BVÜKESHHU 26 - Kemethajüh (N) (Re-editing) Bible (BSI)

Apvüwa Na Ketenpen Nithsüjjen

¹ “Kemetha nithsüjjen non wi linen kemehai atsena, nmiepheü, nu ssenthsü kenmie pi de ketheng abe tagha pi hi ketenpen Nithsüjjen tsü sayalo. Cherubim tsikezhü pi ma miwi degüki yalo.

² Kesüsü ma keti kesie meceqe, kesie na meter taghakeni nu kemeza na meter keni tsüti salo.

³ Tsüthu manga degüghu pi kesü sa, nu kepa wi manga tsü la pi makesü sayalo.

⁴ Keni qho athsü tsena ameiwa tsü shenghu pi degüya.

⁵ Kesüwa tsü athsü atuwa miwi keshenghu deni saya nu tsü makesü keniwa wi athsü sakhenwa miwi keshen deni salo.

⁶ Suna pi kecetenji deni saya nu tsüpi keni tsü ceghu pi kesütan sa thsü.

⁷ “Aneni ssenthsü abe taghakhen pi Nithsüjjen tsü keshon kesü sayalo.

⁸ Tsüthu tsüdila ketikesie meceqe, kesie meter tagha kecheng nu kemeza meter keni tsüti salo.

⁹ Tsüthu manga degüghu pi kesü sa, nu kepa wi tugho tsü la degüghu pi kesü sayalo. Abe tughowa tsü pi Nithsüjjen tuwi keni tughu shenya.

¹⁰ Kesüwa wi athsü asakhenwa miwi keshenghu deni saya, nu kepawa katen miwi la keshenghu deni salo.

¹¹ Lezza pi kecetenji deni saya nu tsüthu pi keshenghu miwi na athsü keni ceghu pi keshonthsü kesü sa thsü.

¹² Ma gilli pahanwa tsüpi Nithsüjjen sengwa hagilo.

¹³ Keni qho kesie ma gilli sentimeter deni tsüpi Nithsüjjen katen wi hagi nu tsü shon thsülo.

¹⁴ “Keshanji keni sapi wwaya, kesü aneni süpon hyu ghang pi kenmie nu kepawa asahyu kemehai pi sa nu pi ma meiwa keshanji saya.

¹⁵ “Akakia chan pi Nithsüjjen chan-gü meshonqhe saya.

¹⁶ Ajjen chan kesüsü kesie meter mejü nu kemeza sentimeter 66 saya.

¹⁷ Ajjen chanthu tsüdi zanghu yale kesalina akhuki kenini meceqe zankiya, ajjen chan-gü maben la tsüti sayalo.

¹⁸ Acülawa ghena achan-gü ngwe saya,

¹⁹ nu rükatssü pi adonbvü kesheng ghena jügha sapi mathu ccü wi chi, adonbvü keni pi akhuki kesü tsükiya.

²⁰ Nithsüjjen aghawa ghena achan-gü ngwe saya,

²¹ rükatssü pi adonbvü kesheng ghena jügha saya, achan-gü kesü wi adonbvü kenini.

²² Nithsüjjen sengwa niduwa ghena achan-gü tugho saya,

²³ nu achan-gü keni na ma ccügwenthu ghena.

²⁴ Accügwen chan-gü ha ma ccü wi bhenghu nu tsüti sasen shu ma li cu. Ma ccügwen keni wi achan-gü keni tsü ha makesü sa.

²⁵ Tsalina ciwi achan-gü tazen witsü rükatssü pi kesa adonbvü tagha nu tugho na ben, adonbvü keni na achan-gü kesü ghena.

²⁶ “Akakia chan pi kenthsü ghena taghamanga saya, manga na Nithsüjjen katen wi achan-gü manga ghena,

²⁷ manga na ma katen pahanwa ghena, nu manga na niduwa asengwa chan-güthu ghena.

²⁸ Kenthsüchan anonwa tsüna gishü pahan ketan pi achan wi chi, Nithsüjjen katen pahanwa na wa pahanwa kecu tsüti saya.

²⁹ Suna pi achanthu tsü mejuya nu tsüthu pi suna qei wina suna pi meju ketheng kenthsüchan tsü gheya.

³⁰ Hi ayikha wi mayen pi no keccüca tsü kenie wina Nithsüjjen tsü sayalo.

³¹ “Linen kemehai atsena, nmiepheü, nu ssenthsü kenmie pi de ketheng pi keshonthsü kesü saya. Cherubim tsikezhü pi ma miwi degüki yalo.

³² Tsüpi akakia chan donbvü mejü suna pi meju ketheng adhasü wi chi, nu rükatssü pi sa ketheng adonbvü mejü miwi hagilo.

³³ Keshonthsü tsüpi Nithsüjjen non wi adhasüthu cakhu wi chi, nu Cenkethenjüh Khitson wi alonpha keni kebenwa tsüpi keshonthsü seng wi chiya. Keshonthsüwa tsüna Kemetha Pen nu Kemetha ntsawa Pen shondhi kepapa saben.

³⁴ Ma keshan pi Cenkethenjüh Khitson miwi chi.

³⁵ Kemetha ntsawa Pen na ameiwa tsü miz pi Nithsüjjen wi aghawa nu ahula kedonpen pi acülawa chilo.”

³⁶ Nithsüjjen wi kedu jenka ghena linen kemehai atsena, nmiepheü, nu ssenthsü kenmie pi de ketheng nu degü pi ayakhu nu ma tsisa ketheng pi keshonthsü kesü saya.

³⁷ Keshonthsü ha ghena akakia chan pi adonbvü manga sa nu suna pi mejuya nu adhasü pi chiya; lezza pi adonbvüthu ghena azenza manga sayalo.