AYENZHÜNENG 32 - Kemethajüh (N) (Re-editing) Bible (BSI)

¹ “Atssan nu ayyi, ijühkinalo, tetsaki nu hi mangwa khiben khe kinalo.

² Hi pi kesansijüh na atsanbi ti qanca dugho, nu ayyi miwi akejan cengya. Ijüh na atsankeghozü ti aghanglani miwi qanca, atsankegho kemehai ti aghang kaghani miwi dugho.

³ Hi Apvüwa nyan sengden, nu ma nyithu na ma kedi cüki khiden.

⁴ “Apvüwa na nthu kekhwe kekhangwa, ma len tsüdi wi cencu nu tsatan; Nthu Nyiza na jühtsentsa nu atsentsawa; ma kemehai nu kemeshonwa saden.

⁵ Isala nthu tsü jühtsentsa nsa, nu ma nyithu nsa qo; sami nu nyu mechu keten mizzatenti kesü.

⁶ Nthu kejüphon, kemeshen nkemi nyithu, nthu na Apvüwa tuwi hati kesau kwe? Ma nthu ba, nthu sahang kechiwa, ma nthu sapi mizzatenti kedi kesü sa cü.

⁷ “Sencüki meshen chilo, kheni wakesa cüki tsü; mangwa sa khe khipi nthu kizalo kesa nthu bathu wi keülo, sencüki khipi kizalo kesa anyi keqhaithu wi keülo.

⁸ Kemisintsa na ayyi pi mizzatentithu cü; anyithu na khiewi hangten khe ma npi wina kiden pi cüden. Ma Anyiza tsangathu anyi keji kezeng qae wina sapi cüden.

⁹ isala ma ma ghena Jakob shicübvüghathu kessiya.

¹⁰ “Ma mathu na ayyikeshü wi keqoedeja keten muya, keyisha ben kesü aghansha wi. Ma mathu khweya nu mathu noncca cü, tsüna ma ketanla ma khwekeya ti.

¹¹ Amumu na kepighe pi ma zza kaghani sansi, tsüthu tsü pi ma gisha zanshigü keben miwi chiya keten ti, Apvüwa na Israel khuli wa keten wi ghatiya.

¹² Apvüwa na asang cenpvü kekiqa nsenla ma ketanla ma nyithu ssi wa.

¹³ “Ma mathu ya ayyi kemisi penthu miwi kekhang sen thsü, nu mathu na ayyiwi mangwa shigü shagha khe tsü dsa. Mathu na alonshi jawi anikholi muya; mathu oliv tonthu na alon jawi mehaitsü shigü.

¹⁴ Mathu mesü nu anenithu wi tsenitssü kejon muya; mathu na khaghaneni, aneni, nu amesüsi kekunon ntsa, awhengsu nu kisengtssü kemehai ntsa ben.

¹⁵ “Apvüwa nyithu na ben kayi, isala ghazü pfü sa, mathu na atsse kemehai dsajjü pi kunon. Mathu na mathu sahangkechiwa Anyiza teshia, nu mathu hangshawa kekhang tsü meyala.

¹⁶ Mathu na tsikezhü kekinyi ghena Apvüwa sapi anonpvü thsüa; mathu nkemehai kesa ghena ma sapi aghepvü thsüa.

¹⁷ Mathu na ahhansha sapi ntsawa cenpvü nkenyethu tsü cü, mathu bamyithu na nkechü cenpvü ketheü, Israel na khiela ma jühkina nketen cenpvüthu tsü.

¹⁸ Mathu na mathu Nyiza, mathu hangshawa kekhang tsü malia, tsüna kahang pi mathu kecüwa.

¹⁹ “Apvüwa na khathansha wi ha muya khe ma aghepvü, nu ma tsangathu meyala.

²⁰ Ma khi, ‘Hi mathu kiqa ntendha, mathu miwi mangwa khati saten khe hi ghang chiden, leben dhu nu jühtsentsa nkesen nyithu ha.

²¹ Mathu na atsikezhü pi hi sapi aghepvü thsüa, mathu cenpvü tsentsa nkenyethu nan pi anonpvü. Tsalina hi mizzatenti kesü sen nu mathu sapi aghepvü thsüden; hi kejüphon mizzatenti kesü sen nu mathu sapi anonpvü thsüden.

²² Hi aghekepvü na anni ti qheden, ayyiwi pala tsüdi mecang thsüaben. Tsüna keshü yyi la cu nu ayikha ghazanthu mecang shaben.

²³ “ ‘Hi ketizenkesa kenten nkemi sengho mathu miwi chi, ilakusü tsüdi sen nu mathu shunden.

²⁴ Mathu na kaghama nu kemuwhe wina shüaben; mathu na khumakhujü nkemehai wina shüaben. Hi aghangsa nkemehai pi mathu ghan thsüaben, nu amaghang ji kepvüthu pi mathu mcü thsüaben.

²⁵ Aghikesa ghena lentonti wi keshü sengho ben, kemessi na nthu jjen pong shaben. Shenpfü nyibvü tegüthu na shüaben; memethu nu keqhaithu lela heisha nben.

