BVÜKESHHU 16 - Kemethajüh (N) (Re-editing) Bible (BSI)

Manna nu Akvukhithu

¹ Mathu Ejipt teshi nu asha keniwa taghamanga ghanan Israel nyi maben Elim wina lentsen wa Elim nu Sinai manyi jü Sin yyikeshü wi tsü ghoya.

² Ciwi mathu tsüdila Mosa nu Aaron manyi wi leben nkaghajüh khi,

³ nu manyi wi kiza, “Ejipt wi Apvüwa yala ikhang pathi thsüthu mehai kesa nan. Ciwi ikhang donki nu asa dsa nu atsse kepa wi la dsa pi anonkwenya kesa nan. Isala nshinyi ikhang ssi shhugho he ayyikeshü wi tsüdi khwenthi shüa tendha le!”

⁴ Apvüwa na Mosa wi kiza, “Hi khili nthu tsüdi ghena tang wina atsse tsangho chi cüden. Anyithu na ghanan kaghapenla shula tsü ghanan ghena atssewa tsü saghuyalo. Hi hatinu mathu hi kecükegwe kechiwa tsü nie tenla nye khe mathu ghan nan den.

⁵ Tugho ghanan wi mathu na ghanan kaghapen saghuya keten keni ju saghuya nu tsüpi kidenya.”

⁶ Tsalina Mosa nu Aaron manyi Israel nyithu tsüdi wi kiza, “Shita nthu Apvüwa na Ejipt wina nthu ssi shhugho le kesa chüyaben.

⁷ Ghanen wi nthu na Apvüwa tenle kesa ma kewegü muyaben. Nthu leben-nkaghajüh khi nu ma shun kesa tsüna ma zayadha — anle, ma shunle, kepaghenanye ishinyi na ma kecükegwe kechi tsü sa keben ketanle.”

⁸ Tsaseng wi Mosa na khi, “Apvüwa na minulen lethu asa nu aghanen lethu amesa pi nthu kedsa mvu chu cüben, kepaghenanye nthu na khati leben- nkaghajüh khi pi ma shun khe ma zayadha. Nthu na ishinyi shun keben tsüna Apvüwa shunben le.”

⁹ Mosa na Aaron wi khi, “Anyithu maben kiza nu gho Apvüwa tuwi ngan thsülo, kepaghenanye ma mathu leben-nkaghajüh tsü zayadha.”

¹⁰ Aaron na anyithu maben kekiza ti mathu na khapeghe wa ayyikeshü wi ghangchi nan zuli Apvüwa kewegü na akulukeshü wi shhugho.

¹¹ Apvüwa na Mosa wi khi,

¹² “Israel nyithu na leben-nkaghajüh kekhi tsü hi zayadha. Aghani du keten pang wi mathu asa muyaben, nu ghanenwa wi mathu amesa nsenthu keyishü tsüdi muya ben. Tsaseng wi mathu na hi Apvüwa mathu Nyiza le kesa chüyaben.”

¹³ Minulen wi akvukhithu na pighe dugho mathu kemnanpen tsü pongya, nu ghanenwa wi ajangcü na kemnanpen kevü maben wila benla.

¹⁴ Ajangcü na anikhu ceng kebvü seng wi pala pahan mehaitsü füghancü nu ghapasi kesa na ayyikeshü miwi pong benla. Tsüna akejanbi ti biye kesa.

¹⁵ Israel nyithu na tsü mukeya wi mangwa khe nchü nu mathu khokho wi keü, “Ha mangwa nu?” Mosa na mathu wi khi, “Hawa ha Apvüwa na nthu dsalo khupi kecü atsse tsü.

¹⁶ Apvüwa na ahza khukechi na, nthu tsüdila khaju nsenthu yishü khe ma theghi anyi keji kezeng nie nu meshu kesü ghena atsüde keni tsüti saghu yalo.”

¹⁷ Israel nyithu na tsüti sa, nu pahan na kejon nu kepa na kezeng-u saghuya.

