AYENZHÜNENG 29 - Kemethajüh (N) (Re-editing) Bible (BSI)

Apvüwa na Moab yyiwi Israel ssinu Cenkethenjüh kesa:

¹ Hathu hana Apvüwa na Moab yyiwi Mosa kiza nu Israel nyithu ssinu Cenkethenjüh kesa: ha tsüdila Apvüwa na Sinai Yikha wi mathu ssinu cenkethenjüh kesa tsü miwi wwa kechi.

² Mosa na Israel nyi tsüdi cighu chi nu mathu wi khi, “Apvüwa na Ejipt kadimiwa, ma kekhu wi kedithu, nu ma diyyiwa tsüdi miwi mangwa khati sachi khe nthu ketanla muyadha.

³ Nthu na Apvüwa na sakechi adhagha nkemehai, zensuthu, nu amankesa kedi kekulithu muyadha.

⁴ Isala nansü kecu ma nthu ya nthu sakenan tsü jjügi pi nchü thsü.

⁵ Apvüwa na amapi jügha tsü ayyikeshü wi nthu ssi, nu nthu thsümeni nu accüguwen na nqae.

⁶ Nthu na amesa kedsa nmi nyelela kisengtssü nu kisengtssü kekhang lela kejjü nmi, isala Apvüwa na nthu nsenthu keyishü pi nthu cü nu ma nthu Nyiza le kesa nthu sansi cüle kesalina.

⁷ Nu ithu na apen hewi kegho wi Heshbon wi kadimiwa Sihon nu Bashan wi kadimiwa Og na gho ithu ssisa. Isala ithu na mathu chaya,

⁸ mathu yyi yaya, nu pi Reuben, Gad mizzathu nu Manasseh mizza gishü pahanthu jawi gishü cüa.

⁹ Nthu kekuli tsüdi wi mehai cenyale kesalina cenkethenjüh hawi keben tsüdila nie kaketsü sayalo.”

¹⁰ Nansü nthu tsüdila Apvüwa nthu Nyiza tuwi nganben — nthu ccülikesathu nu kedithu, npvüzathu,

¹¹ nzathu, ghanyithu, nu asang nthu jawi hang kebenthu, nu nthu ghena achan nu atssü pvü gho ketenthu.

¹² Nthu na nansü hewi Apvüwa nthu Nyiza na nthu ssinu cenkethenjüh hawi kishenle bendha,

¹³ isanu khili Apvüwa na ma nthu nu nthu bamyithu Abraham, Isak, nu Jakob wi khishiketheng ti nthu na ma nyithu nu ma nthu Nyiza le sadha.

¹⁴ Apvüwa na nthu ketan ssinu cenkethenjüh ha sa nu tsü nieyalo sa nbenle.

¹⁵ Ma ithu khili hewi ma tuwi ngan kebenthu tsüdi nu ithu shicübvügha npi kepvüghathu la ssinu ha saben.

¹⁶ “Nthu na Ejipt wi kahang nu kijünyi wa sen mizzatenti kepathu yyi pvüdhi kewa tsüna khati kesa khe chüben.

¹⁷ Mathu na achan, alon, rükatssü, nu suna pi nankiqanan tsikezhüthu tsü nthu na mudha.

¹⁸ Nansü hewi ngan kebenthu npvüza, nza, atheghi, nu mizzatenti thola Apvüwa nthu Nyiza wi khapeghe sen wa mizzatenti kepathu cenpvü tsü nkinyila metsilo. Hana nthu jawi achan ghazan kekha kesü shigü shagha aji chan kesü ti saben.

¹⁹ Nansü kekishen jüh ha za keyathu anyi thola ma ketanla ma leben dhu nu ma kemeshen sa bvü lela pala tsüdi ma ghena mehaibenle nsala metsilo.

²⁰ Apvüwa na anyi hati kesawa kesami teshi pi cü nben. Tsüti kesawa nye, Apvüwa leben ketsu na anyi tsüwa mecang, nu Apvüwa na ma yasatha npi sakeya chu lesüshen hawi zhü ketheng ketizenkesa tsüdila ma miwi ghoaben.

²¹ Apvüwa na ma pi Israel mizzathu tsüdi tuwi tsütsonca kesü sa, nu Apvüwa kesansijüh lesüshen tsüna cenkethenjüh hawi zhüketheng kishen-keshithu tsüdi kenie wina agükeccü sen nu ma miwi ghoaben.

²² “Abvüye ghaketen wi nthu shicübvüghathu nu ayyi lenkesie wi asangthu na Apvüwa na agükeccü nu ketizenkesa sengho nthu yyiwi kechi tsü mu yaben.

²³ Allithu wi mangla nmila nu alonkemecang nu amcü ketan sa: mangla pi yang meyala nu kepaghathu lela nshhugho laben. Nthu yyi na Apvüwa na aghepvü ntsa sa keben wi yasakesa nyunutithu Sodom nu Gomorrah, Admah nu Zeboiim tsüti saben.

²⁴ Tsaseng wi ayyi mabenla keü ben, ‘Mangkesa Apvüwa na mathu yyiwi hati sa nu? Ma jjügi mangwa ghena ma aghepvü ntsa sa nu?’

²⁵ Tsü keluneng na, ‘Tsüna Apvüwa nyithu na mathu bamyithu Nyiza na Ejipt wina mathu ssi keshhugho wi mathu na ma ssinu cenkethenjühwa tsü pakhhi kesa ghena le.

²⁶ Mathu na kheni kinyi nketen Apvüwa na mathu tsü nkinyi lalo kesa cenpvü kepathu tsü kekuli sa wa.

²⁷ Tsalina Apvüwa na ma nyithu miwi aghepvü nu lesüshen hawi zhü ketheng ketizenkesathu tsüdi sengho mathu yyiwi chi.

²⁸ Apvüwa na aghepvü ntsa sa, nu ma ghekepvü keti wina mathu yyiwi mathu pfüshi pi mathu nansü wa keben asang yyiwi tsü cü chile.’

²⁹ “Ciwi Apvüwa ithu Nyiza na pala pahan pi kuthitheng; isala ma ma Yenwa tsüpi ccüca, ithu nu ithu shicübvüghathu na anuphanla tsü nieden.”