AYENZHÜNENG 23 - Kemethajüh (N) (Re-editing) Bible (BSI)

Apvüwa nyi jawi na Khushikesa

¹ “Anyi kesüle kesü lela ma mcah-sa nyelela ma tsigwo handhi kesa nyi pi Apvüwa nyi jawi nsaghula.

² “Nyu matsa nyi nyelela hati kesa nyi shicübvügha abvüye tagha wi lela pi Apvüwa nyi jawi saghu keya nmi.

³ “Ammon nyelela Moab nyi nyelela mathu shicübvüghathu kesüla abvüye tagha wi lela pi Apvüwa nyi jawi saghu keya nmi.

⁴ Nthu na Ejipt wina shhugho keten mathu na atsse nu atssü pi nthu ncü mvula sa, nu mathu na Mesopotamia wi Pethor nyuti wina Beor tsawa Balaam melli sengho nthu kishencü thsüle sa.

⁵ Isala Apvüwa nthu Nyiza na Balaam jühya nkesa; tsüti kesawa nye ma kishen-keshi pi kesawegü sacü, kepaghenanye ma nthu tizen kesalina.

⁶ Nthu na mizzatenti kesü sa keben chu mizzatenti hathu kiqa nu mathu mehai kayi wa thsüle kesa mangla nsa lalo.

⁷ “Edom nyithu tsü nanmeghü nsala; mathu na nthu shilithu le. Nu Ejipt nyithu nkhichi nsala; kepaghenanye nthu na kutijü mathu yyiwi hang le.

⁸ Abvüye kecheng nten na mathu shicübvüghathu pi Apvüwa nyi jawi saghuya mehai.

Süpahithu Kemnanpen Metha-menasi kesa

⁹ “Nthu na aghi tsüwi kemnanpen wi keben wi pala nthu sapi keccüna wi nmetha thsüla kebenthu tsü ghü yalo.

¹⁰ Keujüla anyi kesü na aghaja wi ma gwotssü keji kesa ghena nmethala ben lethu ma ya kemnanpen ameiwa shhula benla thsülo.

¹¹ Minulen wi ma ketanla ma samethaya nu aghani kedu pang witsü ma kemnanpen wi duya mehai.

¹² “Nthu na kemnanpen na ameiwa wi nthu kujung ben kemehai kesü nbenthu yishü.

¹³ Nthu na akhhatssü kesü pi nthu tsanqai ti khusen nu nthu na ayyiku kesü chhü nu ku chithu tsüpi kejjübhon lo.

¹⁴ Nthu kemnanpen tsü methasi benlo; kepaghenanye Apvüwa nthu Nyiza na nthu khwe nu nthu ghinyithu miwi khangkeya pi nthu cüle kesalina kemnanpen wi nthu ssi benden. Nkeji kekuli mangla nsala tsüna Apvüwa sapi nthu wina khapeghe bvü thsüaben.

Ayen Kepapa Kesa

¹⁵ “Keujüla nssümagha kesü ma pvüwa wina bvüsen nthu wi khweyale gho lethu ma kesun pi nbvü neng thsüla.

¹⁶ Ma nthu nyuti kesüle kesü wi lela ma kenen pen wi hangya mehai, nu nthu na ma tuwi mehaitsü nsathu yishü.

¹⁷ “Israel nyi nza sale npvüza sa lela kekinyijjen wi keqheza menkedsa nyi sakeya nmi.

¹⁸ Nthu na Apvüwa nthu Nyiza wi kekishen tsü kesa wi la keqheza wi apisa mellikeya tsü senghoya nben. Apvüwa na kekinyijjen wi keqheza menkedsa nyi tsü nanmeghü den.

¹⁹ “Khathansha wi nthu na apisa, atsse, nyelela katsüha lela pi no Israel nyi nna thsü khe ma wi kekiyi meyala.

²⁰ Nthu na mangwa pi asangthu nna thsü khe kekiyi yaya mehai, isala no Israel nyi wi tsü kekiyi meyala. Ayen ha nieyalo; isalethu Apvüwa nthu Nyiza na nthu wala ayyi yaya keten witsü nthu kekuli tsüdi wi sawegü cüben.

²¹ “Khathansha wi nthu na Apvüwa nthu Nyiza wi kekishen sa khe nthu na sale khishiketheng tsü kijü nbenla; Apvüwa na nthu kekishen tsüpi nthu miwi chiben, nu tsü n-niela kesa tsüna kesami kesü.

²² Apvüwa wi kekishen nkesa tsüna kesami nye,

²³ isala nthu kekhishi kesü sa lethu tsü nieya metsilo.

²⁴ “Nthu na nthu jenphonwa kemeshentsse lli pvüdhi wa lethu nthu kedsamvu kemeshentsse bi tsüdi dsaya mehai, isala nthu na tsüpi pala khang kesü wi chi pvü nbvü lalo.

²⁵ Nthu na nthu jenphonwa lli pvüdhi wa lethu nthu kwen pi asu tsüdi mahang dsaya mehai, isala nthu na kicükhhagha pi asu tsü kesüla nwwi lalo.