AYENZHÜNENG 13 - Kemethajüh (N) (Re-editing) Bible (BSI)

¹ 7“Atusenjüh-kechü nyelela aman khikemili nyi kesü na azensu nyelela amankesa khishichiya mehai,

² nthu ssi wa nthu na kheni kinyi nketen cenpvü kepa wi kekuli sa nu kinyi thsüle kesalina. Ma khishikechi tsüna ntsakhiwa sa lela,

³ ma jüh nkina lalo. Apvüwa nthu Nyiza na nthu na nthu leben tsüdi pi Apvüwa tizen tenla nye khe nthu leben pienanle kesalina ma senben.

⁴ Apvüwa nie nu ma kinyikü, ma jühkina nu ma yenkhukechi tsü nieya; ma kinyi nu ma wi jühtsentsa salo.

⁵ Isala aman khikemili nyi nu atusenjüh-kechü kesüle kesü lela nthu na Ejipt wi nyu nssümagha sa keben wi nthu kekashakeyawa Apvüwa tsü matang shunlo nthu kiza lethu ma pi shü thsülo. Anyi hati kesa ha nkemehai, Apvüwa na nthu kahang kemehai wi hanglo kekiza wi tsüna nthu ssi bvüale saden. Nthu na nkemehai ha wina bvüyale kesalina ma pi shü thsü nsathu yishü.

⁶ “Ncünyu, ntsa, n-nga, no kenenwa nwubvü nyelela npvüshang kemehaiwa lela kuthila no khitenong pi acenpvü kepa wi kheni nthu bamyithu nu nthu na kinyi nkegho cenpvü kinyi thsüben.

⁷ Mathu meshu kesü na no khitenong pi anyithu no tetsaki nyelela temeja wi hang ketenthu cenpvüthu kinyi thsüben.

⁸ Isala ma kekhu wi ndula, ma jüh nkinala. Ma tizen nyelela nantizen nchila, nu ma shü nkuthila.

⁹ Ma pathilo! Alon pi ma kecen tegülo, nu tsaseng wi anyi tsüdila alon pi ma kecen thsülo.

¹⁰ Alon pi ma kecenthilo! Ma nthu na Ejipt wi nyu nssümagha sa keben wi nthu kekasha keyawa Apvüwa nthu Nyiza wina nthu ssi bvüale sa kesalina.

¹¹ Tsaseng wi Israel nyi tsüdila mangwa khati sadha khe zayaben; mathu na messi nu anyi kesüla hati nkemehai nsa nengdha.

¹² “Nthu na Apvüwa nthu Nyiza na pi nthu kecü nyunutithu wi hang keben wi

¹³ nthu mizzatenti wi mangla nkenye nyi pahan na anyunuti wina anyithu ssi wa nthu na hatu wi kinyi nketen cenpvüthu kinyi thsüle kesa nthu na zayaben.

¹⁴ Keujüla nthu na ajühjüwa hati zaya lethu, kekaketsü sa kina nanlo; nu ntsakhiwa pala nkemehai tsüti sabenla lethu,

¹⁵ anyuti ciwi kahang anyithu nu mathu sahangthu tsüdila pathilo. Anyuti tsüwa tsü yasatha salo.

¹⁶ Anyi ciwi kahangthu keben tsüdi saghu sengho anyuti non wi saghuya. Tsaseng wi anyuti tsüwa nu ciwi keben tsüdi mecang pi Apvüwa nthu Nyiza wi kekinyi salo. Anuphanla tsü yisha pia nu khiela tsü nsa neng lalo.

¹⁷ Yasa kesauthu tsü mangla pi nthu ghena nthengla, isalethu, Apvüwa na aghekepvü wi khapeghe nu nthu nantizen chicüben. Ma nthu nantizen cü nu ma nthu bamyithu wi khishiketheng ti nthu sapi anyi ji kayi ntsa yathsüaben.

¹⁸ Keujüla nthu na ma yenkhukechithu hi nansü pi nthu cü keben tsüdi nie nu Apvüwa nthu Nyiza tuwi ketsatanwa tsü sa lethu.”