AYENZHÜNENG 10 - Kemethajüh (N) (Re-editing) Bible (BSI)

Mosa na Kheneng Ayenkhukechithu Mukeya

¹ “Tsaseng wi Apvüwa na hi kiza, ‘Hatu wi ti alonpha keni pakhhiya nu pi tsü non wi chile kesa ghena akhitson kesü saya. Ayikha miwi hi wi kegholo,

² isathu hi no kheni pakhhi kesa miwi kezhü ti alonpha keni miwi zhüki cüden, nu no tsüpi akhitson non wi chiyalo.’

³ “Tsalina hi akakia chan pi akhitson kesü cüya nu hhatu wi ti kesa alonpha keni hahya, nu tsü sen ayikha wi ki.

⁴ Apvüwa na kheni ma kezhü tsü makesü, nthu na ayikha wi saghukeben ma anni wina kekhi Ayenkhukechithu Tagha pi nthu kecü tsüpi alonpha keni miwi zhüchi. Apvüwa na alonpha keni tsüpi hi cü,

⁵ nu hi khapegheya nu ayikha wina cüa. Isanu Apvüwa na kekhi ti hi tsü keni pi akhitson hi cü ketheng witsü chiya — nu tsüna anuphanla ciwi ben wa.”

⁶ (Israel nyithu na Jaakan nyithu tssükhang wina apen ketsen sen nu Mosera wi wa. Aaron na ciwi shü nu pi vhüa, nu ma tsa Eleazar na ma kutisa keqhaikediwa saya.

⁷ Mathu ciwi na Gudgoda wi wa nu tsaseng atssükhang kesü atssü keben Jotbatha wi wa.

⁸ Ci ayikha wi Apvüwa na Levi mizza nyi pi keqhaikedithu sa nu ma kekuli sa, nu Cenkethenjüh Khitson kenonccathu, nu ma nyan wina kesawegü kekhiethu sa thsü. Nu hathu hana khilila mathu kekuli.

⁹ Tsalina Levi mizza na amizza kepathu ti mathu shei ayyi mu meya; mathu ghena kemehaiwa lethu Apvüwa nthu Nyiza na khishiketheng ti mathu na Apvüwa ghena keqhaikedithu kesa tsüle.)

¹⁰ “Hi kheni kesa ti aghaja nu ghanan jügha ayikha wi ben wa. Apvüwa na kheneng ihhai kina chicü nu nthu yasa ntenle sa.

¹¹ Tsaseng wi ma nthu ya ma ayyi pi nthu bamyithu cüle khishiketheng tsü yaya thsüle kesalina hi nthu ssinu walo kiza.

Anyiza Na Mangwa Khieben

¹² “Israel nyithu, khili Apvüwa nthu Nyiza na nthu wi mangwa khieben khe kina chilo; Apvüwa kinyikü nu ma kekhi tsüdila salo. Ma tizen, nthu leben tsüdi pi ma kekuli sa,

¹³ nu ma yenthu tsüdila nie tenlo. Hi nansü nthu ghena kekiyi tsüthu pi nthu cüben.

¹⁴ Atssan kemisi ntsathu lela, ayyi nu ciwi keben tsüdila Apvüwa ji.

¹⁵ Isala Apvüwa nthu bamyithu nanketizen na khang mtsü kesalina ma anyi kepathu miwi nthu kessiyale, nu nthu na khilila ma kessikeya nyithu saben.

¹⁶ Tsalina nthu khili nten na Apvüwa jühkina nu leben-dhu nbenla yilo.

¹⁷ Apvüwa nthu Nyiza hana acenpvü tsüdi nu kekhang tsüdi miwi khangki. Ma khang nu di kesalina ma jühkina qole. Ma nyu nankepapa sa nten, nu alaa la ya nten.

¹⁸ Ma maghamaghangthu nu denyilethu nanketizen cü metsiden; nu ma asang na ithu jawi hang ketenthu tsü tizen, nu kedsakejjü nu athsümeni pi mathu cüden.

¹⁹ Tsalina asangthu tizenlo, kepaghenanye nthu la kuti tsüwi Ejipt wi asangthu sale.

²⁰ Apvüwa nthu Nyiza tsü kinyikü nu ma ketan kinyilo. Ma wi jühtsentsa sa nu ma nyan wi ketan nthu na kekhishithu salo.

²¹ Ma senglo — ma nthu Nyiza, nu nthu nyon pi ma nthu ghena kedi nu amankesa kulikechi muyadha.

²² Nthu bamyithu na Ejipt wi kewa tsüwi mathu na anyi achentagü ketan. Isala Apvüwa nthu Nyiza na khili tsü nthu sapi tangwi ghotsithu keji ti sa cüdha.”