BVÜKESHHU 20 - Kemethajüh (N) (Re-editing) Bible (BSI)

Ayenkhukechithu Tagha

¹ Anyiza na khi, nu hathu ha ma jüh:

² “Hi Apvüwa nthu Nyiza, nthu na Ejipt wi nssümagha sa keben wi nthu ssi keshhughowa tsüle.

³ “Hi ketan khe acenpvü kepa wi nkinyila.

⁴ “Nthu ghena atsikezhü mangla nsala, tsüna tang wi nyelela ayyi miwi nyelela atssü wi nyelela ayyi cakhu wi kebenthu tsi ti mangla nsala.

⁵ Atsikezhü tuwi nkukedula nyelela tsü nkinyila, kepaghenanye hi Apvüwa nthu Nyiza nu anonkemeyen Nyiza. Hi kemeten sengho hi nanmeghü ketenthu nu mathu shicüthu abvüye kecheng nu mejü kecu wi cüden.

⁶ Isala hi nanketizen pi hi ghali nu iyenthu nie ketenthu abvüye hazar wila ccücaden.

⁷ “Nkemehai ghena wi inyan nsenla, kepaghenanye hi Apvüwa nthu Nyiza; inyan sensa ketenwa metenmesha cüden.

⁸ “Sabbath yen tsü nieya nu sen methayalo.

⁹ Nthu na ghanan tugho jüwi nthu kekuli tsüdi saya,

¹⁰ isala tagü ghananwa tsüna kemnan tsathang sametha pi hi cüdha. Tsü ghanan wi thola kekuli nsala — tsüna nthu, nthu tsangathu, nthu nssümaghathu, nthu sahangthu, nu nthu diyyiwa wi kahang asangthu lela.

¹¹ Hi Apvüwa, ghanan tugho jüwi atssan, ayyi, atssükedone, nu ciwi kebenthu tsüdi sachi, isala tagü ghanan wi hi mnan wa. Tsalina hi Apvüwa, sawegü pi Sabbath miwi chi nu tsü sametha chitheng.

¹² “Nba nu njja nyuwakü yalo, isathu hi ayyi pi nthu cü keben wi tsü nthu na kesie hangyaben.

¹³ “Anyi npathila.

¹⁴ “Keqheza nsala.

¹⁵ “Nghanfüla.

¹⁶ “Milikemesa wi nyu shei npila.

¹⁷ “Nyu keben ntepaghala; nyu wubvü, nssümaghathu, amesüsi, gadathu, nyelela ma keben katsüha lela ntepaghala.”

Anyithu Kemessiwa

¹⁸ Anyithu na atsankeshigü nu tutuwa kekhou hhai zaya, atsancwe nu ayikha wi annikekhu shhugho keben kemu wi mathu messi pi kedheggü nu temeja wi ngan wa.

¹⁹ Mathu na Mosa wi khi, “Keujüla no ajühkhi pi ikhang kiza lethu ikhang na tsü kinaben, isala keujüla Anyiza na ajühkhi pi ikhang kiza lethu ikhang na shü nashe messiben.”

²⁰ Mosa na khineng, “Nmessi lalo; Anyiza na nthu ghan-nanle gho nu nthu sapi ma jühkina thsü, isanu nthu ya nsami thsüle kesalinale.”

²¹ Isala anyithu na temeja wi ben wa nu Mosa ketan akulukeshü kejang kete Anyiza keben pen wi wha.

Kekinyipen wi Ayenthu

²² Apvüwa na Mosa kiza nu Israel nyithu wi khi thsü, “Hi Apvüwa, tang wi ben nu nthu keccüneng tsü nthu na muyadha.

²³ Nthu ketanla nthu ghena suna nu rükatssü pi hi nkenye acenpvü kepa wi zhüpi nkinyila.

²⁴ Ayyi pi hi kekinyipen kesü saya, nu nthu khaghaneni nu amesüsi pi tsü miwi mecang pi kekinyi nu kecca ghena kekinyi sala ahhansha salo. Kahe wila nthu hi kinyilo apen ma kepa sa cüden, hi nthu wi gho nu sawegü pi nthu cüden.

²⁵ Keujüla nthu na alon pi hi kekinyipen sa lethu alon tsü pakhhi pi nsala, kepaghenanye nthu na alon kejenji kesen wi tsü sapi ighena nmetha thsüla shaben.

²⁶ Hi kekinyipen sa lethu acükhaku sa senki ciwi nchila, isa lethu nthu na ciwi ki keten wi nthu kemissü pi nyu ccücaben.”