AYENZHÜNENG 28 - Kemethajüh (N) (Re-editing) Bible (BSI)

Ajühkeya Ghena Kesawegüthu

¹ “Keujüla nthu na Apvüwa nthu Nyiza jühkina nu hi nansü pi nthu cü keben ma yenthu tsüdi nie kaketsü saya lethu, ma nthu sapi ayyiwi mizzatenti kepathu miwi diki cüaben.

² Apvüwa nthu Nyiza jühkina yalo; isalethu kesawegü hathu tsüdi nthu ji saben:

³ “Apvüwa na sawegü pi nthu nyunuti nu nthu lli wi chicü ben.

⁴ “Apvüwa na sawegü pi nthu cü nu atsanga, yangdsaketen, amesüsi, nu khaghaneni kejon benyaben.

⁵ “Apvüwa na sawegü pi nthu shijü nu keben kethengpen wi chicü ben.

⁶ “Apvüwa na sawegü pi nthu kedukeshhu tsüdi wi chicü ben.

⁷ “Nthu ghinyithu na nthu ssikaghashen kegho wi Apvüwa na mathu chayaben. Mathu na alen kesü wina nthu ssikaghashen ghoben, isala mathu na nthu wina alen tsüdi wi bvüzigheaben.

⁸ “Apvüwa nthu Nyiza na sawegü pi nthu kekuli wi chicü nu nthu na asu pi nthu sabe pongya ben. Ma ayyi pi nthu cü keben witsü sawegü pi nthu cüben.

⁹ “Keujüla nthu na Apvüwa nthu Nyiza jühkina nu ma kekhi tsüdi sa lethu, ma khishiketheng ti nthu pi ma nyithu sayaben.

¹⁰ Isathu ayyiwi anyi tsüdila Apvüwa na nthu kessi pi ma nyithu sayadha le kesa muya, nu mathu na nthu messiaben.

¹¹ Apvüwa na ayyi pi nthu cüle nthu bamyithu wi khishiketheng yyiwi tsü atsanga, amesüsi, nu yangdsaketenthu meshu-menna kesa pi nthu cüben.

¹² Ma tangwi ma keben jjen wina matsü wi atsankegho kesunchi nu sawegü pi nthu kekuli tsüdi wi chi, isanu nthu na keben pi mizzatenti kejon nna thsü, isala nthu na nyu wi mangla nna nben.

¹³ Apvüwa nthu Nyiza na mizzatenti jawi nthu sapi nyu keniewa nyela nyu ccülikesathu sa thsüaben; nthu na hi nansü pi nthu cü keben ma yenkhukechithu tsüdi nie kaketsü saya lethu, nthu na khiela nmehaila kesawa nyela keshüthangla mehai kayi waben.

¹⁴ Nthu na katsüha sa lela tsüthu n-niela nsala nyelela acenpvü kepa wi kinyi nu kekuli nsala.

Ajüh nkeya ghena Kishen-keshithu

¹⁵ “Isala nthu na Apvüwa nthu Nyiza jüh meya nu hi nansü pi nthu cü keben ma yenkhukechi nu ayenthu tsüdi nie kaketsü sa meya lethu, kishen-keshi hathu ha tsüdi nthu miwi ghoaben:

¹⁶ “Apvüwa na kishencü pi nthu nyuti nu alli miwi chiaben.

¹⁷ “Apvüwa na kishencü pi nthu nu nthu shijü nu keben kethengpen miwi chiaben.

¹⁸ “Apvüwa na kishencü pi nthu miwi chi nu nthu atsanga, yangdsaketen, amesüsi, nu khaghanenithu keu ketan muya ben.

¹⁹ “Apvüwa na kishencü pi nthu kedukeshhu tsüdi wi chiaben.

²⁰ “Keujüla nthu na nkemehai kuli nu Apvüwa meya mvula lethu, ma wan nthu npi keyasa chu agükeccü, chükivvü, nu ketizenkesa sengho nthu kekuli tsüdi miwi chiaben.

²¹ Nthu na wala ayyi yaya keten witsü nthu kesütanla keben chu ma khumakhujü kesun pi nthu miwi chia ben.

²² Apvüwa na kesakinaa ghei kekali keten, avünen, nu kemuwhe pi nthu metenmesha; ma kemegi nu ghani kisa kesun pi nthu yangdsaketenthu yasa cüben. Nthu npi keshükhi chu agükeccü hathu na nthu miwi benben.

²³ Atsangho thsü nben, nu nthu yyi na khang pi amighe ti saben.

²⁴ Atsankeghowa nyela Apvüwa na ayyinikhu nu ahachan kesun pi nthu yasakhiaben.

