AYENZHÜNENG 4 - Kemethajüh (N) (Re-editing) Bible (BSI)

Mosa na Israel Ajühyalo Kekiza

¹ Tsaseng wi Mosa na anyithu wi khi, “Hi pi nthu sansi keben ayenthu ha tsüdi nie yalo. isathu nthu na Apvüwa nthu bamyithu Nyiza na ayyi pi nthu cü keben tsü nkaya nu ciwi hangya mehai.

² Hi ahza pi nthu kecü tsü miwi mangla pi nwwala, nu mangla senbvü nsala. Apvüwa nthu Nyiza na ahza khukechi hi pi nthu kecüthu tsü nie yalo.

³ Nthu ketanla Apvüwa na Peor Yikha wi mangwa sachi khe nthu na muyadha. Ma ciwi Baal kekinyithu tsüdi pathia,

⁴ isala nthu Apvüwa nthu Nyiza wi jühtsentsa sa ketenthu na nansü kecu hangben.

⁵ “Apvüwa iNyiza na hi salo kekiza ti hi ayenthu tsüdi pi nthu sansi cüdha. Nthu na wala ayyi nkaya nu benya keten witsü tsüthu tsüdi nie yalo.

⁶ Tsüthu tsü nie kaketsü sayalo, isathu tsüna nthu na khatila metsa khe pi mizzatenti kepathu ccücaben. Mathu na ayen hathu tsüdi zakeya wi mathu hati khiben, ‘Mizzatenti kedi hawa ha kemetsa nu chüshikeya khatila ben nu!’

⁷ “Mizzatenti kepa wi na di ntsa ben lela, Apvüwa ithu Nyiza na ithu tetsaki keben ti acenpvü kesü mathu na ma nsenthu keyishü wi tetsaki kesa nmi. Ithu na ma kekiqa khie kechi wi ma ithu kiqa cüden.

⁸ Mizzatenti kepa wi di ntsa ben lela, hi ayen ketsatan nansü pi nthu kesansi hati kesa nmi.

⁹ Nthu kiden-kesha yalo! Nthu na hang keben chu nthu nyon pi mangwa muyadha khe tsü mali nben kesa meshenkhvu yalo. Tsüpi nthu tsangathu nu nthu tsanga tsangathu kizalo,

¹⁰ tsüna nthu na Sinai Yikha wi Apvüwa nthu Nyiza ketenpen wi kangan tsathang ma hati hi wi kekhi cüki, ‘Anyithu ya saghu nu mehuya thsü. Hi mathu ya hi mangwa khiten khe zaya thsü nu mathu na hang keben chu ijühkekina chüya nu mathu tsangathu sansi pi hi kinyikü yathsüle kesalina.

¹¹ “Nthu na khati wa annikekhu kejang na ayikha keji nu anni na qhe sen atssan wi gi keben ccü wi ngan khe khipi nthu tsangathu kizalo.

¹² Apvüwa na khati nu anni wina nthu ccüneng, nthu na ma ajühkekhi zaya isala ma tsi khati kesa khe mu meya le kesa cüki tsüpi mathu kizalo.

¹³ Ma nthu ssinu cenkethenjüh tsü nie yale kesalina nthu na mangwa nsathu yishü khe pi nthu kizadha — nthu na ma alonpha keni miwi Ayenkhukechithu Tagha zhükechi tsü n-niethu yishü.

¹⁴ Apvüwa na nthu wala ayyi nkaya nu benya keten wi nie keten yenthu tsü, hi tsüdi pi nthu sansi cülo kizale.

Atsikezhü Kekinyi Ghena Kekitsan

¹⁵ “Apvüwa na Sinai Yikha wi anni wina nthu keccüneng wi nthu na ma tsi mangla mu meya. Tsalina nthu ghena kemehaiwa saya metsilo,

¹⁶ nthu ketanla nthu ghena atsikezhü mangla sapi nsamila — tsüna npvüza nyelela nza,

¹⁷ aghangsa nyelela awa,

¹⁸ anga nyelela ayyiwi ghapvü ketenthu.

¹⁹ Nthu mechu pi atssan wi mukeben tsü kinyi nu kekuli nsa thsüla — aghani, asha, nu ghotsithu. Apvüwa nthu Nyiza na anyi kepathu tsüdi yala tsüthu kinyi thsüle khuchidha.

²⁰ Isala Ejipt wi mecang keben wina ma khushikeya nyithu tsüna nthu le. Nthu na nansü sa keben hati ma nthu pi ma nyithu sale kesalina nthu ssi shhugho.

²¹ Nthu ghena Apvüwa nthu Nyiza na imiwi aghepvü nu kishen, nu hi ya Jordan Ghaku pvüdhi sen ma ayyi kemehai pi nthu cü keben witsü ndu thsüle kishen le.

²² Hi aghakuwa tsü npvüdhila ayyi hewi shü wa tendha, isala nthu na tsü pvüdhi wa ayyi kemehaiwa witsü benya tendha.

²³ Apvüwa nthu Nyiza na nthu ssinu cenkethenjüh tsü nmalila metsilo. Ma ahza khukechi tsü kina nu nthu ghena atsikezhü mangla nsala,

²⁴ kepaghenanye Apvüwa nthu Nyiza na annikeqhe kesü ti; ma anonkemeyen Nyiza.

