AYENZHÜNENG 8 - Kemethajüh (N) (Re-editing) Bible (BSI)

Ayyi Kemehaiwa Tsü Yayaketen

¹ “Hi nansü ayenthu pi nthu cü keben ha tsüdila nietsentsa sayalo, isanu nthu na Apvüwa nthu bamyithu wi khishiketheng yyiwa tsü yaya nu ciwi hangya, nu nthu ji kayi yale kesalina.

² Meshenyalo, Apvüwa nthu Nyiza na nthu matsü kesiela ayyikeshü wi amapi jügha keqoedeja keten chuli nthu ssigho, agükeccü kesunchi pi nthu leben pienan, isanu ma nthu na mangwa sa mvuben, nu nthu na ma yenkhukechi tsü nie tenla nye khe chüyale kesalina.

³ Ma nthu satemeni nu nthu sapi ghama wa thsüa, nu ma nthu nu nthu bamyithu na kheni la dsa nketen tsse manna pi nthu ya dsaya thsü. Ma anyi na amesa ketan dsa nu hangya nten, isala Apvüwa na kekhi tsüdi miwi benden kesa ha sapi nthu sansi cüle.

⁴ Amapi jügha jüwi tsü nthu thsümeni na nqae, nu nthu ccü na npvü.

⁵ Aba kesü na ma tsanga sansi keten ti Apvüwa nthu Nyiza na nthu satemeshon nu kemeten pi nthu cüle kesa meshenyalo.

⁶ Tsalina Apvüwa na nthu kekiza ti salo; ma yenthu tsü nie nu hang, nu ma kinyikü tenlo.

⁷ Apvüwa nthu Nyiza na nthu ssinu ayyi kemehai kesü wi ghoden — ayyi aghaku nu atssü kebvüpen keben, nu ayinong wi atssübvü shhugho yyiketijü nu yyishiphon wi llewa keben;

⁸ awhengsu nu achentha, kemeshentsse bi, khhaghabvü, ahhibvü, oliv, nu anikholi muya keten yyiwi.

⁹ Ciwi nthu na ghama nyelela hhatu nben. Alonshithu wi amighetssü na ben, nu nthu yyishiphon wi lezza muyaben.

¹⁰ Nthu kedsa mvu tsüdi benya ben, nu Apvüwa nthu Nyiza na ayyi kemehai pi nthu kecü ghena nthu na ma nkesengcha saben.

Apvüwa Malithu keyishü ghena Kekitsanthu

¹¹ “Apvüwa nthu Nyiza tsü nmalila metsilo; hi nansü pi nthu cü keben ma yenthu ha kesüla n-niela nsala.

¹² Nthu na nthu kedsa mvu tsüdi benya nu nthu kahangpen ajjen kemehai saya,

¹³ nu nthu na amesüsi nu khaghaneni, nthu na rükatssü nu suna, nu nthu keben kepa wi tsüdi ji kayi benya lethu,

¹⁴ nthu na kapvü nu nthu na Ejipt wi nyu nssümagha sa keben wi nthu khushikeya Apvüwa nthu Nyiza tsü nmalila metsilo.

¹⁵ Ma nthu ssinu amaghang nkemehai nu ajjüssi keben yyikeshü keti nu qhethiketen kesa wi tsüna shhu. Ma ayyi keqha nu atssü nkemi yyiwi nthu ghena alonshi wi atssü ya lle shhugho thsü.

¹⁶ Ma ayyikeshü wi nthu bamyithu na kheni la dsa nketen tsse manna pi nthu ya dsaya thsü. Ma agükeccü kesunchi pi nthu leben pienan, isanu asakhen wi ma pala kemehai sawegü pi nthu cüle kesalina.

¹⁷ Tsalina nthu khie wila nthu ketanla nthu kekhang nu kezü wina nthu sapi benyale nmeshenla.

¹⁸ Apvüwa nthu Nyiza na ma kekhang pi nthu cü nu benya thsüle kesa meshenyalo. Ma ha sachi kepaghenanye ma nansü kecu wila kheni nthu bamyithu ssinu cenkethenjüh witsü jühtsentsa saben.

¹⁹ Khie wila Apvüwa nthu Nyiza tsü mali nu wala acenpvü kepa wi kinyi nu mathu kekuli nsala. Keujüla nthu na tsüti sa lethu, hi nansü nthu kitsanben, nthu yasa cü metsi ben na.

²⁰ Nthu na Apvüwa jüh- nkina lethu, nthu na atujügüwathu ma mizzatenti yasa keten tsüti nthu yasa cüben.”