BVÜKESHHU 19 - Kemethajüh (N) (Re-editing) Bible (BSI)

Israel nyithu Sinai Yikha wi kewa

¹ Mathu na Ejipt teshi nu asha kechengwa ghanan atuwa wi Israel nyithu na Refidim teshi nu wa Sinai yyikeshü wi ghoya.

² Ciwi mathu na Sinai Yikha ccü wi kemnanpen saben,

³ nu Mosa na ayikha wi Anyiza metule ki. Apvüwa na ayikha wina ma cichi nu ma wala Israel nyithu, Jakob shicübvüghathu wi khilo ma kiza:

⁴ “Nthu na hi Apvüwa Ejipt nyithu miwi mangwa sachi nu hi nthu pi amumu na ma zza kaghanie pi ma gisha kekhu wi chipvü keten ti nthu ssi shhugho hi wi chiya kesa muyadha.

⁵ Khili nthu keujüla ijühkina nu hi cenkethenjüh tsü nie lethu nthu na inyithu saden. Ayyi mabenla iji, isala nthu na hi kessiya kesa nyithu saden,

⁶ sametha pi hi wi chikeya nyi, nu nthu na keqhaikedithu sala hi kekuli saden.”

⁷ Tsalina Mosa na cü anyithu ccülikesathu cighu chi nu Apvüwa na ma kekiza tsüdi pi mathu kizachia.

⁸ Isanu anyithu tsüdila gweghe nu khineng, “Ithu na Apvüwa kekhi tsüdila saden,” nu Mosa na tsüpi Apvüwa wi kiza neng chia.

⁹ Apvüwa na Mosa kiza, “Hi akulukeshü jang ntsa kesa non wina gho no ccüneng den, isanu anyithu na ihhai zaya nu khili nten na no nondi wa tendha.” Mosa na anyithu khati luneng khe khipi Apvüwa kiza,

¹⁰ nu Apvüwa na ma kiza, “Wala anyithu wi kekinyi ghena nansü nu dhitsü wi mathu sametha yalo kizalo. Mathu athsümeni ghasü nsathu yishü,

¹¹ nu pitsü wi kiden-kesha yalo. Tsü ghanan wi hi Sinai Yikha miwi dugho den, nu anyi tsüdila hi muya mehai.

¹² Ayikha tsü vüla aggü sa nu anyithu ya tsü nthenkeghe thsüla, nu mathu thola ayikha wi nkila nyelela ma kete wila nwa lalo kizalo. Keujüla anyi kesüla accü pi tsü miwi nne lethu ma pi shü thsüaben;

¹³ thola ma nkidhenla alon pi kecenthi nyelela alakusü pi ma ghonthi nsathu yishü. Hawa ha anyi le asahang lela tsüti kesawa tsü pi shü thsüaben. Isala khathansha wi tutuwa khouchi khe anyithu na ayikha wi kilo.”

¹⁴ Tsaseng wi Mosa na ayikha wina dugho nu anyithu wi wa kekinyi ghena kiden yalo kiza. Tsalina mathu na athsümeni ghasüya,

¹⁵ nu Mosa na mathu wi khi, “Pitsü wi tsü kiden-keshaya, nu nza npvüza yen nsa lalo.”

¹⁶ Pitsüwa ghanen wi atsanshigü nu atsancwe sa, nu akulukeshü jang ntsa gho ayikha tsü kejiya nu tutuwa kekhou hhai misi ntsa kesa za. Kemnanpen wi anyi tsüdi messi pi kedheggü wa.

¹⁷ Mosa na kemnanpen wina mathu ssinu Anyiza metule mathu wa ayikha ccü wi nganben.

¹⁸ Annikekhu na Sinai Yikha tsüdila shübhon gho, kepaghenanye Apvüwa na anni wina ciwi dugho. Annikekhu na anni kejon kemecang nikhu ti tang wi ki, nu anyi tsüdila messi pi kedheggü ntsa sa.

¹⁹ Tutuwa kekhou hhai misi ntsa sa. Mosa na khi nu Anyiza na atsankeshigü wina ma jüh luneng.

²⁰ Apvüwa na Sinai Yikha shoni wi dugho nu Mosa cipi ciwi chi. Mosa na ciwi ki

²¹ nu Apvüwa na ma wi kiza, “Cüla anyi thola aggü tsü pvüdhi gho hi n-ghang lalo kesa mathu kitsan chilo; keujüla mathu na tsüti sa lethu mathu kejon na shüaben.

²² Keqhaikedithu lela mathu sametha ccüla ikete wi nghothu yishü nyelethu hi mathu metenmesha ben.”

²³ Mosa na Apvüwa kiza, “Anyithu hewi kegho nben, kepaghenanye no ikhang ya ha pi sa kemetha yikha sa nu aggü sapi vü thsü kesalina.”

²⁴ Apvüwa na luneng, “Cüla Aaron ssinu no gweghe shhugholo. Isala keqhaikedithu nu anyithu na aggü pvüdhi sen nu hi wi kegho yishü, isalethu hi mathu metenmesha ben.”

²⁵ Tsaseng wi Mosa na cüla anyithu wi Apvüwa na kekhi tsüpi mathu kiza.