AYENZHÜNENG 25 - Kemethajüh (N) (Re-editing) Bible (BSI)

¹ “Keujüla Israel nyi meshu keni ajüh kaghakhipen wi kicennali südhe wa nu kesü kesami nmi nu kepawa na sazzile khia.

² Anyi kesazziwa tsü kekiccü-u sa lethu, pendhewa na ma pi nkhwen thsü nu kihhe ben. Ma kesami sa kesa qei wina kihhe ben.

³ Jügha tughu cen ma kihheya mehai, isala tsü miwi jiya nben; tsü miwi ji lethu tsüna nyu tuwi ma kimenni shaben.

⁴ “Nthu na amesü süpon ssinu asu ghaceng keben wi ma pang nbhela.

Acünyu Shü kesawa ghena Kekuli

⁵ “Keujüla cünyunyi keni gweghe hang keten wi kesü na atsa nmila shü lethu, ma wubvü tsüpi ma theghi nkenye nyu kepa wi n-nuwa thsü nsala; anyi shü kesa cünyuwa na nzawa tsü keyau le.

⁶ Manyi atsa mukeya atuwa tsüpi anyi shü kesawa mithon saben, isanu Israel jawi ma theghishi na benki waben.

⁷ Isala shü kesa cünyuwa na nzawa tsü meya mvu lethu, nzawa na anyuti wi ccülikesathu tuwi wa khiben, ‘Iwuba cünyuwa na imiwi ma kesau nsale; ma Israel nyi jawi ma cünyuwa shicübvügha kesü la nben thsü mvu laben.’

⁸ Isalethu anyuti ccülikesathu na ma cichi nu ma ccüneng ben. Ciwi la ma nzawa tsü meya mvu lethu,

⁹ ma cünyuwa wubvü na ccülikesathu tuwi na whala ma ccüguwen kesü khushiya, ma mmi meshuki nu khiben, ‘Anyi kesü na ma cünyuwa shicübvügha kesü la nben thsü mvula ketenwa miwi hati saben.’

¹⁰ Israel nyi jawi ma theghi tsüpi ‘anyi kesü nyu ma ccüguwen khushiya kesawa theghi’ isa ciben.

Ayen Kepathu

¹¹ “Keujüla npvüza keni na kesali nu kesü wubvü na ma wuba kiqala anyi kepawa mcah tenen lethu,

¹² nzawa tsü nantizenchi nsala ma kwen dendhilo.

^13-14 “Nthu na kewhu nu kedegü wi nyu nmechula.

¹⁵ Kewhu nu kedegü wi atsentsa salo; isanu Apvüwa nthu Nyiza na ayyi pi nthu cü keben witsü nthu na kesie hangyale kesalina.

¹⁶ Apvüwa na anyi nyu kemechuwa tsü nanmeghü den.

Amalek Nyithu Pathilo Khikechi

¹⁷ “Amalek nyithu na nthu Ejipt wina shhugho keten nthu miwi mangwa sachi khe meshen yalo.

¹⁸ Mathu na Anyiza kemessi nkemi ghena nthu na agüccü nu nchala kesa seng wi asengwa na gho nthu ssisa nu anyi aseng wi ketenthu tsüdila pathi khile.

¹⁹ Tsalina Apvüwa nthu Nyiza na ayyi pi nthu kecü witsü nthu yala nthu ghinyithu na nthu vü keben tuwi yazishu benkeya thsü seng wi Amalek nyithu tsüdi pathi metsilo, isanu anyi kesüla mathu meshen meya thsülale kesalina. Tsü nmali lalo.”