²⁵ “Nthu na ayyi ciwi matsü kesie hang nu atsangathu nu atsa tsangathu muya lela nthu ghena atsikezhü mangla sapi nsamila metsilo. Hawa ha Apvüwa tuwi nkemehai, nu tsüna ma sapi aghepvü thsüaben.

²⁶ Hi nansü atssan nu ayyi cipi nthu ghena chüza saben, nthu na ijüh nkina lethu, nthu na ayyi ciwi wan nmila ben. Nthu na Jordan pvüdhi wa benyale keben yyiwa witsü matsü kesie hangya nben. Nthu yasatha saben.

²⁷ Apvüwa na nthu jügüzighe pi mizzatenti kepathu jawi chi nu ciwi nthu na anyi keu ketan hangyaben.

²⁸ Ciwi nthu na anyi kwen pi kesa achan nu alon cenpvüthu, muya nyelela zaya, dsaya nyelela kahanya nketen cenpvüthu tsü kekuli sa waben.

²⁹ Ciwi nthu na Apvüwa nthu Nyiza tsü bhaben, nu nthu leben tsüdi sen nu ma bha lethu nthu na ma muyaben.

³⁰ Pala hathu ha tsüdi nthu miwi gho nu nthu na agükeccü wi keben witsü nthu na asakhenwa Apvüwa wi wa nu ma jühkina ben.

³¹ Ma nanketizen Nyiza. Ma nthu teshi nyelela nthu yasa nben, nu ma ketanla nthu bamyithu ssinu cenkethenjüh tsü malia nben.

³² “Nthu npi kepvügha tsüwi Anyiza na anyi sapi ayyi wi kechi cüki tsü meshen kaketsü sachilo. Ayyi maben wi kina nanlo. Hatu wi pala kedi hati sadha kwe? Anyi pahan na hati kesa zayadha kwe?

³³ Nthu na hang keben ti anyi pahan acenpvü kesü na anni wina mathu ccüneng keben zakeya seng wi hangben kwe?

³⁴ Apvüwa nthu Nyiza na Ejipt wi nthu ghena sakechi ti acenpvü kepa wi kesüla leben-jjan nu wa mizzatenti kepa wi anyi pahan khushi pi ma ji saya kwe? Nthu nyon kemu wina ma kekhang kedi nu kezü sen nu kuli; ma adhagha nu aghi sengho, ma azensuthu nu amankesa kuli, nu pala qhethiketen sa thsüa.

³⁵ Apvüwa na tsüpi nthu keccüca jjügi, ma ketan Anyiza khe kepa wi nmile kesa nthu ya chüya thsüle kesalina.

³⁶ Ma nthu ya tangwi ahhai zaya thsü nu ma nthu kecükegwe cüle kesalina; nu ayyi hewi ma nthu ya ma nni kemetha muya thsü, nu ma ciwi na nthu ccüneng.

³⁷ Ma nthu bamyithu ketizen ghena nthu kessiya, nu ma kekhang kedi wina ma ketanla Ejipt wi nthu ssi shhugho.

³⁸ Nthu na atujügüwathu ma nthu miwi kediki nu kekhangki mizzatentithu tsü jügüa, ma nthu ssigho nu khili nthu ji sa keben mathu yyi tsüpi nthu cüle kesalina.

³⁹ Tsalina nansü nmalila nu meshenyalo: Apvüwa na atssan nu ayyi miwi Anyiza. Ciwi acenpvü kepa wi nmi.

⁴⁰ Hi nansü pi nthu cü keben ma yenthu ha tsüdi nieyalo, isalethu nthu nu nthu shicübvüghathu tsüdila mehaiyaben. Apvüwa nthu Nyiza na ayyi pi anuphan nthu ji salo pi nthu cü keben witsü nthu na hangben yaben.”

Jordan na Nishuwa Kuthikeya Nyunutithu

⁴¹ Tsaseng wi Mosa na Jordan Ghaku na nishuwa anyunuti kecheng khupi

⁴² anyi kesü na aghandu nyela ma ghinyi nkenyewa pathimi lethu ciwi bvü wa yazishu benya kemehai sa thsüa. Ma bvü wa anyunuti hathu kesü wi ben wathu ma pi nshü thsülaya mehai.

⁴³ Reuben mizza ghena yyikeshü yikhami ketijü wi Bezer nyunutiwa tsü; Gad mizza ghena Gilead yyiwi Ramoth; nu Manasseh mizza ghena Bashan yyiwi Golan na ben.

Anyiza Yenkhukechi Jühtuwa

⁴⁴ Mosa na Anyiza yenthu khuchi nu pi Israel nyithu sansi.

^45-46 Tsüwa tsüna mathu Ejipt wina shhugho Jordan Ghaku na nishuwa yyiketijü, Bethpeor nyuti kaghape wi keben, ma ayen hathu pi mathu cü. Hawa ha kheni Amor nyi kadimi Heshbon nyuti wi kekhang kesenwa Sihon yyi wi. Mosa nu Israel nyithu na Ejipt wina shhugho ma miwi khangya.

⁴⁷ Mathu na ma yyi nu Amor nyi kadimi kepa Jordan na nishuwa hang keten Bashan wi kadimi Og yyi la nkaya.

⁴⁸ Ayyi hana Arnon Ghaku katen wi Aroer nyuti wina wala aghawa Sirion Yikha, tsüna Hermon Yikha kecu waben.

⁴⁹ Tsüna Jordan Ghaku na nishuwa yegu tsüdi wala acülawa Keshü Tssükedone nu nishuwa Pisga Yikha ccü kecu la saghuben.