BVÜKESHHU 11 - Kemethajüh (N) (Re-editing) Bible (BSI)

Mosa na Atssütsewa keshü Khishikechi

¹ Tsaseng wi Apvüwa na Mosa wi kiza, “Hi hewi kemeten kesütan kesun pi Ejipt kadimiwa nu ma nyithu miwi chi tendha. Tsaseng wina ma nthu ya bvü thsüaben. Ma he wina nthu jügüshiaben.

² Khili Israel nyithu wi kiza nu mathu ya mathu jenphonthu wi suna nu rükatssü nu alon menkedhu khieya thsülo.”

³ Apvüwa na Ejipt nyithu sapi Israel nyithu nyuwakü thsüben. Ntsakhiwa, kadimi kekhu wi kedithu nu anyithu tsüdila Mosa na anyi kekhang kedi kesüle saben.

⁴ Mosa tsaseng wi kadimiwa kiza, “Apvüwa na khiben, ‘Ghajanon wi hi Ejipt nyi jawi waden,

⁵ nu Ejipt wi atsa tssütsethu tsüdila shüaben, tsüna kadimiwa tsa kadipen ghongya ketenwa na wa asusü keten nza nssümaghale tsa kecu. Asahang zza tssütsewa la tsüdi shüaben.

⁶ Ejipt tsüdi wi kiqai hhai na pong shaben, tsüna kheni la tsüti npi sa nu haseng wila sa nben.

⁷ Isala Israel nyithu jawi tsü affü nu mathu sahangthu lela khou nben. Tsaseng wi ccüna no hi Apvüwa, Ejipt nyithu nu Israel nyithu sapi kepapa sa kecüwa le kesa chüyaben.’ ”

⁸ Mosa na hati khi nu asakhen sa, “Nkekhu wi kedithu tsüdi gho ituwi kukedu ben, nu mathu hewi inyithu tsüdi ssiya nu bvülo khieben. Tsaseng he wina bvüaben!” Isanu Mosa ma leben minu nu kadimiwa teshia.

⁹ Apvüwa na Mosa wi kiza, “Hi Ejipt wi amankesa kejonla sale kesalina kadimiwa na njüh hhagheki benben.”

¹⁰ Mosa nu Aaron manyi na kadimiwa tuwi amankesa hathu ha tsüdi kulichi, isala Apvüwa na ma sapi leben dhu thsüa, nu ma Israel nyithu yala diyyiwa tsü nteshi thsü la.