nu Thummim pi adeshi-keqhan wi chilo, isanu Aaron na hi ketenpen kemetha tuwi kegho wi tsüthu pvü thsüle kesalina. Hati kesa wi ma adeshi-keqhan ha npvüthu yishü, isanu Israel nyithu ghena hi kemeshenwa tsü chüyale kesalina.

Keqhaikedi Thsümeni Kepathu

³¹ “Adepfü-kewhengthsü wi athsü tsü mabenla ssenthsü atsena pi saben.

³² Ciwi ali keduku bhiben, nu maku tsü qae nwa thsüle kesalina jekevüliya.

^33-34 Ssanwa katen kevü tsüdi wi suna pi ahhibvü, atsena, nmiepheü, nu ssenthsü kenmie sapi keshaphegheli la chiben.

³⁵ Aaron na keqhaikedi kekuli kesa wi ma athsü ha pvüben. Ma khathansha wi hi ketenpen Kemetha Pen wi gho nyelela tsü teshi bvü khe amighe tsü keshigüli hhai zaya lethu ma npathi thsüle kesalina.

³⁶ “Suna kemetha pi aghe kesü cühya nu tsü miwi ‘Satemetha pi Apvüwa cüdha’ tsüti zhükiya.

³⁷ Tsüpi alikejithsü atuwa wi atsenali kesü pila misükiya.

³⁸ Aaron na tsüpi ma tie wi chi pvü, isanu hi Apvüwa, Israel nyithu na hi kekinyi wi pahan sazziben lela hi mathu kekinyi tsüdi yacüle kesalina.

³⁹ “Linen kemehai pi Aaron gwomejuwa de, alikejithsü sa, nu ayakhu pi matsi sala ageshi- keqhan kesü la salo.

⁴⁰ “Aaron tsathu sapi ajenben, atsimehai thsüle kesalina agwo mejuwa, ageshi-keqhan, nu aliwenthu sayalo.

⁴¹ Athsümeni hathu pi ncünyuwa Aaron nu ma tsathu pvü thsülo. Tsaseng wi oliv deli pi nyen nu mathu satemetha chi, isanu mathu na keqhaikedithu sala hi kekuli sa thsüle kesalina.

⁴² Mathu ghena patono kenqhanwa cüla akhhu kecu sapi cü, isanu mathu gwo pi nyu nmu thsüle kesalina.

⁴³ Aaron nu ma tsathu na hi ketenpen Nithsüjjen wi dule nyelela kekinyipen tetsaki wa Kemetha Pen wi keqhaikedi kekuli sa lela keshüthangla tsüthu tsü pvüben, isanu mathu gwo pi nyu kemu thsü ghena mathu npathi thsüle kesalina. Hawa ha Aaron nu ma tsathu ghena anuphan yen kesü saben.”