AYENZHÜNENG 21 - Kemethajüh (N) (Re-editing) Bible (BSI)

Nyu kepathithu Ghena Cen-nkeya

¹ “Keujüla anyi kesü na Apvüwa nthu Nyiza na ayyi pi nthu cü keben witsü alli wi anyi pathi ketheng muya, nu nthu na thowa na ma pathi khe nchü.

² Isathu nthu ccülikesa nu pendhethu na wala akamang mukeya ben nu tsü kevü wi anyutithu tsüdi jü tsü kedegüben.

³ Tsaseng wi akamang mukeya ketsaki ntsawa nyuti wi accülikesathu na amesü zza kaghani ssinu kekuli npi kesa kesü kessiyaben.

⁴ Mathu na tsü ssinu atssü na ngen nketen ghaku kesü kete wi wa nu mathu na ciwi amesü sun tsü widhiaben.

⁵ Levi nyi keqhaikedithu la ciwi waben, kepaghenanye mathu na yasayala kesa jjügi tsüdila südheden. Apvüwa nthu Nyiza na mathu kessi pi ma kekuli sa thsü nu ma nyan wina kesawegü khi thsüden.

⁶ Isanu anyi nyu ma pathi kesawa kamang kemu pen ketsaki ntsawa anyuti tsüwa wi ccülikesathu tsüdi amesü tsü miwi mathu kwen metsi

⁷ nu khiben, ‘Ithu na anyi ha npathi le, nu thowa na ma pathi khe ithu na nchü.

⁸ Apvüwa, n-nyi Israel no Ejipt wi kekasha keyathu kesami teshi cülo. Ithu kesami teshi cü nu anyi kesami nkemiwa kepathi khhi hapi ithu miwi nchi lalo.’

⁹ Tsalina Apvüwa na salo kesa wina anyi kepathi khhiwa tsüpi nthu miwi nchilaben.

Nzathu Aghi Tssüzükesa

¹⁰ “Apvüwa nthu Nyiza na aghi wi kekhang pi nthu cü nu nthu na atssüzüthu ghanya lethu,

¹¹ nthu na mathu jawi nza tsikemehai kesü nthu kenen muya nu ssiben mvu lethu,

¹² ma ssinu nthu jjen wi wha ma licah nu ma mezzen ce,

¹³ nu ma thsümeni kemililo. Ma nthu jjen wi ben nu asha kesü ma bajja ghena anongü, tsaseng wi ccüna nthu na ma ssibenya mehai.

¹⁴ Tsashi wi nthu na ma n-nenla lethu ma teshi pi ma kemeshen sa bvü thsülo. Nthu na ma meten nu ma ssimehai kesalina ma pi nssümagha ti sa nu pi jeüya nben.

Atsa Tssütsewa na Keben-keyeng Ghongkeya

¹⁵ “Keujüla anyi kesü na ma wubvü keni ben, nu manyi qho atsa pvügha cü, isala atsa tssütsewa tsüna ma wubvü ma kenenwa tsa nye.

¹⁶ Ma keben-keyeng pi ma tsathu kegishü tsathang wi ma nankepapa sa nu atsa tssütsewa shei tsüpi ma wubvü ma kenenwa tsa tsü cüya nben.

¹⁷ Ma tsa tssütsewa tsüna ma wubvü ma kenenwa tsa nyelela ma keben-keyeng ashei keni pi ma cüben. Anyi kesü na ma tsa tssütsewa tsü chü nu ma shei ma kemu-u tsüpi ma ncüthu yishü.

Ajüh Nkeya Tsawa

¹⁸ “Keujüla anyi kesü na leben kedhu nu kematang tsa kesü ben, atsa kesü ma bajja na ma sansi lela ajüh meya.

¹⁹ Ma bajja na ma ssi wa anyuti tsüwa wi ccülikesathu tuwi ajühkaghakhi ben.

²⁰ Ma bajja na mathu wi khiben, ‘Ishinyi tsa ha leben dhu nu nyu matang nu ishinyi jüh meyala hhagheden; ma apisa pi yasa nu adikina nyi kesü le.’

²¹ Tsaseng wi anyunuti wi anyithu na alon pi ma kecenthiaben, isanu nkemehai hawi nthu na shhuyaben. Israel jawi tsüdila mangwa khati sadha khe zaya nu messiben.

Ayen Kepapa Kesa

²² “Keujüla anyi kesü ma kesami ghena pi shü thsü nu ma kamang na achan wi hagiben lethu,

²³ ma kamang tsüna aghaja chuli ciwi ben thsü nben. Tsü ghanan na tsüpi vhülo, kepaghenanye akamang achan wi hagi keben tsüna Anyiza kishen-keshi sengho ayyiwi chiaben. Akamang tsüpi vhülo, isalethu, nthu na Apvüwa nthu Nyiza na ayyi pi nthu kecü tsü kekinyen sa nben.”