AYENZHÜNENG 33 - Kemethajüh (N) (Re-editing) Bible (BSI)

Mosa na Sawegü pi Israel Mizzathu kecü

¹ Kesawegü hathu hana Anyiza nyiwa Mosa na ma npi keshü tuwi sawegü pi Israel nyithu miwi khie kechi.

² Apvüwa na Sinai Yikha wina gho; ma Edom miwi aghani ti shhugho nu Paran Yikha miwi na ma nyithu wegü cü. Tangnyilo hazar tagha na ma gwegheden, ma kwen ajewa anni keqhe kesü senden.

³ Apvüwa na ma nyithu tizen nu ma jithu tsü khweden. Tsalina ithu na ma ccü wi kukedu, nu ma yenkhukechithu tsü nieden.

⁴ Mosa na Ayenwa pi ithu kecü tsü ithu na nieden, ithu mizzatenti na keben noncca ntsa keten.

⁵ Apvüwa na ma nyi Israel kadimiwa sa shagha, khathansha wi mathu mizza nu ccülikesathu na saghuya khe.

⁶ Mosa na Reuben mizza cüki khi: “Reuben na khiela shü nkeyawa salo; mathu na anyi keu ketan lela.”

⁷ Ma Judah mizza cüki khi: “Apvüwa, mathu na kekiqa kekhie kina cülo; mathu kheneng amizza kepathu gweghe kesü saya thsülo. Apvüwa, mathu ghena aghisalo; mathu kiqa pi mathu ghinyithu ssisa thsülo.”

⁸ Ma Levi mizza cüki khi: “Apvüwa, no Urim nu Thummim sa nu no kemeshen pi nmagha tsentsa Levi nyithu wina ccücalo. No Massa wi mathu ghan nandha, nu Meriba tssü wi mathu tsentsale kesa chüyadha.

⁹ Mathu na abajjathu, acünyuthu, atsangathu, miwi jühkeya di kayi pi no ccücadha. Mathu na n-yenkhukechithu nieya, nu no cenkethenjüh witsü atsentsa sale.

¹⁰ Mathu na n-nyithu sansi pi n-yenwa nie thsüben. Mathu na no kekinyipen miwi ahhanshathu saben.

¹¹ Apvüwa, mathu mizza kiqa pi zü shaghaya thsülo; Mathu na mangwa sa khe sawegü pi cülo. Mathu ghinyithu tsüdi pacha pi cü; mathu ya nshagha neng thsü lalo.”

¹² Ma Benjamin mizza cüki khi: “Amizza hawa ha Apvüwa na ma tizen nu khweden; ma ghanan thangthang mathu hie benden, nu ma mathu jawi benden.”

¹³ Ma Josef mizza cüki khi: “Apvüwa na atsankegho sawegü pi mathu yyiwi chi, nu ayyi non wi atssübvü keshhughowa salo.

¹⁴ Mathu yyiwi atsanen mehai pi kedsau na bün, nu matsü kaghapen wila abila kemeziwa sa.

¹⁵ Mathu alamyi yyishiphon thu witsü kedsau bi kemehai na pong keyawa salo.

¹⁶ Mathu yyi tsüdi wi pala kemehai na pong keyawa sa; Apvüwa kemehai anni qhe keben wina ajüh kekhiwa na sawegü pi cü. Kesawegü hathu na Josef mizza miwi keghowa sa, kepaghenanye ma ma cünyuthu jawi aliwa sa.

¹⁷ Josef na amesü süpon kezü kesü ben, ma ghacüthu tsüna hadasi ghacü ti kesa. Ma ghacüthu tsüna Manasseh nyi hazar ju nu Efraim nyi hazar tagha. Ma tsüthu pi mizzatentithu shonthiaben, nu mathu shon pi ayyi kenten wi chiaben.”

¹⁸ Ma Zebulun nu Issakhar mizzathu cüki khi: “Zebulun ya mathu tssükedone senkesa wi mehai kayi keyawa saya thsü. Nu Issakhar ya ajjen wi keben-keyeng ji kayi keyawa sa.

¹⁹ Mathu na asangthu cipi mathu yikha wi chi, nu ciwi kemeshon hhanshathu saden. Mathu na atssükedone nu aghüsa hachan wi mathu keben-keyeng muya.”

²⁰ Ma Gad mizza cüki khi: “Anyiza sengle, ma mathu yyi sapi tisie kayi cü. Gad na ssensitemi ti hieben, ma ahacü zandhi nu alihyu shi cüben.

²¹ Mathu na ayyi kemehai ntsawa tsü mathu ghena khuya; accülikesawa shei pi mathu cü. Mathu na Apvüwa yenkhukechi nu ayenthu tsü nieya; Israel ccülikesathu na gweghe saghu keya wi.”

²² Ma Dan mizza cüki khi: “Dan na ssensitemi kaghani kesü, ma Bashan wina phenki shhuaben.”

²³ Ma Naftali mizza cüki khi: “Apvüwa kenen wina sawegü pi Naftali cü ntsa satheng. Mathu yyi na Galilee ghajü na cü acülawa cuben.”

²⁴ Ma Asher mizza cüki khi: “Amizza kepathu miwi sawegü pi Asher cütheng. Ma ya ma cünyuthu kenen pvü keyawa sa, nu ma yyi na oliv tonthu pong keyawa sa.

²⁵ Ma nyutithu kaghapeng jenka na amighe pi khwe keyawa sa, nu ma ciwi yazishu hang keyawa salo.”

²⁶ Israel nyithu, acenpvü kesüla nthu Nyiza ti kesa nmi, tangwi mehai ntsawa pvüdhiben, akulukeshü miwi na nthu kiqa ghoden.

²⁷ Anyiza na keshüthangla nthu kiqa gho, anuphanla ma kwen pi nthu kiqaden. Nthu na atujügüwathu ma nthu ghinyithu jügü, nu mathu tsüdi yasalo nthu kiza.

²⁸ Tsalina Jakob shicübvüghathu na cca hang, asu nu kisengtssü na pong keben yyi wi apvü-nsala, atssan wi atssü na dugho ayyi zügü keben witsü.

²⁹ Israel, no mang khatila anonghedha nu? Ciwi Apvüwa na hangshakeya mizzatenti kesüla no ti kesa nmi. Apvüwa tsüna nthu tsonhi nu njünnu, nthu khweya nu kekhang pi nthu cüben. Nthu ghinyithu na gho nthu wi nanketizen khieben, nu nthu na mathu cüten cüben.