²⁵ “Apvüwa na nthu ghinyithu ya nthu miwi khangya thsüaben. Nthu na alen kesü wi mathu ssikaghashen ben, isala nthu na mathu wina alen tsüdi wi bvüzigheaben, nu ayyiwi anyi tsüdila nthu miwi mangwa khati sadha khe muya nu mathu qhethiketen saben.

²⁶ Nthu na shü lethu awathu nu aghangsathu na gho nthu kamang dsaben, nu ciwi thola tsüthu jügü pi bvü thsü nben.

²⁷ Apvüwa na ma Ejipt nyithu miwi kesa ti avünen kesun pi nthu miwi chiaben. Ma nthu gwo maben wi khumakhujü shhugho thsü nu kemithi na pong shaben, nu tsüna maya nben.

²⁸ Apvüwa na nthu leben sapi deja thsü, nu anyon nkemu nu chükivvü pi nthu miwi gho thsüaben.

²⁹ Nthu na ghanan lapvü lela anyon nkemu ti ketsüh nu nthu len bha meyala saben. Nthu kekuli mang wila mehai kayiya nben. Nyu na keshüthangla nthu pasha nu tengdsa lela ciwi thola nthu kiqa nben.

³⁰ “Nthu na awubvü kesü kinatheng lela anyi kepa na tsü ssiben ben. Nthu na ajjen kesü satheng lela ciwi hangya nben. Nthu na kemeshentsse lli kesü cahben lela ma bi dsaya nben.

³¹ Nthu nyon kemu wina nthu mesüsi pathi, isala nthu khiela ma sa dsaya nben. Nthu tuwi na nyu nthu gadathu ssibvü nu tsüthu ssi neng gho nthu cü nbendha. Nthu khaghaneni pi nthu ghinyithu cüaben, nu ciwi thola nthu kiqa nben.

³² Nthu nyon kemu wina nthu tsangathu pi asangthu nssümagha sa thsüaben. Ghanan kaghapenla nthu na nthu tsangathu kegho neng nmvula ghang tagha saben.

³³ Asang mizzatenti kesü na nthu na agüccü ntsa kuli ketheng yangdsaketenthu tsüdila khuya nu nthu na mangla nmula kemeten-kemesha nu kepasha muki benben.

³⁴ Nthu ketizenkesa na nthu sapi deja wa thsüaben.

³⁵ Apvüwa na kesakinaa, khumakhujü ma-nkeya pi nthu ccü pong; avünen na nthu li na cü accü kecu pong shaben.

³⁶ “Apvüwa na nthu nu nthu kadimiwa ssinu nthu nu nthu bamyithu la nkahang pen asang yyi kesü wi wa ben; ciwi nthu na achan nu alon pi kesa cenpvü kekuli saben.

³⁷ Apvüwa na nthu pi bvüzighe thsüa keten diyyithu wi anyithu na nthu miwi mangwa khati sadha khe mathu qhethiketen sa; mathu na nthu nankeqhe nu khipi nyu pangpi saben.

³⁸ “Nthu na amacü kejon pi chi lela asu keu ketan wwi yaben, kepaghenanye ashiqa na nthu ji yangdsaketen dsakhiaben.

³⁹ Nthu na kemeshentsse lli cah nu nonccaben, isala nthu na ma bithu saghuya nyelela pi ma tssü sa jjüya nben, kepaghenanye ma ghei na kemeshentsse dsakhiaben.

⁴⁰ Oliv tonthu na nthu yyi tsüdi wi shigü ben, isala nthu ma bi muya nben, kepaghenanye oliv na keshu khiaben.

⁴¹ Nthu na atsangathu benyaben, isala nthu na mathu gweghe benhhai nben, kepaghenanye mathu pi aghi tssüzüthu sala ssibvüaben.

⁴² Pala ghei na nthu chantonthu nu yangdsaketenthu tsüdila dsakhiaben.

⁴³ “Asang nthu yyiwi hang kebenthu na misi pfüpfüthu nthu na mini pfüpfü saben.

⁴⁴ Mathu na apisa ben nu pi nthu nna thsü, isala nthu tsü mangla nmi nu pi mathu nna thsüya nben. Asakhen wi mathu na nthu miwi kekhang senyaben.

⁴⁵ “Agükeccü hathu tsüdila nthu miwi ghoaben, nu nthu npi keyasakhi chu tsüthu na nthu miwi benben, kepaghenanye nthu na Apvüwa nthu Nyiza jüh nkina nu ma yenthu pi nthu kecü tsüdila nie meyala.

⁴⁶ Tsüthu na anuphanla nthu nu nthu shicübvüghathu ghena Anyiza kemeten zensu saden.

⁴⁷ Apvüwa na alentagha wi sawegü pi nthu cü, isala nthu na nthu leben wi anonghe nu anonkwenthi ma kekuli nsala.

