AYENZHÜNENG 24 - Kemethajüh (N) (Re-editing) Bible (BSI)

Keyisha nu Keshanyi neng

¹ “Keujüla npvüza kesü na nza kesü yaya nu tsaseng wi ma n-nenla meyatha le khi, kepaghenanye ma nzawa cüki ma nkenen pahan muya kesalina. Tsalina ma keyisha lesü zhüpi nzawa cü nu ma jjen wina kesun pi bvü thsüa.

² Tsaseng wi nzawa na anyi kepa wi n-nuwa,

³ nu anyi tsüwa la ma n-nenla meyadha le khi, tsalina ma la keyisha lesü zhüpi nzawa cü nu ma jjen wina kesun pi bvü thsüa. Nyelela ma wuba keniwa tsüna shü.

⁴ Katsüha sa lela ma wuba atuwa tsüna ma ya neng keya nmi; ma nza tsü keyasawa sadha. Keujüla ma nzawa tsü ya neng lethu tsüna Apvüwa tuwi nankiqanan kekuli kesü saben. Apvüwa nthu Nyiza na ayyi pi nthu cü keben witsü nthu na kesami nkemehai ha sayishü.

Ayen Kepapa Kesa

⁵ “Anyi kesü keshanyi sategü wi pi süpahi nyelela azitenti kekuli nsa thsüla; ma ya amapi kesü ma jjenwi ben nu ma wubvü kenenwa saya thsüle kesalina.

⁶ “Nthu na pala pahan pi anyi kesü nna thsü lethu, nthu na tsü khiteshan ghena ma wi asu kenyeggüji alon tsü khuya nsala. Tsüna ma theghi na kedsakejjü sen nu hang keten ji sen bvüdha.

⁷ Anyi thowa na no Israel nyi ghan sen wa ma magha sa thsü nyelela pi nssümagha sa jeü khe ma pi shü thsüaben. Hatinu nthu jawi nkemehai ha samethaben.

⁸ “Nthu na agükedsakenaa pvüten lethu, Levi nyi keqhaikedithu na nthu kekiza tsüti salo; hi kecükegwe pi nthu kecü tsü nieyalo.

⁹ Nthu na Ejipt wina shhugho keten Apvüwa nthu Nyiza na Miriam miwi mangwa sachi khe meshenyalo.

¹⁰ “Nthu na pala pahan pi anyi kesü nna thsü lethu, nthu na ma jjen wi ma athsümeni pi khiteshan keben tsü yale ndula;

¹¹ akhemi wi ma hiebenla nu ma ketanla tsü sen shhugho thsülo.

¹² Keujüla ma ketha-u lethu tsüpi aghaja wi nthengla;

¹³ ma ya tsü sen nu jenya thsüle kesalina aghaja kaghapenla tsüpi ma cü neng neng salo. Isalethu ma no seng ben, nu Apvüwa nthu Nyiza na nmiwi anonghe ben.

¹⁴ “Nthu nyutithu wi hang keten asang sale no Israel nyi sa lela ketha-u nu kehhatu nyi kesü ghena amagha sala melli ketenwa tsü nmechula.

¹⁵ Ghanan kaghapenla aghani npi kedu wina ma kutimen tsüpi ma cü; ma apisa nsenthu yishü nu tsü meshenkiben. Nthu na pi ma ncü lethu ma Apvüwa wi maghala nthu shunthu nthu na kesami saben.

¹⁶ “Atsangathu na kesami sa kesalina mathu bajjathu pi shü thsüya nben, nu abajjathu na kesami sa kesalina mathu tsangathu la pi shü thsüya nben; anyi kesüle kesü lela ma ketanla ma kesami ghena pi shü thsüaben.

¹⁷ “Asangthu nu maghamaghangthu kemeshonwa tsü nkhichila nsala; amenkepvü khiteshan ghena denyilewa thsümeni khuya nsala.

¹⁸ Nthu na Ejipt wi nyu nssümagha sa nu Apvüwa nthu Nyiza na nthu lishachi kecü tsü meshenyalo; tsalina hi ayenkhukechi hapi nthu cüben.

¹⁹ “Nthu na alliwwi kewa wi asu kemeshü pahan mali lethu, kheneng wa tsü khu meyala; tsü teshi pi asangthu, maghamaghangthu, nu denyilethu ghena theng cülo, isalethu Apvüwa nthu Nyiza na nthu kekuli tsüdi wi sawegü cüben.

²⁰ Nthu na oliv bi la wa lethu, kheneng wa teshi kesathu tsü meyala; tsüthu tsüna asangthu, maghamaghangthu, nu denyilethu ghena sadha.

²¹ Nthu na kuti kemeshentsse bi tsü laya lethu, kheneng keni tughu nwa lalo; kemeshentsse bi teshi kesathu tsüna asangthu, maghamaghangthu, nu denyilethu ghena sadha.

²² Nthu na Ejipt wi nyu nssümagha kesa tsü nmali lalo; tsalina hi ayenkhukechi ha salo pi nthu cüben.”