BVÜKESHHU 25 - Kemethajüh (N) (Re-editing) Bible (BSI)

Kemetha Nithsüjjen Ghena Kinyikechi

¹ Apvüwa na Mosa wi khi,

² “Israel nyithu kekinyi sapi hi cülo kizalo. Anyi kesü le kesü lela ma nen nu kekinyi mangwa sachi mvu khe khuyalo.

³ Mathu hathu pi kekinyi saben: suna, rükatssü, nu lezza;

⁴ linen kemehai; atsena, nmiepheü, ssenthsü kenmie, aneni ssenthsü kede;

⁵ aneni süpon hyu ghang pi kenmie; asahyu kemehai; akakia chan;

⁶ ahula ghena deli; nyenketen deli nu handemvu ghena cüdemvu;

⁷ karnelian lon nu alon menkedhu pi keqhaikedi depfü kewheng nu deshi keqhan thsü.

⁸ Anyithu na ighena nithsüjjen kemetha sa nu hi gho mathu jawi hangya kemehai nsathu yishü.

⁹ Hi pi no ccüca keten kenie wina ma yen nu ma tsi la sayalo.

Cenkethenjüh Khitson

¹⁰ “Akakia chan pi Akhitson kesü ma kesie sentimeter 110, kemeza sentimeter 66, kemisi sentimeter 66, tsüti sayalo.

¹¹ Suna kemetha pi ma non, ma mei, nu ma katen tsüdila meju kevüli yalo.

¹² Tsü kepieji suna qei mejü saya nu tsüthu pi ma ccü mejü wi chiya, qei kenini pi kawa hewa chiya.

¹³ Akakia chan pi kepiechanthu sa nu suna pi tsüthu mejuya,

¹⁴ nu tsüthu pi Akhitson miwi ma qeithu wi tsü ghechiya.

¹⁵ Kepiechanthu tsü nkhushi la nu pi ma qeithu wi ghechi pi thenglo.

¹⁶ Tsaseng wi hi pi no cü keten alonpha keni miwi ayenkhukechithu zhü ketheng tsüpi Akhitson non wi chiya.

¹⁷ “Suna kemetha pi ma keshan kesie sentimeter 110, kemeza sentimeter 66 saya.

¹⁸ Suna pi cherubim keni cühya,

¹⁹ kesüsü pi ma keshan katen ghapeli wi chile kesalina. Tsü keni pi ma keshan wi zhüghu pi kesütan sa thsü.

²⁰ Cherubim keni tsüna ma keshan miwi kepegheli nu manyi gisha zanshigü pi tsü whengbhon yathsü.

²¹ Alonpha keni tsü pi Akhitson non wi chi nu ma keshan pi shanlo.

²² Hi cherubim keni ma keshan keben jüwi gho no metuden, nu iyenthu tsüdi Israel nyithu ghena khukechi tsüpi no cüden.”

Amesa Pi Anyiza Kekinyi Ghena Miz

²³ Akakia chan pi miz kesü ma kesie sentimeter 88, kemeza sentimeter 44, nu kemisi sentimeter 66, tsüti cühyalo.

²⁴ Suna kemetha pi tsü mejuya nu ma katen la meju kevüliya.

²⁵ Füghancü kesa kesü ma kemeza milimeter 75 saya nu suna pi tsü ma katen mejuya.

²⁶ Kepieji suna qei mejü sapi ma ccügwen mejü wi ma ccü keben pen wi tsü chi.

²⁷ Miz piekile kesa ghena kepiechan pi chile kesa qeithu tsüpi füghancü kesa kete wi chi.

²⁸ Kepiechanthu tsü akakia chan pi sa nu suna pi tsüthu mejuya.

²⁹ Kisengtssü pi kekinyi kesa wi senle kesalina akhu, ahyi, afü, nu akhuzzathu sayalo. Hathu ha tsüdila suna kemetha pi saben.

³⁰ Miz tsüpi Cenkethenjüh Khitson tuwi chi, nu hi kekinyi kemetha mesa tsüna keshüthangla pi miz miwi theng ben.

Ahula Pi Kedonpen

³¹ “Suna kemetha pi ahula kedonpen kesü saya. Ma bvü nu ma kukhithu tsü suna pi cühya; ma tsikesa thighethu, kebvüjjen nu ma tsangthu pi tsü zhüghu pi kesütan sa thsü.

³² Ma cüna tugho na ma katen ghapeli wi kechengcheng chang wa ben.

³³ Ma cüna tugho qho kesüsü wi tsikesa thighe kecheng tsüna mcüshüli kebvüjjen nu ma tsangthu saghu pvü keben tsi ti kesa.

³⁴ Ahula kedonpen kukhiwa wi tsikesa thighe mejü tsüna mcüshüli thighe kebvüjjen nu ma tsangthu saghu pvü keben tsi ti saben.

³⁵ Ciwi kebvüjjen kesü na ma cüna kechengcheng kesa keni kekhu wi ben.

³⁶ Kebvüjjen, ma cüna, nu ahula kedonpenthu tsü suna kemetha pi cüh pi zhüghu pi kesütan saya.

³⁷ Ahula tagü canki pi ahula kedonpen wi chi nu tsüthu ya atuwi wegü yathsü.

³⁸ Kemecangqae nu ma khala kechipenthu tsü suna kemetha pi saya.

³⁹ Ahula kedonpen nu tsü tsanqaithu tsüdi kesa ghena suna kemetha kilogram changha nu manga senlo.

⁴⁰ Hi ayikha wi mayen pi no keccüca tsü kenie wina mehaitsü tsüthu tsü sayalo.”