⁴⁸ Tsalina nthu na Apvüwa na kesun pi nthu shun thsü keten ghinyithu kekuli saden. Nthu na ghama, dighe, nu kemissü — tsüdi wi hhatuben. Apvüwa na nthu npi keyasakhi chu khang ntsa nthu pasha ben.

⁴⁹ Apvüwa na ayyi kenten wi mizzatenti kesü nthu na mathu jühjja nkechü nyi ssigho nthu shunben. Mathu na amumu kesü ti nthu miwi dugho ben.

⁵⁰ Mathu na daggü nu anyi ghanyile keqhai lela nantizenchi nben.

⁵¹ Mathu na nthu sahangthu nu asu dsakhi nu nthu na khwenthi shüaben. Mathu na asu, kisengtssü, oliv deli, mesüsi, nyelela khaghanenithu mangla teshi pi nthu theng cü nben; nu nthu na shüaben.

⁵² Mathu na Apvüwa nthu Nyiza na pi nthu kecü nyuti tsüdi ssisaben, nu nthu na nondi keten akhweti kemisithu na qanca shaben.

⁵³ “Nthu ghinyithu na nthu nyutithu ssikaghashen kegho wi nthu na kedsakejjü hhatu ntsa sa nu Apvüwa nthu Nyiza pi nthu kecü nthu tsangathu tsü lela pathi dsaben.

^54-55 Ssikaghashen keben jüwi tsü nthu jawi anyi kemehai ntsawa lela kedsakejjü hhatu ntsa sa kesalina ma tsangathu pathi dsaben. Ma tsü sa keula pi ma cünyuwa, ma kenenwa ma wubvü nyelela ma tsanga kepathu lela cü nben.

^56-57 Nthu jawi nza kemehai ntsawa, ma ben ntsawa nu ma ccü pi alentsen sen nu khiewila npi kewa wa lela tsü makesü saben. Aghinyi na ma nyuti ssikaghashen kegho wi ma kedsakejjü hhatu ntsa sa kesalina ma kuthila ma ketanla ma tsanga nu ma pvügha meyi ashi la dsaben. Ma tsüpi ma wuba ma kenenwale nyelela ma tsanga kepathu lela cü nben.

⁵⁸ “Keujüla nthu na Anyiza kesansijüh lesüshen hawi zhüketheng tsüdila nie kaketsü sa meya nu Apvüwa nthu Nyiza nyankethang amankesawa tsü kinyikü meyala lethu,

⁵⁹ ma khumakhujü ma-nkeya nu khen nkeya adhagha kesun pi nthu nu nthu shicübvüghathu miwi chiaben.

⁶⁰ Nthu kheni Ejipt wi sakenan ti ma kheneng khumakhujü nkemehaithu tsüdi sen nu nthu miwi ghoaden, nu nthu khiela mehaiya nben.

⁶¹ Ma Anyiza yen nu kesansijüh lesüshen hawi khi nketheng kesakinaa kepapa kesa nu adhaghathu tsüdila kesun chiaben.

⁶² Nthu na jipi tangwi ghotsithu ti saben lela nthu keu ketan hangyaben, kepaghenanye nthu na Apvüwa nthu Nyiza jüh meyala.

⁶³ Apvüwa na ma kenen wina nthu sapi mehai kayi nu ji kayi kecü tsüti ma nthu yasa nu dedi thsü kesa la ma kenen saben. Nthu na wala ayyi yaya keten witsü nthu pfüshi piaben.

⁶⁴ “Apvüwa na nthu jügüzighe pi ayyi kenten kesü wina wa pahanwa kecu mizzatentithu tsüdi jawi chiaben, nu ciwi nthu na kheni nthu le nthu bamyithu lela kinyi nketen achan nu alon pi kesa cenpvüthu tsü kekuli saben.

⁶⁵ Nthu na khiewila kecca muya nben, nu apen kesüla pi nthu ji le khiya nben; Apvüwa na leben gükeccü, hathakina, nu kaghang nkemi pi nthu pong cüaben.

⁶⁶ Nthu kahang wi keshüthangla kemessi na benben. Aghanan nu aghaja lela nthu na kemessi pi pong pvü, nu nthu na keshü kemessi wi hangben.

⁶⁷ Nthu na pala mukeya tsüdi wila nthu leben dhendhe saben. Nthu na aghanen lethu aghajale kheshülan, nu aghaja lethu aghanenle kheshülan isa khiaben.

⁶⁸ Apvüwa na ma nthu Ejipt wi wa neng nbendhale khitheng lela ma nthu pi ahunjjen wina ciwi kesun nengchiaben. Ciwi nthu ketanla nthu ghan pi nthu ghinyithu wi nssümaghathu sala jeüaben, isala thola nthu nshü mvula saben.”