AMOS 8 - Kemethajüh (N) (Re-editing) Bible (BSI)

Kemanthi wi Kedsau Shijü kesü mu

¹ Kemisintsa Apvüwa wi hi kemanthi kepa wi kesü mu. Ciwi hi kedsau shijü kesü mu.

² Apvüwa na keü, “Amos, no mangwa mu ben nu?” Hi luneng, “Kedsau shijü kesü le.” Apvüwa na hi wi khi, “Inyi Israel ghena asakhenwa na ghodha. Hi mathu meten cü keten ghena ileben kemili ntendha.

³ Tsü tsathang wi kadijjen wi akhwithu tsüna anonkegü kemagha saaben. Apen tsüdi wi keshü kamang na pongben. Ceen nu mathu khushi piaben .”

Israel Tuketeshi

⁴ Ha kinalo, nthu kahhatuthu cüten nu diyyiwa wi ketha-uthu yasale sa ketenthu.

⁵ Nthu ketanla hati khiben, “Ithu na kemetha tsathang cen nu ithu su pi jeükeya mehiechala bendha. Mangjü na Sabbath cennu ithu na tsüpi jeü neng shhuya mehai nu? Isanu ithu na ma gilli khuya, kewhu nmetsala sa, nu ithu ji kesheithu mechule kesa ghena kewhuchan pakivvü cüben.

⁶ Ithu na awhengsu mangla nkenye tsüpi ma men kemehai wi jeüya. Ithu na ketha-u kesü na nyu men kepvü dhi meya, ma ccüguwen ghapili lela nkeshüchawa bhaya, nu ithu na ma pi nssümagha kesü sala sheiya na.”

⁷ Apvüwa, Israel Nyizawa na kishendha. “Hi khiela mathu nkemehai kekuli tsü maliya nben.

⁸ Tsalina ameghükuju, nu ayyi wi anyi tsüdila agüccü ntsa saaben. Diyyiwa mabenla kuli; tsüna kuli shagha nu qancadu Nil Ghaku ti saaben.

⁹ Hi ghanan- lapvü wi aghani pi du thsü nu aghanan tsü wina ayyi na jang thsü kesa matsü kesü na ghoden. Hi Kemisintsa Apvüwa na khidha.

¹⁰ Hi nthu khothu tsü sapi anonkegü sa, nu nthu kenong khwithu tsü kemili pi ahathakina kemagha sa thsüaden . Hi nthu ya ali whi nu aleshithsü mphi thsüden, nu nthu na abajja na atsa kesütanwa ghena anongü keben ti sa thsüaden . Tsü tsathang tsüna asakhen kecu nmehai ntsa saaden.

¹¹ “Hi azeng kesun pi ayyiwa miwi chi keten matsü kesü na gho tendha. Anyithu na ghamaben, isala kedsakejjü ghena nye; mathu na digheben, isala atssü ghena nye. Mathu na Apvüwa wi ketsijüh ghena ghama nu digheben. Hi Kemisintsa Apvüwa, hi khidha.

¹² Anyithu na Keshü Tssükedone wina wa Mediterranean kecu nu aghawa na wa nishu kecu kegoedeja ben. Mathu na kahe wi tsüdi cüshu nu Apvüwa ketsijüh tsü bhaben, isala mathu na tsü muya nben.

¹³ Tsü ghanan wi pvüza nu ghala kesüqonthu lela kedighe wina shüca waben.

¹⁴ Anyi Samaria tsikezhüthu nyan wina hati ‘Dan cenpvü wina’ nyelela ‘Beersheba cenpvü wina’ khila kishen ketenthu na qanca nu shagha neng nbendha.”