¹⁸ Mathu tsü kede wa nan kejon saghu keyathu na ji ntsa nsa, nu kezeng-u saghu keyathu la zeng ntsa nsa. Tsüdila ma nsenthu keyishü tsü ketan saghuya.

¹⁹ Mosa na mathu wi kiza, “Thola tsüpi dhitsüwa wi ghena ntheng lalo.

²⁰ Isala mathu pahan Mosa na kekhi tsü nkinala misha pi theng. Ghanenwa wi tsüna amedhen ghonu bighe pi hansa benla, nu Mosa na mathu miwi aghepvü.

²¹ Ghanen kaghapenla wa meshu kesüsü nsenthu keyishü tsü saghuya; nu khathansha wi aghani saa shagha khe tsüna ayyi wi tssü wa.”

²² Tugho ghanan wi mathu na wa khenighani yaketen keni ju atsse meshu kesüsü ghena atsüde mejüjü saghuya. Mathu jawi accülikesathu tsüdi gho tsü cüki pi Mosa kiza,

²³ nu ma mathu wi khi, “Apvüwa ahza khukechi na dhitsü wi tsüna kemetha kemnan tsathang sametha pi ma wi kechi. Nansü nthu mangwa gü mvu ben khe güya nu mangwa shvu mvu ben khe shvu yalo; nu ma gilli tsüpi dhitsüwa ghena theng nsathu yishü.”

²⁴ Mosa na mathu kekiza ti mathu na ma gilli tsü pi dhitsüwa ghena thengya; tsüna meyasa nyelela nbighe.

²⁵ Mosa na khi, “Nansü ha dsalo, kepaghenanye nansü ha Sabbath, kemnan tsathang sametha pi Apvüwa kecü, nthu na kemnanpen ameiwi khiela atsse tsü muya nben.

²⁶ Nthu ghanan tugho jüwi tsü atsse saghu yalo. Isala tagü ghanan kemnan tsathang wi ciwi mangla muya nben.”

²⁷ Tagü ghanan wi anyi pahan na atsse tsü saghuyale bhawa, isala mathu na mangla mu meya.

²⁸ Tsaseng wi Apvüwa na Mosa wi kiza, “Khathula nthu na hi ahza khukechiwa tsü nkinala hhaghe ben ten nu?

²⁹ Hi Apvüwa, kemnan tsathang kesü pi nthu kecü tsü meshenyalo, tsalina hi keshüthangla tugho ghanan wi ghanan keni tsse pi nthu cüden. Anyi tsüdila ma tagü ghanan witsü khiewa ben khe ma ciwi ben wa nu ajjen nteshila.”

³⁰ Tsalina anyithu tagü ghanan wi tsü kekuli mangla nsala.

³¹ Anyithu na atsse tsüpi manna le khi. Tsüna palacü kizzakeu ti mikidhi kesa, nu anikholi pi amesa ghapasi gü ketheng kinyan ti kesa.

³² Mosa na khi, “Manna tsü pahan pi ithu tsangathu ghena thenglalo kesa Apvüwa na ahza pi ithu cü, isanu mathu na ma ithu ssi shhugho ayyikeshü wi atsse pi ithu kecü tsü muya thsüle kesalina.”

³³ Mosa na Aaron wi kiza, “Alakhü kesü khuya nu manna atsüde keni kede pi ma non wi chiya, nu tsü sengho Apvüwa tuwi ithu shicübvüghathu ghena theng yalo.”

³⁴ Apvüwa na Mosa kekiza ti Aaron na tsü sen wa Cenkethenjüh Khitson tuwi chi nu pi ciwi tsanqaitheng.

³⁵ Israel nyithu na mathu wa hangwa kesa Kanaan yyi wi tsü npi kecu chu amapi jügha ghena manna tsü dsa. (

³⁶ Atsüde tsü na amaha kegishü ngwe wi kesü.)