AYENZHÜNENG 7 - Kemethajüh (N) (Re-editing) Bible (BSI)

Apvüwa Nyithu

¹ “Apvüwa nthu Nyiza na nthu ssi wa ayyi nthu na benyale keben witsü chicüben, nu ma ciwi mizzatenti kejon jügüshi shaben. Nthu na atujügüwathu ma nthu miwi ketiki nu kekhangki mizzatenti tagü - Hitti, Girgash, Amor, Kanaan, Periz, Hivi, nu Jebus nyithu jügüshi cüben.

² Apvüwa nthu Nyiza na anyi hathu pi nthu kekhu wi chi nu nthu na mathu miwi khangya lethu, nthu na mathu tsüdi pi shü thsü nsathu yishü. Mathu ssinu apfüwa sa nyelela mathu nantizenchi nsala.

³ Mathu ssinu keyali, nyelela nthu tsangathu ya mathu kesüla meya thsüla.

⁴ kepaghenanye isalethu mathu na nthu tsangathu ya Apvüwa nkinyi thsüla ssinu acenpvü kepa wi bvüaben. Isalethu Apvüwa na nthu miwi aghepvü nu nthu yasa cüben.

⁵ Tsalina mathu kekinyipen yasa, mathu alon kisheng kemethathu pakhhi-paghe, mathu cenpvü nzawa Asherah zensuthu pacha, nu mathu atsikezhüthu tsüpi mecang cülo.

⁶ Nthu na Apvüwa nthu Nyiza ji ghena hati salo. Ayyiwi anyi tsüdi jawi na ma nthu kessi pi ma nyi ntsa sayadha.

⁷ “Nthu na anyi kepathu miwi ji kayi kesalina Apvüwa na nthu tizen nu nthu kessi meyale; nthu na ayyi wi mizzatenti kizza ntsawa.

⁸ Isala Apvüwa na nthu tizen nu ma nthu bamyithu wi khishiketheng tsü nie mvu kesalina le. Tsalina ma ma kekhang kedi pi nthu hangshaya nu nthu na Ejipt kadimiwa nssümagha sa keben wina nthu lisha chicüa.

⁹ Apvüwa nthu Nyiza tsü ketan na Anyiza nu ma jühtsentsa satenle kesa meshenyalo. Ma ma cenkethenjühwa tsü nieben, nu ma ghaliki keten pi ma tizen nu ma yenkhukechi nie ketenthu abvüye hazar wi lela ccücaden,

¹⁰ isala ma kemeten pi ma nanmeghü ketenthu cü kisütu nben.

¹¹ Tsalina khili mangwa pi nthu sansi cüdha khe nieyalo; hi nansü pi nthu kecü ayenthu tsüdi nieyalo.

Jühkekina ghena Kesawegüthu

¹² “Keujüla nthu na ayenkhukechi hathu kina nu jühtsentsa sala tsüthu nieya lethu, Apvüwa nthu Nyiza na nthu ssinu cenkethenjühwa tsü nieben, nu ma nthu bamyithu wi khishiketheng ti ma ghaliki ketenwa tsüpi nthu ccücaben.

¹³ Ma nthu tizen nu sawegü pi nthu cüben, isanu nthu ya ji kayi nu atsanga kejon benya thsüle kesalina; ma sawegü pi nthu lli wi chithu nthu na asu, kisengtssü, nu oliv deli benyaben; nu ma sawegü pi nthu cüthu nthu na amesüsi nu khaghaneni kejon mizzasa yaben. Ma ayyi pi nthu cüle nthu bamyithu wi khishiketheng wi ma kesawegü hathu tsüdi pi nthu cüben.

¹⁴ Ayyi wi anyi thola nthu ti kesawegü pvüya nben. Nthu kesütanla ashicü nmi nyelela nthu sahangthu na meju thsüa nben.

¹⁵ Kesakinaa tsüdi wi Apvüwa na nthu khweyaben, nu nthu na Ejipt wi sanan kesa tsüti ma khumakhujü nkemehai sengho nthu miwi chi nben, isala ma tsüthu sen wa nthu ghinyithu tsüdi miwi chiaben.

¹⁶ Apvüwa nthu Nyiza na pi nthu kekhang kekhu wi chikesa mizzatentithu tsüdi yasa nu mathu nantizenchi nsala. Mathu cenpvüthu tsü nkinyila, kepaghenanye tsüna nthu ghena aca kesü saben.

¹⁷ “Nthu ketanla anyi hathu hana nthu miwi ji kayidha nu nthu na mathu jügüshiya nbenle nkhila.

¹⁸ Mathu nmessi lalo; Apvüwa nthu Nyiza na Ejipt kadimiwa nu ma nyithu tsüdi miwi sakechi tsü meshenyalo.

¹⁹ Nthu na nthu nyon pi mukeya qhethiketen kesa adhaghathu, zensuthu nu amankesathu, Apvüwa nthu Nyiza na ma kekhang keti nu kezü wina nthu lishachi kecü tsü meshenchilo. Ma Ejipt nyithu yasa kesa tsüti nthu na khili messi keben anyi hathu tsüdila yasa cüben.

²⁰ Ma adhaghathu la kesun pi mathu jawi chi nu kuthibvü kesathu lela yasa cüben.

²¹ Tsalina anyi hathu nmessi lalo. Apvüwa nthu Nyiza na nthu ssiden; ma kekhang Nyiza, ma kemessiu le.

²² Nthu na atujügüwathu ma ashishi sala mizzatenti hathu jügüshiaben. Nthu kutitan sa mathu tsüdi jügüshiya nben, kepaghenanye nthu na tsüti sa lethu aghangsathu ji kayi nu nthu ghena kemessi saben.

²³ Apvüwa na nthu ghinyithu pi nthu kekhang kekhu wi chi nu mathu npi keyasakhi chu mathu ya ketizensa thsüaben.

²⁴ Ma mathu kadimithu pi nthu kekhang kekhu wi chiaben. Nthu na mathu pathi nu nyu na mathu maliaben. Anyi thola nthu khenya nben, nthu na tsüdi yasaben.

²⁵ Mathu tsikezhüthu tsüpi mecanglo. Mathu miwi rükatssü nyelela suna tsü ntepaghala, nu nthu ghena tsüthu tsü khu meyala. Keujüla nthu na tsüti sa lethu tsüna keshü, kepaghenanye Apvüwa na tsikezhü kekinyi tsü nanmeghüden.

²⁶ Tsikezhü hathu ha kesüla sen nu nthu jjen wi nghola, isalethu tsüthu miwi kishen-keshi tsüna nthu miwi ghoaben. Nthu na tsikezhü hathu nanmeghü nu nanqanan nsathu yishü, kepaghenanye tsüthu na Apvüwa kishen-keshi cakhu wi bendha.”