AYENZHÜNENG 19 - Kemethajüh (N) (Re-editing) Bible (BSI)

Kuthikeya Nyunutithu

¹ “Apvüwa nthu Nyiza na anyi tsüthu yasa nu mathu yyi pi nthu cü keben tsü nthu na mathu nyunutithu nu ajjenthu yaya nu ciwi benkeya seng wi,

^2-3 ayyi tsü gishü pi kecheng saya, gishü kesüsü wi anyunuti lekete wa cuya kemehai kesü na benyalo. Isanu anyi kesü na nyu pathimi lethu bvü wa anyuti kesü wi n-nieya thsülo.

⁴ Keujüla anyi kesü na aghandu nyela ma ghinyi nkenyewa pathi lethu, ma bvü wa anyunuti hathu wi yazishu benya mehai.

⁵ Tsütsonca kesü, keujüla anyi meshu keni gweghe agheja wi achan shüchi wa, nu manyi na achan kesü shüchi keben wi ampvü na ma khuki wina shhu pi kesüwa kecenthi lethu, ma bvü sen wala anyunuti ha kecheng kesü wi yazishu benya mehai.

⁶ Keujüla ciwi anyunuti kesütan sa lethu alen na sie mtsü shaben, nu pathi kesawa shili ajukhiya ketenwa tsüna ma ghanya nu lebenketsu wina anyi kesami nkemiwa pathiya mehai. Kepaghenanye ma ma ghinyi nkenye anyi kesü pathi kesa tsüna aghandu nye.

⁷ Ha ghena hi nthu anyunuti kecheng khuthi pi makepa sayalo kizaben.

⁸ “Khathansha wi Apvüwa nthu Nyiza na nthu bamyithu wi khishiketheng ti ayyi tsüdi pi nthu cü nu nthu yyi sapi tisie kayi cü khe

⁹ tsaseng wi nthu na anyunuti kecheng kessiya. (Nthu na hi nansü nthu kiza keben ha tsüdila sa nu Apvüwa nthu Nyiza tizen nu ma kesansijüh tsü nie nu hang lethu, ma ayyi hapi nthu cüben.)

¹⁰ Ha salo, isanu Apvüwa na ayyi pi nthu cü keben witsü anyi kesami nkemithu yala nshü thsü nu nthu na mathu pi shü thsü nu kesami nsale kesalina.

¹¹ “Isala keujüla anyi kesü na aghandu ma jenphonwa n-nanmvula pathi nu bvü wa anyunuti hathu kesü wi n-niewa.

¹² Tsüti salethu anyi tsüwa nyuti wi accülikesathu nyu kesun pi ma ghan sengho pathi kesawa shili ajukhiya ketenwa kwen wi chi, isanu ma ya anyi tsüwa pi shü thsüya mehai.

¹³ Ma nantizen nchilalo. Israel jawi anyi kepathiwa tsü khushi pia, isalethu pala tsüdi wila nthu ghena mehaiben.

Kheni Ggüthu

¹⁴ “Apvüwa nthu Nyiza na ayyi pi nthu kecü witsü kheni pi sheng ketheng njenphon ggü tsü nkhupheghela.

¹⁵ “Chüza kesütan ghena anyi kesü pi kesami sadhale nkhi qo; anyi kesü pi samidha le sale kesalina zeng lela chüza keni nsathu yishü.

¹⁶ Keujüla anyi kesü milikemesa wina kepawa na sazzidha le nu ma patena le sathu,

¹⁷ manyi qho kekinyipenwa witsü wa nu keqhaikedi nu pendhethu tsü tsüwi kekuli sa kebenthu na manyi ghan nan ben.

¹⁸ Pendhethu na mehaitsü kina kaketsü saben; nu keujüla anyi tsüwa ma milikemesa wina ma Israel nyiwa metsimeni lethu,

¹⁹ ma anyi tsüwa metsimeni kesa men kemeten muyaben. Hatinu nthu na nkemehaiwa ha khushiaben.

²⁰ Isathu anyi tsüdila mangwa khati sadha khe zayaben; mathu na messi nu anyi kesüla pala nkemehai hati nsa neng laben.

²¹ Hati kesa wi ha nyu nantizen nchila; kemeten tsüna kahangli kesü mithon na kahangli kesü, anyon kesü mithon na anyon kesü, ayha kesü mithon na ayha kesü, akwen kesü mithon na akwen kesü, nu accü kesü mithon na accü kesü saben.”