²⁶ Hi mathu yasatha sa, nu anyi thola mathu meshen meyala kesale.

²⁷ Isala hi mathu ghinyithu ya inyithu chayale kesa khiela kapvü thsü meya cha, tsüwa tsü hi Apvüwa na mathu pacha pi cüle.’

²⁸ “Israel na kemeshen nkemi mizzatenti kesü; mathu na kemetsa nmitha.

²⁹ Mathu na mangkesa na nyu cha meyala khe chü meyala; mathu na mangwa saben khe chüshi meyala.

³⁰ Mangkesa na anyi hazar kesü na meshu kesü nchala, nu hazar tagha na meshu keni nchala nu? Kepaghenanye Apvüwa mathu Nyiza na mathu teshia; mathu Nyiza kekhangwa na mathu teshia.

³¹ Mathu ghinyithu na mathu cenpvü tsüna nkhang le kesa chüben, tsüna Israel Nyiza kekhang ti nye.

³² Mathu ghinyithu na Sodom nu Gomorrah nyithu ti meghangmeghe, kemeshentsse ton ma bi kekha nu aji kepvü kebün ti,

³³ nu amaghang ji nkemehai pi kisengtssü sa ketheng ti kesa.

³⁴ “Mathu ghinyithu na mangwa sa khe Apvüwa na chüben; ma matsü wina kemeten pi mathu cüle hieben.

³⁵ Apvüwa na ajukhikeya nu kemeten pi mathu cüben; matsü na gho lethu mathu na qanca shaben; mathu kededi tsathang na tetsakidha.

³⁶ Apvüwa na ma nyithu kezü nmila kesa mukeya wi ma mathu khushi yaben. Ma ma kekuli sa ketenthu nantizen cüaben, ma mathu kekiqa nmila keben mukeya wi.

³⁷ Tsaseng wi Apvüwa na ma nyithu keüben, ‘Nthu nondi keten cenpvü kekhangthu tsüna khie nu?

³⁸ Nthu na ahhansha kesa kethu pi mathu ghanja cü, nu kisengtssü pi mathu jjü thsü. Mathu ya khili gho nthu kiqa cülo, mathu ya bvügho nthu khushiya thsülo.

³⁹ “ ‘Hi ketan, hi Anyiza; Anyiza kepa wi nmi. Hi pathi nu kahang pi cüden, hi ayisü sa cü nu sapi mehai cüden. anyi thola hi kekuli tsü shunya nben.

⁴⁰ Hi anuphanla hangben, hi ikwen zanki nu kishen,

⁴¹ hi njünnu yiyha cwencwe saya, nu kemeshonwa kesa tsü ghang den. Hi ighinyithu miwi ajukhiya, nu kemeten pi hi nanmeghü ketenthu cüden.

⁴² Hi ilakusü pi mathu jjü keji thsü, nu njünnu pi hi matang ketenthu tsüdi süthi cüden. Hi ssisa ketenthu kesüla nheila pathiaben; ayisü kepvü nu atssüzüthu lela shüaben.’

⁴³ “Nthu mizzatentithu, Apvüwa nyithu senglo— ma kemeten pi mathu pathi ketenthu tsüdi cüden. Ma ma ghinyithu miwi ajukhiya, nu ma nyithu kesami teshi pi cüden.”

⁴⁴ Mosa nu Nun tsa Joshua manyi akhwi ha sa, isanu Israel nyithu na tsü zaya.

Mosa Kecükegwethu Sakhenwa

⁴⁵ Khathansha wi Mosa na Anyiza kecükegwethu hapi anyithu cü cenya khe

⁴⁶ ma khi, “Hi nansü pi nthu cü keben ayenkhukechi hathu tsüdi nieya metsilo. Tsüthu khineng khija pi nthu tsangathu kiza nu mathu na Anyiza kesansijüh tsüdi nie kaketsü saya thsüle kesalina.

⁴⁷ Kesansijüh hathu ha ma men nkemi jüh nye, isala tsüthu tsüna nthu kahangwa tsüle. Tsüthu nieyalo isalethu nthu na wa Jordan khhakawa ayyi yaya keten witsü kesie hangyaben.”

⁴⁸ Tsü ghan-nan Apvüwa na Mosa wi kiza,

⁴⁹ “Jerikho nyunutiwa kepeghewa Moab yyiwi Abarim Yikha witsü walo; Nebo Yikha wi ki nu hi Kanaan yyi pi Israel nyithu cüle keben tsü ghang chilo.

⁵⁰ Ncünyuwa Aaron na Hor Yikha wi shü kesa ti no la ayikha katsü miwi shüaben,

⁵¹ kepaghenanye nshinyi qho Israel nyithu tuwi na hi wi jühtsentsa nsala kesalina. Nshinyi na Zin ghansha wi Kadesh nyuti kete Meriba tssükebvüpen wi anyithu tuwi na hi kemetha kekhangwa tsü nkhichi la.

⁵² No alen kesie wina hi ayyi pi Israel nyithu cü keben tsü ghang chiben, isala no ciwi duya nben.”